កម្ពុជា​ដណ្ដើម​បាន​មេដាយ​សរុប ៩​គ្រឿង​ពី​ការ​ប្រកួត​កីឡា​ប៉េតង់​ជើងឯក​អាស៊ី​លើ​ទឹក​ដី​ខ្លួន​

234

​ប៉េតង់៖ ក្នុងនាម​ជា​ម្ចាស់ផ្ទះ​នៃ​ការប្រកួត​កីឡា​ប៉េតង់​ជើងឯក​អាស៊ី​លើក​ទី​១៩ ដែល​ទើប​បញ្ចប់​ការប្រកួត​កាលពី ចុង​សប្ដាហ៍​មុន​នេះក្រុម​កីឡាករ​-​កីឡាការិនី​កីឡា​ប៉េតង់​កម្ពុជាដណ្ដើម​បាន​មេដាយ​សរុប ៩​គ្រឿង​ជូន​ប្រទេសជាតិ​របស់​ខ្លួនក្នុង​នោះ​មាន​មេដាយមាស​១, ប្រាក់​៣ និង​មេដាយ​សំរឹទ្ធ ៥​គ្រឿង។​
​ការប្រកួត​នេះបាន​ធ្វើ​ឡើង ៣​ថ្ងៃ​ប៉ុណ្ណោះចាប់ពី​ថ្ងៃទី​១៧ ដល់​ថ្ងៃទី​១៩ ខែធ្នូ​កន្លងទៅ នៅ​លើ​ទីលាន​ពហុ​កីឡដ្ឋាន​ជាតិ។ ជា​លទ្ធផល​មានតែ​កីឡាករ សុខ ចាន់​មាន ម្នាក់​គត់ដែល​ដណ្ដើម​បាន​មេដាយមាស​ជូន​ប្រទេស​កម្ពុជាលើ​វិញ្ញាសា​វាយ​យ​ពិន្ទុ។ ដោយឡែក​កីឡាការិនី កែ ឡេង ដែល​ជា​ម្ចាស់​មេដាយមាស​ពិភពលោក ២​សម័យកាល​លើ​វិញ្ញាសា​វាយ​យក​ពិន្ទុ​នារី​នោះ​ បាន​ប្រកួត​ចាញ់​កីឡាការិនី​វៀតណាមក្នុង​វគ្គ​ពាក់កណ្ដាល​ផ្ដាច់ព្រ័ត្រ​បាន​ត្រឹម​មេដាយ​សំរឹទ្ធ​ប៉ុណ្ណោះ។​ ចំពោះ​មេដាយ​ប្រាក់​ទាំង ៣​គ្រឿង​វិញ គឺ​កម្ពុជា​ទទួល​បាន​លើ​វិញ្ញាសា​ជា​ក្រុម និង​វាយ​យក​ពិន្ទុ​យុវជនដូចជា​វិញ្ញាសា ៣​នាក់ទល់នឹង ៣​នាក់​នារី និង​វិញ្ញាសា ៣​នាក់ ទល់នឹង ៣​នាក់​ផ្នែក​យុវជន គឺ​កម្ពុជាចាញ់​ថៃក្នុង​វគ្គ​ផ្ដាច់ព្រ័ត្រ​ដូចគ្នា។ ចំណែក​វិញ្ញាសា​វាយ​យក​ពិន្ទុ​ផ្នែក​យុវជន​កីឡាករ​វ័យក្មេង មួង ទិត្យ​ម៉ា​ណែ​ត បាន​ប្រកួត​ចាញ់​កីឡាករ​ចិន​តៃប៉ិ​ក្នុង​វគ្គ​ផ្ដាច់ព្រ័ត្រ​។​ ហេតុនេះ​បើ​គិត​ពី​ចំណាត់ថ្នាក់​មេដាយ​សរុបកម្ពុជា​បាន​ត្រឹម​ចំណាត់ថ្នាក់​លេខ​២​ប៉ុណ្ណោះ ខណៈក្រុម​អត្ត​ព​លិ​ក​ថៃជាប់​លេខ​១ ព្រោះ​ថៃដណ្ដើម​បាន​មេដាយមាស​ច្រើន​ជាង​គេរហូតដល់​ទៅ ៤​គ្រឿង និង​មេដាយ​សំរឹទ្ធ ៣​គ្រឿង។ ចំណែក​ក្រុម​អត្ត​ព​លិ​ក​ចិន​តៃប៉ិជាប់​លេខ​៣ ដោយសារ​ការ​ដណ្ដើម​បាន​មេដាយមាស ១​គ្រឿងលើ​វិញ្ញាសា​វាយ​យក​ពិន្ទុ​ផ្នែក​យុវជន​។​ ថ្លែង​ក្នុង​ពិធី​បិទ​ការ​ប្រកួត​ខាងលើ ឯកឧត្តម ស៊ាន បូរ៉ាត់ រដ្ឋលេខាធិការ​ក្រសួង​អប់រំ យុវជន និង​កីឡា បាន​មានប្រសាសន៍ថា នេះ​ជា​មោទនភាពដែល​កម្ពុជា​ទទួល​បាន​សិទ្ធិ​រៀបចំ​ ធ្វើជា​ម្ចាស់ផ្ទះ​កីឡា​ប៉េតង់​ជើងឯក​អាស៊ី ដោយ​ជោគជ័យ ដើម្បី​បង្ហាញ​ឲ្យ​ពិភពលោក​បានដឹង​ពី​ភាព​រីកចម្រើន​លើ​គ្រប់​វិស័យ​ក្នុង​ប្រទេស​កម្ពុជា រួម​ទាំង​វិស័យ កីឡា​ផង​ដែរ។​ លើស​ពី​នេះឯកឧត្តម​ក៏បាន​ថ្លែង​កោតសរសើរ ចំពោះ​ការ​ខិតខំ​របស់​កីឡាករ​-​កីឡាការិនី​កម្ពុជា​ផង​ដែរ ដែល​បាន​ខិតខំ​អស់ពី​សមត្ថភាព ដើម្បី​ដណ្ដើមយក​មេដាយ​ជូន​ជាតិ​យ៉ាងច្រើន​ក្នុងនាម​យើង​ជា​ម្ចាស់ផ្ទះ ប៉ុន្តែ​ទោះជា​យ៉ាង​កីឡាករ​-​កីឡាការិនី​គ្រប់រូបត្រូវ​បន្ត​ការ​ហ្វឹកហាត់​បន្ថែម​ទៀត ដើម្បី​ត្រៀម​ចូលរួម​ប្រកួត​ក្នុង​ព្រឹត្តិការណ៍​អន្តរជាតិ​នានា ជាពិសេស​គឺ​ការ​បង្កើន​សមត្ថភាព​បណ្ដុះបណ្ដាល​ថ្នាល​យុវជន សម្រាប់​ត្រៀម​ស៊ី​ហ្គេមឆ្នាំ​២០២៣ ដែល​កម្ពុជា​នឹង​ធ្វើ​ជា​ម្ចាស់ផ្ទះ​តែម្ដង៕
​អត្ថបទ​៖​ លី ឈុន​ឡា