ប្រធានាធិបតី​កូឡុំប៊ី​​មិន​អាច​ចុះ​ហត្ថលេខា​លើ​ជំនួប​​ពិភាក្សា​​នា​ពេល​ចុងក្រោយ​​ជាមួយ​ក្រុម​​ឧទ្ទាម​​ហ្វាក

124

កូឡុំប៊ី៖ ប្រធានាធិបតី​កូឡុំប៊ី​លោក ជូអាន ម៉ានូអ៊ែល​ សាន់តូស​ មាន​ប្រសាសន៍​​កាល​ពី​ថ្ងៃ​ពុធ​​ម្សិលមិញ​ថា ​លោក​នឹង​មិន​ចុះ​ហត្ថលេខា​​លើ​ដំណោះស្រាយ​​មួយ​យ៉ាង​អាក្រក់​​ជាមួយ​​ក្រុម​ឧទ្ទាម​ហ្វាក​ ដើម្បី​​ជួប​ប្រជុំ​​ទៅ​តាម​​កាល​បរិច្ឆេទ​កំណត់​នៅ​ថ្ងៃ​ទី២៣​ ខែមីនា​​នេះ​ សម្រាប់​កិច្ច​ព្រម​ព្រៀង​​សន្តិភាព​​មួយ​ឡើង។

លោក​ប្រធានាធិបតី​អាច​នឹង​ចុះ​ហត្ថលេខា​ លើ​ដំណោះ​ស្រាយ​​សន្តិភាព​មួយ​បាន​​លុះត្រា​តែ​មាន​ការ​​កំណត់​ត្រឹម​ត្រូវ និង​​ពេញ​ចិត្ត​។ កូឡុំប៊ី​​បាន​បន្ត​ការ​ចរចា​បញ្ចប់​សង្គ្រាម​យូរ​អង្វែង​រយៈ​ពេល​ជាង​ ៥០ឆ្នាំ​​កន្លង​មក​ ជាមួយ​កង​កម្លាំង​ប្រដាប់​អាវុធ​​បដិវត្តន៍​​កូឡុំប៊ី​​ ហៅ​កាត់​​ឧទ្ទាម​ហ្វាក​ចាប់​តាំង​ពី​ចុង​ឆ្នាំ​២០១២​កន្លង​មក​​ ហើយ​នៅ​ក្នុង​ឆ្នាំ​ ២០១៥ ភាគី​ទាំង​២​ក៏​បាន​ព្រមព្រៀង​​ចុះ​ហត្ថលេខា​​លើ​គម្រោង​​ដោះស្រាយ​សន្តិភាព​​ និង​កំណត់​​ធ្វើ​បន្ត​ដោះ​ស្រាយ​​​ថែម​ទៀត​នៅ​ថ្ងៃ​ទី២៣ ខែ​មីនា​ឆ្នាំ​២០១៦​នេះ។ លោក​ប្រធានាធិបតី​​មាន​ប្រសាសន៍​បន្ត​ថា​ នេះ​ជា​ដំណាក់​កាល​ពិភាក្សា​​នា​ពេល​ចុងក្រោយ ​​ស្វែង​រក​​តម្រូវការ​សន្តិភាព​មួយ​ តែ​បើ​ធ្វើ​ឡើង​មិន​ប្រកប​ដោយ​ប្រសិទ្ធភាព​​ទេ​នោះ​ លោក​នឹង​មិន​ចុះហត្ថលេខា​ធ្វើ​ជំនួប​ចរចា​​ជាមួយ​ក្រុម​ឧទ្ទាម​ហ្វាក​នោះ​ឡើយ។

គួរ​ឲ្យ​ដឹង​ថា ក្នុង​ប្រធាន​បទ​​នៃ​ការ​ចរចា​​ដោះស្រាយ​​មាន​ដូច​ជា​​ធ្វើ​កំណែ​ទម្រង់​​ទឹក​ដី, ការ​បញ្ចូល​ក្រុម​ទ័ព​​ព្រៃ​ទៅ​ក្នុង​នយោបាយ​, ការ​បង្កើត​តុលាការ​​យុត្តិធម៌​​អន្តរកាល​មួយ, បង្កើត​លក្ខខ័ណ្ឌ​រក​មើល​ក្រុម​អ្នក​បាត់​ខ្លួន, ការ​ធ្វើ​ប្រតិបត្តិការ​ដោះ​មីន និង​ការ​​បញ្ចប់​ជួញដូរ​គ្រឿង​ញៀន​ដោយ​ខុស​ច្បាប់៕
អត្ថបទ៖ រិទ្ធី