ពលរដ្ឋ​ខេត្ត​ស្វាយរៀង ​រួមគ្នា​ជួសជុល​ផ្លូវ​ដែល​ខូចខាត​ដោយ​ទឹកជំនន់

147

ស្វាយរៀង ៖ ​ ដោយ​លំបាក​ក្នុង​ការ​ធ្វើដំណើរ​ពី​តំបន់​មួយ​ទៅ​តំបន់​មួយ​ក្នុង​ការ​ប្រាស្រ័យ​ទំនាក់ទំនង និង​ការ​ផ្លាស់ប្តូរ​ទំនិញ ថ្មីៗ​នេះ ប្រជាពលរដ្ឋ​នៅ​តាម​តំបន់​មួយ​ចំនួន ​បានរួម​គ្នា​ធ្វើការ​ជួសជុល​ផ្លូវថ្នល់ ​ប្រើប្រាស់​បណ្តោះ​អាសន្ន ​ខណៈដែល ​ជំនន់​ទឹកទន្លេ និង​ទឹកភ្លៀង​បាន​ស្រក​ស្រុតចុះ​។

ផ្លូវថ្នល់​ជាច្រើន​ខ្សែ​ស្ថិតនៅតាម​តំបន់​ជំនន់​ទឹកទន្លេ និង​ទឹកភ្លៀង​ជន់​លិច​ ត្រូវ​បាន​ប្រជាពលរដ្ឋ​នៅ​តាម សហគមន៍​ធ្វើការ​ជួសជុល​ឡើងវិញ​ហើយ សម្រាប់​​ធ្វើ​ចរាចរ ​និង​នាំ​ផលិតផល​ទៅកាន់​ទីផ្សារ និង​តំបន់​ផ្សេងៗ​ទៀត បន្ទាប់ពី​ទឹកទន្លេ ​និង​ទឹកភ្លៀង​ញាំញី ​បំផ្លាញ​ដោយ​អន្លើៗ ​មួយរយៈ​កន្លងមក​។

ដោយឡែក​ប្រជាពលរដ្ឋ​នៅ​ភូមិ​តា​ស្អាង ឃុំ​កំពង់ចំឡង ស្រុក​ស្វាយជ្រំ ​ដែល​ជា​ភូមិ​មួយ​ក្នុង​ចំណោម​ភូមិ ​ជាច្រើន​ផ្សេងទៀត នៅ​ទូទាំង​ខេត្ត កាលពី​ម្សិលមិញ បាន​ចាប់ផ្តើម​រួមគ្នា​ធ្វើការ​ជួសជុល​ផ្លូវថ្នល់ សម្រាប់​ប្រើប្រាស់ បណ្តោះអាសន្ន ​ និង​នាំ​កសិផល​ទៅកាន់​ទីផ្សារ និង​តំបន់​ឯទៀត​ឡើងវិញ ក្រោយពី​ជំនន់​ទឹកភ្លៀង​បាន​បំផ្លាញ​មួយ រយៈ​កន្លងមក​។

តំណាង​ក្រុម​ប្រជាពលរដ្ឋ​ភូមិ​តា​ស្អាង​ម្នាក់​ លោក ​គឹម ផល្លី បាន​ប្រាប់ B.T.V ថា ផ្លូវ​នៅ​ភូមិ​របស់​លោក ជា​រៀង រាល់​ឆ្នាំ ទោះ​ជំនន់​ទឹកទន្លេ​មិនបាន​លិច ក៏​ផ្លូវ​មួយ​ខ្សែ​នេះ​ត្រូវ​បាន​បំផ្លាញ​ដោយ​ជំនន់​ទឹកភ្លៀង និង រថយន្ត​ដឹក​កម្មករ ដែរ ពីព្រោះ​ផ្លូវ​ស្ថាបនា​ដោយ​មូលនិធិ​ឃុំ​ធ្វើ​មិន​ត្រូវ​បទដ្ឋាន ដោយ​ចាក់​ដី​ឥត​ខាងក្រោម និង​រោយ​ខ្សាច់​ភ្នំ​តិចពេក​ ប៉ះចំ​ភ្លៀង​មួយ​មេ​ធំ​ខ្សាច់​ហូរ​ច្រោះ​សល់​តែ​ដីឥដ្ឋ បង្ក​ការ​លំបាក​ដល់​ការធ្វើដំណើរ​ តែបើ​នៅ​រដូវប្រាំង​វិញ បង្ក​ទៅជា ​ខ្សាច់​ហុយ​។

ខេត្តស្វាយរៀង​ជា​ខេត្ត​មួយ ដែល​ប្រជាពលរដ្ឋ​រស់នៅ​ដោយ​អាស្រ័យ​ផល​លើ​វិស័យ​កសិកម្ម ​និង​ប្រកប​របរ បន្ថែម​នៅ​តាម​រោងចក្រ​សហគ្រាស ដែល​ប្រមុខ​រាជរដ្ឋាភិបាល​កម្ពុជា​ បាន​បង្កើត​ឡើង​នៅ​ឆ្នាំ​២០០៥​ ស្រប​នៃ​កំណើន ​ការងារ​ច្រើន​ ការ​ធ្វើដំណើរ​ទៅ​ប្រកប​របប​តាមរយៈ​យានយន្ត​ក៏​មាន​ការ​កើនឡើង គួបផ្សំ​ទៅ​នឹង​ទឹកទន្លេ និង​ទឹកភ្លៀង ​ជោជន់​លិច បាន​បំផ្លាញ​ផ្លូវថ្នល់​ជា​អន្លើៗ ​ជាច្រើន​ខ្សែ ហើយ​រាល់​នៃ​ការ​ធ្វើដំណើរ​មាន​ភាព​យឺតយ៉ាវ​ ឯ​កសិផល​មួយ ចំនួន​បាន​រង​នូវ​ការខូចខាត មិនបាន​ដឹកជញ្ជូន​ទៅកាន់​ទីផ្សារ​ទាន់ពេលវេលា​៕