ខុនដូ​តម្លៃ​២០០​លាន​ដុល្លារ ​ប្រកាស​លក់​ជា​ផ្លូវការ​ជា​មួយនឹង​ស្ថានភាព​ទីផ្សារ​ល្អ​ប្រសើរ​

72

ភ្នំពេញ៖ គម្រោង​ខុន​ដូ​ប្រណីត​The SEA Gate Suite ដែល​គ្រោង​បោះទុន​វិនិយោគ​ប្រមាណ​២០០​លាន​ដុល្លារ​អាមេរិក នៅ​ខេត្ត​ព្រះសីហនុ បាន​ប្រកាស​បើក​លក់​ជា​ផ្លូវការ​ហើយ ដោយមាន​ការចូលរួម​ជា​អធិបតី​ពីស​ម្តេច​ក្រឡាហោម​ស ខេង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ​។​

ជា​មួយនឹង​ការប្រកាស​លក់​ជា​ផ្លូវការ​នូវ​គម្រោង កាលពី​រាត្រី​ថ្ងៃ​ម្សិល​ម៉ិ​ញ​នេះ លោក​PHEAKDEY M.SAO តំណាង​ម្ចាស់​គម្រោង​ខុន​ដូ​ The SEA Gate Suite នៃ​ក្រុមហ៊ុន​KHCN Investment & Development បាន​ចុះ​អនុស្សរណៈ​យោគយល់​គ្នា​(MOU) ជាមួយ​តំណាង​ក្រុមហ៊ុន​អចលនទ្រព្យ​សហរដ្ឋអាមេរិក​ដ៏​ធំ​មួយ ដែល​តំណាង​ដោយ​លោក​បណ្ឌិត គីម ហ៊ាង ប្រធាន​ក្រុមប្រឹក្សាភិបាល​នៃ​ក្រុមហ៊ុន GREX Experts ដើម្បី​នាំយក​ហ្វ្រែ​ន​ឆាយ​(Franchise-​សិទ្ធិ​គ្រប់គ្រង​)​មក​គ្រប់គ្រង​ខុន​ដូ នាទី​ក្រុង​មាត់សមុទ្រ​មួយ​នេះ ។​

លោក​បណ្ឌិត​គីម ហ៊ាង បាន​ឲ្យ​ដឹងថា​The SEA Gate Suite គឺជា​គម្រោង​លក្ខណៈ​អន្ដរជាតិ ដែល​ទាមទា​ឲ្យ​មាន​ក្រុមហ៊ុន​អាជីព​អន្ដរជាតិ​មួយ​មក​គ្រប់គ្រង​ដូចគ្នា ។ ដូច្នេះហើយ​ទើប​ក្រុមហ៊ុន GREX Experts បាន​សហការ​ជាមួយ​ក្រុមហ៊ុន​អាជីព​របស់​សហរដ្ឋអាមេរិក ដើម្បី​ចាប់ដៃ​សហការគ្នា​គ្រប់គ្រង​លើ​គម្រោង​អាគារ​ខុន​ដូ​ខាងលើ បន្ទាប់ពី​បញ្ចប់​ការសាងសង់​ជា​ស្ថាពរ ប៉ុន្ដែ​លោក​មិនបាន​បញ្ជាក់​ពី​ឈ្មោះ​ក្រុមហ៊ុន​នោះទេ​។​

The SEA Gate Suite គឺជា​គម្រោង​ខុន​ដូ​បង្កើតឡើង​ក្រោម​កិច្ចសហការ​រវាង​អ្នកវិនិយោគ​ខ្មែរ និង​ចិន ដែល​បើក​ការដ្ឋាន​សាងសង់​កាលពី​ខែ​មិថុនា​កន្លងទៅ ហើយ​គ្រោង​នឹង​បញ្ចប់​ការសាងសង់​នៅ​ឆ្នាំ​២០២០​។ តម្លៃ​ខុន​ដូ​វិញ​ គឺ​គិត​ជា​មធ្យម​មានតម្លៃ​ចន្លោះ​ពី ១,០០០ ទៅ ១,៨០០​ដុល្លារ​ក្នុង​មួយ​ម៉ែត្រការ៉េ ។​

លោក​ឧកញ៉ា​ ចេង ខេង ​ប្រធាន​ក្រុមប្រឹក្សាភិបាល​នៃ​ក្រុមហ៊ុន​Hutton CPL​បាន​ថ្លែងថា ទីផ្សារ​ខុន​ដូ​នៅ​ខេត្ត​ព្រះសីហនុ​កំពុង​មាន​ការរីកចម្រើន​ខ្លាំង ដោយសារ​មាន​អ្នកវិនិយោគ​ជាតិ និង​អន្តរជាតិ​បាន​ទិញ​វិនិយោគ​នៅ​ខេត្ត​ដ៏​មាន​សក្ដានុពល​មួយ​នេះ​។ លោក​បន្ត​ថា ខេត្ត​ព្រះសីហនុ​កំពុងមាន​ការ​រីកចម្រើន​ខ្លាំង ដោយសារ​ការ​វិនិយោគ​របស់​អ្នក​វិនិយោគ​អន្តរជាតិ ពិសេស​អ្នកវិនិយោគ​ជនជាតិ​ចិន​។​

បច្ចុប្បន្ន​ខេត្ត​ព្រះសីហនុ​មាន​គម្រោង​ខុន​ដូ​ជាច្រើន​កំពុង​សាងសង់​ដូចជា Blue Bay, Sunshine Bay, D Seaview​ជាដើម​៕ ​