អតីត​កីឡាករ Man Utd លោក Ruud van Nistelrooy នឹង​មក​កម្ពុ​ជានា​ដើមខែ​មេសា​នេះ​

169

បាល់ទាត់៖ ​លោក Ruud van Nistelrooy កីឡាករ​បាល់ទាត់​សញ្ជាតិ​ហូ​ឡង់ នឹង​ធ្វើ​ដំណើរ​មក​កម្ពុ​ជាក្នុង​កម្មវិធីដំណើរ​ទេសចរណ៍​ពានរង្វាន់​ក្របខ័ណ្ឌ UEFA Champions League ២០១៨ ចាប់ពី​ថ្ងៃទី​២-៤ មេសា ខាងមុខដែល​រៀបចំ​ដោយ​ក្រុម​ហ៊ុន​ស្រា​បៀរ Heineken​។​ការ​មក​កម្ពុជា​លើកដំបូង​នេះ ក្រៅពី​ជួប​ជាមួយ​អ្នកគាំទ្រ​ខ្លួន អតីត​កីឡាករ​ដ៏​ឆ្នើម​របស់​ស​ក្រុម Manchester United រូប​នេះ​ក៏​នឹង​មាន​ការចែក​រំ​លែង​បទពិសោធន៍​បាល់ទាត់​ ជាមួយ​កីឡាករ​កម្ពុជា​មួយ​ចំនួន​ផង​ដែរ​។​ គួរ​រំលឹក​ថា កីឡាករ​ជើងចាស់​រូប​នេះបាន​ស៊ុត​បញ្ចូល​ទី​ឲ្យ​ក្រុម Manchester United បាន​ចំនួន ១៥០​គ្រាប់ក្នុង ២១៩​ប្រកួត និង​ជា​អ្នក​ស៊ុត​បញ្ចូល​ទី​បាន​ច្រើន​ជាង​គេ​ ក្នុង​កំណត់​ត្រា​បាល់ទាត់​អឺរ៉ុប​។ ហើយ​លោក Ruud van Nistelrooy ជា​កីឡាករ​ស៊ុត​បាល់​បញ្ចូល​ទី​ច្រើន​ជាង​គេ ៣​សម័យកាល ដោយ​បង្ហាញខ្លួន ៨១​លើកស៊ុត​បញ្ចូល​ទី​បាន ៦០​គ្រាប់ក្នុង​ក្របខ័ណ្ឌ UEFA Champions League ។

​​សូម​បញ្ជាក់​ថា Van Nistelrooy ក៏​មាន​តួនាទី​ជា​ទូត​សុច្ឆន្ទៈ​ ដើម្បី​ផ្សព្វផ្សាយ​មហិច្ឆតា​ចំពោះ​ការប្រកួត​ក្របខ័ណ្ឌ UEFA Champions League ជាមួយ​អ្នកគាំទ្រ​បាល់ទាត់​ទូទាំង​ពិភពលោក​។ ហើយ​ក្នុង​ពេល ១១​ឆ្នាំ កម្មវិធី​ដំណើរ​ទេសចរណ៍​មួយ​នេះ ​បាន​ទៅដល់ ២៦​ប្រទេសនៅ​ទូទាំង​ទ្វីប​អាហ្វ្រិក អាស៊ី អាមេរិក​ខាងត្បូង និង​អាមេរិក​ខាងជើង ហើយ​ពេលនេះ​បាន​មកដល់​កម្ពុជា​៕