ភ្នំពេញ៖ គណៈកម្មាធិការអចិន្ត្រៃយ៍ នៃរដ្ឋសភា នៅថ្ងៃទី២១ ខែមីនា នេះ បានបើកកិច្ចប្រជុំជ្រើសតាំង និង ផ្លាស់ប្ដូរជំនួសសមាជិករដ្ឋសភាមួយចំនួន ក្នុងការដាក់ចូលទៅសម័យប្រជុំពេញអង្គលើកទី២ នីតិកាល ទី៦ នាពេលខាងមុខនេះ។
នៅថ្ងៃទី២១ ខែមីនា នេះ គណៈកម្មាធិការអចិន្ត្រៃយ៍ នៃរដ្ឋសភា បានបើកកិច្ចប្រជុំ ក្រោមអធិបតី ភាពរបស់សម្តេចអគ្គមហាពញាចក្រី ហេង សំរិន ប្រធានរដ្ឋសភា ក្នុងការពិភាក្សា និងអនុម័តលើរបៀប វារៈចំនួន៥ ទាក់ទងនឹងការជ្រើសតាំងសមាជិក និងផ្លាស់ប្តូរសមាជិក នៃគណៈកម្មការទី១ និងទី៤។
អ្នកនាំពាក្យរដ្ឋសភា ឯកឧត្តម ឡេង ប៉េងឡុង បានបញ្ជាក់ប្រាប់អ្នកសារព័ត៌មានថា អង្គប្រជុំ បាន អនុម័តប្រកាសទទួលស្គាល់លោកជំទាវ គឹម សុវណ្ណា ជាតំណាងរាស្ត្រមណ្ឌលភ្នំពេញ ជំនួសឯកឧត្ដម ប៉ា សុជាតិវង្ស។ ឯកឧត្តម ប្រាជ្ញ ច័ន្ទ នឹងត្រូវបោះឆ្នោតជ្រើសតាំងជាសមាជិកគណៈកម្មការសិទ្ធិមនុស្ស និង ទទួលពាក្យបណ្តឹង។
ឯកឧត្តម ច័ន្ទ សុផល នឹងត្រូវបោះឆ្នោតជាសមាជិកគណៈកម្មការមហាផ្ទៃ ការពារ ជាតិ និងមុខងារសាធារណៈ។ ក្រៅពីនេះ រដ្ឋសភា បានអនុម័តទទួលយកបេក្ខភាពសមាជិកក្រុមប្រឹក្សា ធម្មនុញ្ញជំនួសសមាជិក ដែលបានចូលនិវត្ត និងការអនុម័តលើរបាយការណ៍ ស្តីពីសកម្មភាព នៃរដ្ឋសភា រយៈពេលបីខែកន្លងទៅ។
ឯកឧត្តម ឡេង ប៉េងឡុង បានបន្តថា របៀបវារៈទាំងអស់នេះ នឹងលើកទៅសម្រេចនៅសម័យប្រជុំ លើកទី២ ដែលនឹងកំណត់កាលបរិច្ឆេទ បន្ទាប់ពីគណៈកម្មាធិការអចិន្ត្រៃយ៍បើកកិច្ចប្រជុំជាថ្មីម្តងទៀត៕
