សហគមន៍តំបន់ការពារធម្មជាតិលើខ្នងភ្នំគូលែនទទួលបានការពង្រឹងតួនាទីយ៉ាងសំខាន់ក្នុងកិច្ចការពារនិងអភិរក្សព្រៃឈើ និងការលើកកម្ពស់ជីវភាពជាមួយសក្តានុពលលំហែបៃតង

ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន កាលពីរសៀលថ្ងៃទី៣០ ខែវិច្ឆិកា ឆ្នាំ​២០២៤ បានអញ្ជើញជួបសំណេះសំណាលជាមួយអាជ្ញាធរដែនដី ដៃគូសហការ និង​ប្រជា​ពលរដ្ឋ​នៅ​ក្នុង​សហគមន៍ តំបន់ការពារធម្មជាតិព្រៃធំអន្លង់ធំ ស្ថិតនៅលើខ្នងភ្នំគូលែន នៃឧទ្យានជាតិ​ព្រះជ័យ​វរ្ម័ន នរោត្តម«ភ្នំគូលែន» ក្នុងភូមិសាស្រ្តខេត្តសៀមរាប។

ឯកឧត្តមរដ្ឋ​មន្រ្តី បានថ្លែងថា សហគមន៍តំបន់ការពារធម្មជាតិ ដើរតួនាទីសំខាន់​ក្នុង​កិច្ច​ការងារ​ការពារ ​និងអភិរក្សព្រៃឈើសហគមន៍ ហើយក៏ជាកន្លែងដែលសហគមន៍ត្រូវធ្វើជាម្ចាស់ សម្រាប់​ការ​អភិវឌ្ឍ​គោលដៅលំហែបៃតង ដែលត្រូវស្វាគមន៍ ភ្ញៀវទេសចរមកកម្សាន្ត តាមរយៈ​ការ​បោះតង់​សម្រាក និងទស្សនាទេសភាពធម្មជាតិ តាំងវប្បធម៌ ប្រវត្តិសាស្រ្ត សាសនា ជាដើម នៅ​ក្នុង​ព្រៃ​សហគមន៍ទៀតផង។

ឯកឧត្តមបណ្ឌិត អ៊ាង សុផល្លែត បានបញ្ជាក់បន្ថែមថា សហគមន៍តំបន់ការពារធម្មជាតិ នៅ​លើ​ខ្នង​ភ្នំ​គូលែន ជាតំបន់ដែលមានព្រៃឈើក្រាស់ មានទេសភាពស្រស់ស្អាត ហើយ​អាច​ឱ្យ​ភ្ញៀវ​ទេសចរ​បោះតង់សម្រាកក្បែរមាត់ទឹក និងទស្សនាប្រាសាទនានាក្នុងព្រៃជាច្រើនទៀតផង។ យោង​តាមប្រសាសន៍របស់ ឯកឧត្តមរដ្ឋមន្រ្តីក្រសួងបរិស្ថាន តាម​រយៈ​គម្រោង​និរន្តរភាព​តំបន់​ទេស​ភាព និងទេសចរណ៍ធម្មជាតិកម្ពុជា ដែលហៅកាត់ថា CSLEP ដែលដឹក​នាំ​អនុវត្ត​ដោយ​ក្រសួង​បរិស្ថាន និងក្រសួងអភិវឌ្ឍជនបទ ក្រោមហិរញ្ញប្បទានធនាគារពិភពលោក មូល​និធិ​បរិស្ថាន​សកល និងរាជរដ្ឋាភិបាលកម្ពុជា ក្រសួងបរិស្ថាន បានផ្តល់ផ្ទះតង់ ចំនួន១០ផ្ទះ ជា​ជំហាន​ដំបូង ជូនសហគមន៍តំបន់ការពារធម្មជាតិព្រៃធំអន្លង់ធំ ដែលការសាង​សង់​នឹង​ចាប់​ផ្តើម​នៅ​ថ្ងៃ​ចន្ទ ទី០២ ខែធ្នូ ឆ្នាំ២០២៤ ដើមសប្តាហ៍ក្រោយនេះ។ តង់ស្នាក់សម្រាប់ទេសចរណ៍ សាង​សង់ឡើងតាមរចនាបទខ្មែរ និងមានលក្ខណៈទំនើប មានអនាម័យ សោភ័ណភាពស្អាត ការ​លំហែ​កម្សាន្ត ប្រកបដោយសុខុដុមរមនាជាមួយធម្មជាតិ សម្រាប់ឱ្យភ្ញៀវជាតិ ឬអន្តរជាតិ ដែល​មក​កម្សាន្ត​ បោះតង់ និងដើរទស្សនាជុំវិញព្រៃសហគមន៍ តំបន់ទីទួលបុរាណ ប្រាសាទបុរាណ កន្លែង​វប្បធម៌ ប្រវត្តិសាស្រ្ត និងតំបន់ទេសភាពធម្មជាតិផ្សេងទៀត លើខ្នងភ្នំគូលែន។

លោក ញ៉ន ម៉ុច សមាជិកសហគមន៍តំបន់ការពារធម្មជាតិព្រៃធំអន្លង់ធំ បានថ្លែងអំណរ​គុណ​ដល់​ឯកឧត្តម​រដ្ឋមន្រ្តីក្រសួងបរិស្ថាន ដែលបានផ្តល់​ការ​គាំទ្រ​ និង​ជំរុញ​ការ​អភិវឌ្ឍ​សេដ្ឋកិច្ច​របស់​ប្រជា​សហគមន៍ ដែលពីមុនធ្លាប់ពឹងលើព្រៃឈើ ងាកមកពង្រឹងមុខរបរសេវាកម្មទេសចរណ៍។ លោក​សង្ឃឹម​ថា​ជីវភាពរបស់ប្រជាសហគមន៍លើខ្នងភ្នំ និងត្រូវបានពង្រឹងនិងពង្រីក នៅពេលមាន​សមិទ្ធផល​ថ្មី​ដូចជាកន្លែងបោះតង់ និងផ្ទះតង់សម្រាប់ទេសចរអាចមកស្នាក់ លំហែកម្សាន្ត យ​បច្ចុប្បន្ននេះមានភ្ញៀវចាប់អារម្មណ៍ច្រើន។ លោក ញ៉ន ម៉ុច បានបញ្ជាក់ថា ប្រជាពលរដ្ឋ ដែល​រស់​នៅ​ក្នុង​សហគមន៍ បានខិតខំរួមគ្នាទប់ស្កាត់ការកាប់បំផ្លាញព្រៃឈើ និងបានចូលរួម​ដាំ​ដើម​ឈើ​ឡើង​វិញ​ដើម្បី​បង្កើនគម្របព្រៃឈើផងដែរ។

គួរបញ្ជាក់ឱ្យដឹងថា ក្រសួងបរិស្ថាន បាននិងកំពុងអភិវឌ្ឍគោលដៅលំហែបៃតង នៅតាម​សហគមន៍​តំបន់ការពារធម្មជាតិ ស្របតាមគោលនយោបាយ និងយុទ្ធសាស្រ្ត​របស់​រាជ​រដ្ឋាភិបាល​កម្ពុជា​ ហើយយុទ្ធសាស្រ្តចក្រាវិស័យបរិស្ថាន បានកំពុងធ្វើឱ្យសហគមន៍មានចំណូលបន្ថែម និង​បង្កើត​ជម្រើស​ថ្មី សម្រាប់ការប្រកបមុខរបរចិញ្ចឹមជីវិត ដោយផ្តល់ចំណេះដឹង ជំនាញ និង​មុខ​របរ​ថ្មី ដូចជាការចិញ្ចឹមសត្វ ការដាំដំណាំរួមផ្សំផ្សេងទៀត សម្រាប់ប្រើប្រាស់ប្រចាំថ្ងៃផង និង​សម្រាប់​លក់​នៅ​លើ​ទីផ្សារផងដែរ ព្រមទាំងជួយរៀបចំបង្កើតជាអេកូទេសចរណ៍ នៅក្នុងតំបន់​សហគមន៍​។ ​ជាមួយគ្នានេះ ក្រសួងបរិស្ថាន បានជំរុញការបណ្តុះនិងចែកកូនឈើទៅដាំឱ្យបានច្រើន យ៉ាង​តិច​១​លាន​ដើម ធានាការពង្រឹងការអភិរក្ស និងការគ្រប់គ្រងធនធានធម្មជាតិនិងវប្បធម៌ ភាព​ស្អាត​ ភាពបៃតង ការបន្ស៉ាំនឹងការប្រែប្រួលអាកាសធាតុ ព្រមទាំងការលើកកម្ពស់សន្តិសុខស្បៀង អាហា​រូ​បត្ថម្ភ តម្លៃនៃបេតិកភណ្ឌធម្មជាតិ វប្បធម៌ និងប្រពៃណីទំនៀមទម្លាប់ និងការ​រស់​នៅ​ស្អាត​របស់​ប្រជា​សហគមន៍ ជាពិសេសការបង្កើនប្រាក់ចំណូលពីទេសចរណ៍ធម្មជាតិនិងវប្បធម៌ និង​ជម្រើស​មុខ​របរសមស្រប ដើម្បីអនាគតភាពជាម្ចាស់របស់សហគមន៍៕