មន្ទីររៀបចំដែនដីខេត្តពោធិ៍សាត់ផ្សព្វផ្សាយកំណត់តំបន់វិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធក្នុងឃុំតាលោ

បងប្អូនប្រជាពលរដ្ឋជាតំណាងគ្រួសារ និងអ្នកពាក់ព័ន្ធ បានអញ្ជើញចូលរួមប្រជុំផ្សព្វផ្សាយ ប្រកាស​កំណត់តំបន់វិនិច្ឆ័យចុះបញ្ជីដីធ្លីមានលក្ខណៈ ជាប្រព័ន្ធទាំង២១ភូមិក្នុងឃុំតាលោ ស្រុក​តាលោ​សែនជ័យ ខេត្តពោធិ៍សាត់ ដោយពិធីនេះបានប្រារព្ធធ្វើនៅសាលាឃុំ ដែលរៀបចំឡើង​ដោយ​មន្ទីរ​រៀប​ចំដែនដី នគរូបនីយកម្ម សំណង់និង សុរិយោដីខេត្តពោធិ៍សាត់។

លោក សួង សែ អនុប្រធានមន្ទីររៀបចំដែនដីនគរូបនីយកម្មសំណង់ និង សុរិយោដីខេត្ត​បាន​ឱ្យ​ដឹង​ថា ដើម្បីពន្លឿន​ក្នុង​ការ​ចុះ​បញ្ជីដីធ្លី​មាន​លក្ខណៈ​ជា​ប្រព័ន្ធ​ជូន​ប្រជាពលរដ្ឋ​ទាំង​២១​ភូមិ​ក្នុង​ឃុំ​តាលោ ស្រុកតាលោសែនជ័យ ទទួលបាន​លទ្ធផលល្អប្រសើរ និង​ឈាន​ទៅ​បញ្ចប់​ដំណាច់​ឆ្នាំ២០២៤​នោះ ក្នុង​មន្ទីរ​​ជំនាញ​សូម​ឱ្យ​ព​លដ្ឋ និង​អ្នក​ពាក់​ព័ន្ធ​ស្ថិត​ក្នុង​តំបន់​ធ្វើកា​រ​វិនិច្ឆ័យ​ចុះ​បញ្ជី​ដីធ្លីមានលក្ខណៈជាប្រព័ន្ធទាំងដីកសិកម្ម និង​ដីលំនៅឋាន​ត្រូវ​ចូល​រួម​សហការ​ជា​មួយ​មន្ត្រី​បច្ចេកទេសទាំង៥ដំណាក់កាលកុំឱ្យខាន បើមិនដូច្នេះទេ ក្រុមការងារមិន​ទទួល​ខុស​ត្រូវ​ឡើយ​។

លោកបានបញ្ជាក់ថាបន្ទាប់ពីប្រជុំប្រកាសនេះរួចក្រុមការងារបច្ចេកទេស ចាប់ផ្តើម​ចុះ​វាស់​វែង និង​ប្រមូលទិន្នន័យ ស្របតាមអនុក្រិត្យលេខ៤៦ អនក្រ.បក.ចុះថ្ងៃទី៣១ ខែឧសភា ឆ្នាំ ២០០២ របស់រាជ រដ្ឋាភិបាលកម្ពុជា ស្តីពីនីតិវិធីនៃការកសាងប្លង់សុរិយោដីនិងសៀវភៅគោល បញ្ជី​ដីធ្លី។ ដូចនេះសូមប្រជាពលរដ្ឋនិងអ្នកពាក់ព័ន្ធក្បាលដី ត្រូវបោះបង្គោលកំណត់ព្រុំ ក្បាល​ដី​របស់​ខ្លួន បើមានវិវាទ ឬទំនាស់ត្រូវដោះស្រាយឱ្យបានរួចរាល់ និងធ្វើការបែង​ចែក​ដល់​កូន​ចៅ​ដែល​គ្រប់​អាយុ ដោយភ្ជាប់មកជាមួយសៀវភៅគ្រួសារ អត្តសញ្ញាណបណ្ណ និងឯកសារ​ផ្សេងៗ​មួយ​ចំនួន​ទៀត។

លោក ឈ ម៉ៅ អភិបាលរងស្រុក បានថ្លែងនិងសង្ឃឹមយ៉ាងម៉ុតមាំថា បងប្អូ​ន​ប្រជា​ពលរដ្ឋ​ជា​ម្ចាស់​ដី​ និងអ្នកពាក់ព័ន្ធស្ថិតក្នុងតំបន់វិនិច្ឆ័យពិតជាអនុវត្ត​ទៅ​តាម​អនុក្រឹត្យ​របស់​រាជ​រដ្ឋាភិបាល​ និង​សេចក្តី​ប្រកាស​របស់រដ្ឋបាលខេត្ត ពិតជាចូលរួមបំពេញការតព្វកិច្ចជាមួយមន្ត្រីជំនាញ អាជ្ញាធរ​មូល​ដ្ឋាន​ទាំង៤ដំណាក់កាល ។ ដើម្បីអនុវត្ត ទៅតាមខ្លឹមសារអនុក្រឹត្យ និងសេចក្តីប្រកាសនោះ គណៈកម្មការរដ្ឋបាលសូមឱ្យប្រជាពលរដ្ឋជាម្ចាស់ដី អ្នកពាក់ព័ន្ធនានាចូលរួមស្តាប់ ពន្យល់​ណែនាំ​បំភ្លឺ​ពីមន្ត្រីជំនាញ ។ ម្ចាស់ដី និង​អ្នក​ពាក់ព័ន្ធ​ត្រូវ​បំពេញ​កាតព្វកិច្ច​ក្នុង​ការ​ចូលរួ​មបោះប​ង្គោល​កំណត់​ព្រំក្បាលដីម្ចាស់និមួយៗបើមានករណីទំនាស់ត្រូវសម្របសម្រួល ិងដ្រាយ គប្បីរក្សាុកបឹង ប៊ួ ព្រែក ផ្លូវ ច្រក់ ទ្រព្យសាធារណៈរបស់រដ្ឋ ឬទ្រព្យសម្បត្តិឯកជនរបស់រដ្ឋ សម្រា​ប់​ការអភិវឌ្ឍន៍នាពេលខាងមុខ។ លោកបានជម្រាបជូនថា ការចុះបញ្ជីដីធ្លី មាន​លក្ខណ​ជាប្រព័ន្ធ គឺជាផ្នែកមួយ ក្នុងចំណោម កិច្ចការជាច្រើន របស់រាជរដ្ឋភិបាល ដែល​បង្ហាញ​ពី​ការ​យក​ចិត្តទុកដាក់ ចំពោះប្រជាពលរដ្ឋនិងបង្កើនសុវត្ថិភាពលើការ កាន់កាប់ ប្រើប្រាស់ គ្រប់គ្រង បែង​ចែក​ដីធ្លីនិងសិទ្ធិសេរីភាពក្នុងការអភិវឌ្ឍន៍សេដ្ឋកិច្ចគ្រួសារ ។

សូមបញ្ជាក់ថា ភូមិទាំង២២ក្នុងនោះ ភូមិសំសាន្តបានចុះបញ្ជីតាមបទបញ្ជាលេខ០១រួចមកហើយ និង​នៅសល់ ២១ភូមិគឺភូមិគោករំល ភូមិទួលទទឹង ភូមិទួលថ្ម ភូមិបួរច្រេស ភូមិព្រៃរោង ភូមិ​តាលោ ភូមិថ្មី ភូមិទួលជ្រាវ ភូមិព្រៃតោ ភូមិបឹងកក់ ភូមិព្រៃវាំង ភូមិសេរីគន្ធា ភូមិត្រយ៉ងស ភូមិ​ឆ្នា​ល់​មាន់ ភូមិព្រៃកន្ទួត ភូមិតាំងគោក ភូមិបោសគ ភូមិប្រហាល ភូមិរហាលទិល ភូមិកោះស្វាយ និង​ភូមិកោះវត្ត ត្រូវបានប្រកាសកំណត់តំបន់វិនិច្ឆ័យចុះបញ្ជីដីធ្លីនាពេលនេះ៕