ការប្រមូលផលនេសាទសមុទ្រខេត្តកំពតឆ្នាំ២០២៤ បានជាង១ម៉ឺន៦ពាន់តោន មិនមានការថយចុះទេបើធៀបនឹងឆ្នាំ២០២៣

នាយខណ្ឌរដ្ឋបាលជលផលខេត្តកំពត បានបញ្ជាក់ថា ការងារនេសាទសមុទ្រខេត្តកំពត នៅ​តែ​មាន​ដំណើរ​ការល្អ ដោយសារមានការចូលរួមសហការគ្នាពីគ្រប់ភាគីពាក់ពាក់ព័ន្ធ ក្នុង​ការគោរព​ច្បាប់ និងការចូលរួមអភិរក្ស កាត់បន្ថយបទល្មើសនេសាទ ធ្វើឲ្យធនធាន​សមុទ្រ​មាន​ការ​ថយ​ចុះ​យឺត​ខ្លាំង ជាក់ស្តែងឆ្នាំ២០២៤នេះ ខេត្តកំពតប្រមូល​ផល​នេសាទ​សមុទ្របា​ន​ជាង​១​ម៉ឺន​៦​ពាន់​តោន​ គឺមិនមានការថយចុះទេ បើធៀបនឹងឆ្នាំ២០២៣កន្លងទៅ។

នាយខណ្ឌរដ្ឋបាលជលផល លោក ស សុរិន បានប្រាប់ឲ្យដឹងថា ក្រោមការ​ចង្អុល​បង្ហាញ​ពី​ថ្នាក់​ដឹកនាំ​ក្រសួង ថ្នាក់ដឹកនាំខេត្ត ពិសេសប្រធានមន្ទីរកសិកម្ម រុក្ខាប្រមាញ់ និងនេសាទខេត្ត មន្ត្រី​ខណ្ឌ​រដ្ឋបាលជលផល របស់លោកបានខិតខំយកចិត្តទុកដាក់យ៉ាងខ្លាំងលើកងារងារ ផ្សព្វផ្សាយ​អប់រំ​​ច្បាប់ដល់ប្រជានេសាទ ការងារអភិរក្សធនធានសមុទ្រ បង្កើនការងារចុះល្បាត កាត់បន្ថយ​នូវ​បទ​ល្មើសនេ​សាទ ធ្វើឲ្យធនធានសមុទ្រមាននិរន្តរភាព និងមានស្ថានភាពល្អប្រសើរ ហើយ​បង​ប​​ប្រជានេសាទ អាចបន្តមុខរបរនេសាទដើម្បីផ្គត់ផ្គង់ជីវភាពគ្រួសារបានយ៉ាងសមរម្យ។

លោកនាយខណ្ឌរដ្ឋបាលជលផលបានឲ្យដឹងថា សម្រាប់ឆ្នាំ២០២៤នេះ ការ​ប្រមូល​ផល​នេសាទ​សមុទ្រ​សរុប​ចំនួន ១៦ ៥៣៩តោន ដែលចំនួននេះប្រហាក់​ប្រហែល​នឹង​ផល​នេសា​ទ​សមុទ្រ​ឆ្នាំ​២០២៣​។ លោកបញ្ជាក់ថា ការមិនធ្លាក់ចុះនៃ ផលនេសាទសមុទ្រនេះ ដោយសារ ទី១. ការចូល​រួម​ដាំ និងពង្រីកផ្ទៃដីព្រៃដើមកោងកាងបន្ថែម, ឆ្នាំ២០២៤ ការងារ​បណ្តុះ​កូន​កោង​កាង​បាន​៣៥០០​០​ដើម ហើយបានដាំជិត៥ម៉ឺនដើម (បូកកូនកោងកាងសល់ពីឆ្នាំចាស់) ទី២. ការងារ​អភិរក្ស, រដ្ឋបាលជលផលមានកិច្ចសហការល្អជាអាជ្ញាធរដែនដី អង្គការដៃគូក្រៅរដ្ឋាភិបាល បាន​រៀប​ចំតំបន់ការពារ ជ្រូកទឹក ផ្សោតសមុទ្រ អណ្តើកសមុទ្រ ត្រីសេះសមុទ្រ នៅ​តាម​សហគមន៍ ដូចជា សហគមន៍ត្រពាំងសង្កែ ព្រែកត្នោត ត្រពាំងរពៅ និងសហគមន៍ចង្ហោន។ ទី៣.​ការពារបទល្មើសនេសាទ, ការចូលរួមល្បាតតាមដែននេសាទសហគមន៍ ក៏ដូច​ជា​ដែន​ការ​ពារ​ជល​ផល​ជាប្រចាំ និងបានសហការជាមួយអង្គការអភិរក្សសមុទ្រកម្ពុជា (MCC) ទម្លាក់​ប្រអប់​សិប្បនិម្មិត (ប្រអប់បេតុង) នៅតាមតំបន់សំខាន់ៗ ដែលជាជម្រកសត្វកម្រ បានមួយចំនួន ហើយ​បន្តបោះបង្គោលបេតុង និងទម្លាក់ប្រអប់សិប្បនិមិត្តបន្ថែមទៀត ដើម្បីការពារ ការលួច​ចូល​មក​នេសាទ​ដោយ​ប្រើទូកធំៗ នៅក្នុងតំបន់ហាមឃាត់។

ជាលទ្ធផលឃើញថា ប្រភេទសត្វកម្របានវិលត្រឡប់មកវិញ ដូចជា​ផ្សោត​ផ្កាឈូក​កើន​ឡើង​ដល់​ជាង​៧០​ក្បាល ផ្សោតក្បាលត្រឡោកកើនប្រហែលជា៥០ក្បាល និងលេចចេញ​វត្តមាន​ផ្សោត​អត់​ព្រុយ​ខ្នង​ជាច្រើនផងដែរ នៅសហគមន៍ព្រែកត្នោត ត្រពាំងរពៅ និងចង្ហោន ។ ខណៈដែល​ក្រុម​ការងារ​សិក្សា​ស្រាវជ្រាវសត្វផ្សោតរបស់អង្គការអភិរក្សសមុទ្រកម្ពុជា បានប្រទះឃើញ​សត្វ​ផ្សោត​សរុប​ចំនួន​ជាង១៧០ក្បាល នៅសហគមន៍ព្រែកត្នោត។

ខេត្តកំពតមានស្មៅសមុទ្រចំនួន១១ប្រភេទលើផ្ទៃបាតសមុទ្រ៨ ៤កត ្កាថ្ម​៩៥៣​ហិកតា ព្រៃកោងកាង១៩៦៦ហិកតា និងទីតាំងអភិរក្សមានចំនួន ១៣កន្លែង។ កត្តាទាំង​នេះហើ​យ​ដែល​ជួយឲ្យការងារនេសាទ នៅតែមាននិរន្តរភាព ហើយការងារនេសាទ ជាផ្នែកមួយយ៉ាង​សំខាន់ ជួយលើកកម្ពស់សេដ្ឋកិច្ចខេត្ត និងប្រជាជនពលរដ្ឋ៕