​អ្នកនាំពាក្យក្រសួងបរិស្ថានស្ថានភាពគុណភាពខ្យល់នៅកម្ពុជាមិនទាន់បង្កហានិភ័យដល់សុខភាពសាធារណៈនៅឡើយទេ

ភ្នំពេញ៖ ឯកឧត្តម ខ្វៃ អាទិត្យា អ្នកនាំពាក្យក្រសួងបរិស្ថាន បញ្ជាក់ប្រាប់ BTV នៅព្រឹកថ្ងៃទី២៣ ខែមករា ឆ្នាំ ២០២៥នេះ ថា ស្ថានភាពគុណភាពខ្យល់នៅកម្ពុជា កម្រិតនៃការបំពុលមិនទាន់ឈានដល់ការបង្កហានិភ័យធ្ងន់ធ្ងរដល់សុខភាពនៅឡើយទេ។

ឯកឧត្តម ខ្វៃ អាទិត្យា បានឱ្យដឹងថា តាមទិន្នន័យដែលតទួលបានពីឧបករណ៍ និងស្ថានីយតាមដានត្រួតពិនិត្យគុណភាពខ្យល់នៅក្នុងព្រះរាជាណាចក្រកម្ពុជា បានបង្ហាញអំពី ការធ្លាក់ចុះគុណភាពខ្យល់គួរឱ្យកត់សម្គាល់នៅអំឡុងពេលប៉ុន្មានថ្ងៃនេះ ជាពិសេសការកើនឡើងកំហាប់ភាគល្អិតនិចលដែលមានវិជ្ឈមានតូចជាងឬស្មើ ២,៥ មីក្រូម៉ែត្រ (PM2.5) នៅក្នុងបរិយាកាស។

ឯកឧត្តមបានឱ្យដឹងថា ការធ្លាក់ចុះគុណភាពខ្យល់នេះ មានប្រភពមកពីការបញ្ចេញផ្សែងពីយានយន្ត រោងចក្រ ឧស្សាហកម្ម ការដុតសំណល់កសិកម្ម គល់ជញ្ជាំង ភ្លើងឆេះព្រៃ ការផុតសំរាម សំណល់រឹងនៅតាមលំនៅដ្ឋាន និងប្រភពផ្សេងៗទៀត រួមផ្សំនឹងកត្តាប្រែប្រួលធាតុអាកាស។

បើតាមឯកឧត្តម ខ្វៃ អាទិត្យា ថ្វីត្បិតមានការកើនឡើងនូវកំហាប់ភាគល្អិតនិចល PM 2.5 នៅក្នុងបរិយាកាស ក៏ប៉ុន្តែកម្រិតនៃការបំពុលខ្យល់នៅកម្ពុជា គឺមិនទាន់ឈានដល់ការបង្កហានិភ័យធ្ងន់ធ្ងរដល់សុខភាពនៅឡើយ។

ក្នុងន័យនេះក្រសួងបរិស្ថានក៏បានអំពាវនាវដល់ប្រជាពលរដ្ឋទាំងអស់ បញ្ឈប់ការដុតសំណល់កសិកម្ម គល់ជញ្ជាំង សំរាម សំណល់រឹង ការដុតទន្ទ្រានដីព្រៃ និងសកម្មភាពផ្សេងៗទៀតដែលអាចធ្វើឱ្យគុណភាពខ្យល់មានការធ្លាក់ចុះ និងសូមធ្វើការតាមដាន និងការពារសុខភាពដោយត្រូវអនុវត្តវិធានការមួយចំនួនដូចជា ១-កាត់បន្ថយសកម្មភាពខាងក្រៅ និងជៀសវាងស្ថិតនៅទីកន្លែងដែលមានមនុស្សច្រើនកុះករ។ ២-ប្រើប្រាស់ឧបករណ៍ការពារផ្លូវដង្ហើម ដូចជាការពាក់ម៉ាសដែលអាចការពារលម្អងធូលីតូចៗបាន។ ៣-ប្រសិនបើមានស្ថានភាពសុខភាពដូចជា ការក្អក ការពិបាកដកដង្ហើម ឈឺទ្រូង ឈឺក្បាល ចង្វាក់ បេះដូងដើរខុសប្រក្រតី ក្អួតចង្អោរ អស់កម្លាំង គួរតែពិគ្រោះជាមួយវេជ្ជបណ្ឌិត។

ឯកឧត្តមបញ្ជាក់ថា ក្រសួងបរិស្ថាននឹងធ្វើការតាមដានអំពីការប្រែប្រួលស្ថានភាពគុណភាពខ្យល់ និងជូនដំណឹងអំពីស្ថានភាព គុណភាពខ្យល់នៅក្នុងកម្ពុជា ជូនសាធារណជនបានជ្រាបជាប្រចាំ និងអំពាវនាវដល់ពលរដ្ឋធ្វើការតាមដាន ព័ត៌មានផ្លូវការដែលក្រសួងបានរចេញផ្សាយ៕