ឆ្នាំសិក្សាថ្មី២០២៥ ក្រសួងការងារផ្តល់អាហារូបករណ៍​បណ្តុះបណ្តាលជំនាញ​វិជ្ជាជីវៈជាង ៦ម៉ឺនកន្លែង

មន្រ្តីជាន់ខ្ពស់នៃក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា អាហារូបករណ៍​សម្រាប់​កម្ម​វិធីបណ្តុះបណ្តាលជំនាញបច្ចេកទេស និងវិជ្ជាជីវៈសម្រាប់ឆ្នាំ២០២៥ ខាងមុខនេះ​នឹង​ផ្តល់​ជូន​សិស្ស​និស្សិត​ចំនួនសរុប ៦៧,៣០០កន្លែង។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះ​បណ្តាល​វិជ្ជាជីវៈ​បាន​ឲ្យ​ព័ត៌មាន ប៊ីធីវី ដឹងថា ការផ្តល់អាហារូបករណ៍សម្រាប់ឆ្នាំសិក្សាថ្មីសម្រាប់ឆ្នាំ២០២៥ ខាង​មុខ​នេះ​កម្រិត​បណ្តុះបណ្តាលមានចំនួន២កម្មវិធី ដូចជា ១.កម្មវិធីបណ្តុះបណ្តាលរយៈពេលវែងផ្តល់ជូនចំនួនសរុប ៦០,៥០០ កន្លែងរួមមាន៖ សញ្ញាបត្រ​ជាន់​ខ្ពស់​បច្ចេកទេស (ឆ្នាំទី១), សញ្ញាបត្រជាន់ខ្ពស់បច្ចេកទេស (ឆ្នាំទី២), សញ្ញាបត្រ​បច្ចេក​ទេស និងវិជ្ជាជីវៈ៣ , សញ្ញាបត្របច្ចេកទេស និងវិជ្ជាជីវៈ២ និងសញ្ញាបត្របច្ចេកទេស និង​វិជ្ជាជីវៈ​១។ ដោយឡែក ទី២. គឺកម្មវិធីបណ្តុះបណ្តាលរយៈពេលខ្លី ផ្តល់ជូនអាហារូបករណ៍ចំនួន ៦,៨០០​កន្លែង រួមមាន ស្ពានចម្ងបន្តជំនាញចំនួន ៥០០កន្លែង និងមូលនិធិជាតិ​បណ្តុះ​បណ្តាល​ដើ​ម្បីកាត់បន្ថយភាពក្រីក្រចំនួន ៦,៣០០កន្លែង។

ទាក់ទិនការផ្តល់​អាហារូករណ៍នេះដែរ ឯកឧត្តម ជិន តារ៉ា នាយកវិទ្យាស្ថានបច្ចេក​ទេស​ឧស្សាហ​កម្ម (ITI) ស្ថិតនៅតំបន់ទឹកថ្លា ខណ្ឌសែនសុខ ដែលស្ថិតក្រោមឱវាទរបស់ក្រសួងការងារ និង​បណ្តុះ​បណ្តាលវិជ្ជាជីវៈ បានអំពាវនាវដល់យុវជនបោះបង់ការសិក្សា ឬមិនមាន​សមត្ថភាព​បន្ត​ការ​សិក្សា​ជា​ដើម ជាពិសេសសិស្សានុសិស្សដែលទើបបញ្ចប់ថ្នាក់ទី១២ (បាក់ឌុប) ប្រសិនបើ ទទួល​បាន​លទ្ធផលមិនល្អ សុំកុំអស់សង្ឃឹម ពីព្រោះរដ្ឋាភិបាល​បាន​ផ្តល់​ឱកាស​ឲ្យ​ចុះ​ឈ្មោះ​មក​ចូល​រៀន​គ្រប់គ្រឹះស្ថានបណ្តុះបណ្តាលទាំងអស់ ក្រោមឱវាទក្រសួងការងារចំនួន៣៧នៅទូទាំងរាជធានី និយាយដោយឡែក និងនិយាយជារួម សម្រាប់វិទ្យាស្ថាន ITI ក៏ស្វាគមន៍ជានិច្ចចំពោះយុវជនដែលស្រលាញ់ចូលចិត្ត និងមានបំណងចង់រៀនជំនាញបច្ចេកទេស និងវិជ្ជាជីវៈ ខណៈតម្រូវការការងារទីផ្សារក្នុងវិស័យនេះ គឺមានខ្ពស់ទាំងពេលបច្ចុប្បន្ន និងទៅអនាគត។

សូមជម្រាបថា វិទ្យាស្ថានបច្ចេកទេសឧស្សាហកម្ម ហៅកាត់ ITI មានបណ្តុះបណ្តាលជំនាញបច្ចេកទេស និងវិជ្ជាជីវៈផ្សេងៗ គ្នាជាច្រើន មានដូចជា៖ វិស្វកម្ម , មេកានិករថយន្ត, បរិក្ខាត្រជាក់អគ្គិសនី, មេកានិកឧស្សាហកម្ម, ព័ត៌មានវិទ្យា និងបន្ស៊ីលោហៈ។

គួររម្លឹកទៀតថា ក្នុងអាណត្តិទី៧ នៃរដ្ឋសភា ដឹកនាំដោយសម្តេចនាយករដ្ឋមន្រ្តី ហ៊ុន ម៉ាណែត បានដាក់ចេញនូវកម្មវិធីបណ្តុះបណ្តាលជំនាញបច្ចេកទេស និងវិជ្ជាជីវៈ កម្រិតសញ្ញាបត្របច្ចេកទេសនិងវិជ្ជាជីវៈ១ ដល់យុវជនមកពីគ្រួសារក្រីក្រ និងងាយរងហានិភ័យចំនួន ១លាន ៥សែននាក់ ដើម្បីជាប្រយោជន៍ដល់យុវជនទទួលបានជំនាញច្បាស់លាស់ និងក្លាយជាផ្នែកមួយដ៏សំខាន់ក្នុងការជំរុញសេដ្ឋកិច្ចជាតិ សំដៅក្លាយជាប្រទេសដែលមានចំណូលមធ្យមកម្រិតខ្ពស់ក្នុងឆ្នាំ២០៣០ និងក្លាយជាប្រទេសដែលមានចំណូល្ពស់ក្នុងឆ្នាំ២០៥០។ កម្មវិធីនេះដែរ នឹងជួយដល់យុវជន ដែលមកពីគ្រួសារមានបណ្ណសមធម៌ និងបណ្ណសម្គាល់គ្រួសារងាយរងហានិភ័យ អាចចូលរៀនដោយមិនបង់ថ្លៃ ព្រមទាំងទទួលបានប្រាក់ឧបត្ថម្ភប្រចាំខែចំនួន ២៨ម៉ឺនរៀល ផងដែរ៕ អត្ថបទដោយ ឈិត បូរ៉ាវី