GDP កម្ពុជាគិតមកដល់បច្ចុប្បន្ន បានកើនឡើងដល់ ៤៣,១ ពាន់លានដុល្លារអាម៉េរិក

ភ្នំពេញ ៖ កម្ពុជាសម្រេចបានផលិតផលក្នុងស្រុកសរុប (GDP) ក្នុងឆ្នាំ ២០០៤ មានប្រមាណ ៥,៣ ពាន់លានដុល្លារអាម៉េរិក ខណៈបច្ចុប្បន្ន បានកើនឡើងដល់ ៤៣,១ ពាន់លានដុល្លារអាម៉េរិក ដោយបានកើនឡើង ៨ ដង ក្នុងនោះកំណើន (GDP) បានស្ថិតក្នុងរង្វង់ ៧%។

​លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម លើកឡើងនៅក្នុងរៀបចំព្រឹត្តិការណ៍ អបអរសាទរខួប ២០ ឆ្នាំ នៃការចូល ជាសមាជិកអង្គការពាណិជ្ជកម្មពិភពលោក (World Trade Organization–WTO) នៅថ្ងៃទី១៤ ខែតុលា ឆ្នាំ២០២៤ នេះថា ក្នុងនាម ជាសមាជិក WTO កម្ពុជាមានសិទ្ធទទួលបាននូវប្រតិកម្មប្រជាជាតិ ដោយទទួលបានភាពអនុគ្រោះបំផុតក្នុងប្រព័ន្ធពាណិជ្ជកម្មពហុភាគី ដូចប្រទេសដែលជាសមាជិកទាំងអស់ផងដែរ។ បន្ថែមពីនេះ នៅមានសមាជិកអភិវឌ្ឍតិចតួចរបស់ WTO កម្ពុជាទទួលបានអត្ថ- ប្រយោជន៍បន្ថែមដូចជា៖ ប្រតិកម្មពិសេស និងដោយឡែក ស្របទីផ្សារដោយមិនជាប់ពន្ធគយ និងមិនជាប់កូតា ក៏ដូចជាវិធានការ អនុគ្រោះមួយចំនួនទៀត ដែលបានដាក់ចេញដោយ WTO ដើម្បីសម្រួលនិងជំរុញដល់ការធ្វើសមាហរណកម្មឱ្យបានពេញលេញ ជាប្រទេសអភិវឌ្ឍតិចតួច ក្នុងប្រព័ន្ធពាណិជ្ជកម្មសកល។

លោកជំទាវ លើកឡើងបន្ថែមថា ក្រៅពីសកម្មភាពខាងលើ, កម្ពុជាក៏ទទួលបាននូវជំនួយបច្ចេកទេសពីសមាជិក WTO និង អង្គការអន្តរជាតិនានា សម្រាប់ការពង្រឹងនិងការធ្វើនៅកំណែទម្រង់ស្ថាប័ន និងច្បាប់ និងបណ្តុះបណ្តាលធនធានមនុស្ស ដើម្បីគាំទ្រ ដល់អនុវត្តកាតព្វកិច្ច និងការអនុវត្តកម្មវិធីកំណែទម្រង់ទាំងឡាយ ដែលកម្ពុជាបានសន្យាក្នុងកញ្ចប់ចូលជាសមាជិករបស់ខ្លួន ក៏ដូចជា អនុវត្តរបៀបវារៈវិស័យពាណិជ្ជកម្មរបស់ខ្លួន ក្នុងគោលបំណងជំរុញឱ្យកម្ពុជាមានសមត្ថភាពទាញយកអត្ថប្រយោជន៍ជាអតិបរិមាពី WTO ។

ចំណែកការធ្វើពាណិជ្ជកម្មអន្តរជាតិ, លោកជំទាវ ចម និម្មល ថ្លែងឱ្យដឹងថា ទំហំពាណិជ្ជកម្មរបស់កម្ពុជាមានប្រមាណ ៤,៥ ពាន់លាន ដុល្លារអាម៉េរិក នៅឆ្នាំ ២០០៤ ក៏បានកើនឡើងជាបន្ដបន្ទាប់ រហូតដល់ ៤៧,៨៨ ពាន់លានដុល្លារអាម៉េរិកនៅឆ្នាំ ២០២៣ ក្នុងនោះ ការនាំចេញសរុបរបស់កម្ពុជា បន្តជាកំណើនវិជ្ជមាន ក្នុងរង្វង់ប្រមាណ ២៣,៤៧ ពាន់លានដុល្លារអាម៉េរិក។ ចំណែកមុខទំនិញនាំចេញ របស់កម្ពុជាក៏ត្រូវបានធ្វើពិពិធកម្មជាបន្តបន្ទាប់ បន្ថែមលើទំនិញសម្លៀកបំពាក់ដែលជាទំនិញនាំចេញចម្បង ជាក់ស្តែងនៅក្នុងឆ្នាំ ២០២៣ ទំហំនៃការនាំចេញនៃទំនិញសំខាន់ៗរបស់កម្ពុជារួមមាន៖ សម្លៀកបំពាក់ មានទឹកប្រាក់ប្រមាណ ៧,៨ ពាន់លានដុល្លារ អាមេរិក, គ្រឿងអេឡិចត្រូនិច និងភាគបង្គុំ ៣,១២ ពាន់លានដុល្លារ, អង្ករ ១,៧២ ពាន់លានដុល្លារ, សម្ភារៈធ្វើដំណើរ ១,៨ ពាន់លាន ដុល្លារ, ស្បែកជើង និងស្រោមជើង ១,៣៦ ពាន់លានដុល្លារ, និងកង់ ៤១៧ លានដុល្លារ៕

អត្ថបទ៖ សុន រ៉ាឌី