និស្សិតសិក្សាជំនាញ ចាត់ទុកវេទិកាជាតិគណនេយ្យ ជាការបង្កើនចំណេះដឹង និងការស្វែង​រកឱកាសការងារ

និស្សិតដែលសិក្សាជំនាញហិរញ្ញវត្ថុ គណនេយ្យ និងសវកម្ម បានចាត់ទុកវេទិកាជាតិគណនេយ្យ គឺ​ជាវេទិកាដ៏មានសារៈសំខាន់ ក្នុងការបង្កើនចំណេះដឹងបន្ថែម ក៏ដូចការ​ស្វែងយ​ល់​នូវ​កាលា​នុវត្តន៍​ថ្មីៗ នៃវិស័យបច្ចេកវិទ្យា និងការស្វែងរកឱកាសការងារជាដើម។

និស្សិតមក​ពីវិទ្យាស្ថាន និងសាកលវិទ្យាល័យផ្សេងៗ ក្នុងរាជធានីភ្នំពេញ លើកឡើងក្នុង​កិច្ច​សម្ភាសន៍​ជាមួយ BTV នៅក្នុង វេទិកាជាតិគណនេយ្យក្រោមកិច្ចពិភាក្សា (សារៈសំខាន់​នៃ​ការ​អភិវឌ្ឍ​ជំនាញ ដើម្បីសម្រេចបាននូវចក្ខុវិស័យកម្ពុជាឆ្នាំ២០៣០) នៅថ្ងៃទី១៨ ខែតុលានេះថា ខណៈ​កម្ពុជាគឺជាប្រទេសដែលកំពុងអភិវឌ្ឍរីកចម្រើន ក្នុងនោះសម្រាប់វិស័យការងារ ក៏មាន​តម្រូវ​ការ​ច្រើន មិនថាការងារលើផ្នែកគណនេយ្យ និងសវកម្មឡើយ ពោលគឺមាន​តម្រូវ​ការ​វិស័យ​ការងារ​មាន​គ្រប់​ផ្នែក និងទៅតាមកម្រិតនីមួយៗ។

និស្សិតទាំងអស់នេះ, លើកឡើងបន្ថែមថា ស្របពេលការវិវត្តន៍រីកចម្រើននេះដែរ ពួកគាត់​បាន​កំពុង​យក​ចិត្តទុករៀនសូត្រ ឱ្យក្លាយទៅជាធនធានពូកែ ដើម្បីចូលរួមក្នុងការអភិវឌ្ឍសេដ្ឋកិច្ច និង​ស​ង្គម ជាក់ស្តែងវេទិកាជាតិគណនេយ្យនៅពេលនេះ ពិតជាមាន សារៈ​សំខាន់​ណាស់​សម្រាប់​ពួក​គាត់​ក្នុង​វ័យសិក្សា ដើម្បីក្រេបយកនូវចំណេះដឹង និងកាលានុវត្តភាពថ្មីៗបន្ថែម ជាពិសេស​ការ​យល់​ដឹង អំពីកិច្ចដំណើររបស់ក្រុមហ៊ុននីមួយៗ សម្រាប់ជាពុទ្ធិឱ្យកាន់តែមានសក្តានុពល ដើម្បី​ឈាន​ទៅ​ចូល​រួម​ក្នុងវិស័យការងារ។

ទាក់និងការសិក្សាជំនាញនេះដែរ, លោក ប៊ុន សន្ទរង្គ នាយកវិទ្យាស្ថានហិរញ្ញវត្ថុ និងគណនេយ្យ លើក​ឡើងថា នៅក្នុង អាណត្តិទី៧ នេះ រាជរដ្ឋាភិបាល​បាន​ដាក់​ចេញ​ក្រប​ខណ្ឌ​គោល​នយោបាយ​សេដ្ឋកិច្ច និងសង្គមឌីជីថលកម្ពុជា ដោយក្នុងនោះសម្រាប់ ការបណ្តុះប​ណ្តាល​ជំនាញ​ក្នុង​វិស័យ​ឯកជន បានកំពុងអនុវត្តទៅតាមប្រព័ន្ធនៃការអប់រំថ្មី តាមបច្ចេកវិទ្យាឌីជីថលរួមមាន៖ ការសិក្សា តាម​ក្របខណ្ឌជាយុទ្ធសាស្រ្ត សេដ្ឋកិច្ច និងសង្គមឌីជីថល, ការរៀបចំតាមបច្ចេកវិទ្យាហិរញ្ញវត្ថុ (Fintech) ជាដើម, ក៏ប៉ុន្តែក៏មិន មែនសិក្សាតែបច្ចេកវិទ្យាសុទ្ធ ដោយមិន​បាន​គិតគូរ​ជំនាញ​នោះ​ឡើយ​។ ការធ្វើបែបនេះ នឹងជំរុញឱ្យនិស្សិតអាចទទួលបានជំនាញផង និងដើរ​ទាន់​បរិបថ​នៃការ​រីក​ច​​ម្រើនផង។

ជុំវិញជំនាញនេះដែរ លោកស្រី នាន បូនី អគ្គនាយករងនៃនិយ័តករគណនេយ្យ និងសវនកម្ម បាន​ថ្លែង​ថា ជុំវិញការបង្កើតធន ធានមនុស្សឱ្យមានសក្តានុពលបែបណានោះ គឺវាផ្សារភ្ជាប់​ទៅ​និ​ង​តម្រូវការទីផ្សារ ។ លោកស្រីបន្តថា ចំពោះតម្រូវការទីផ្សារនេះ ក៏វា ផ្សារភ្ជាប់ទៅនិ​ង​ក្រប​ខណ្ឌ​អាជ្ញា​បណ្ណប្រកបវិជ្ជាជីវៈគណនេយ្យ និងសវនកម្ម ក្នុងនោះចំពោះអាជ្ញាបណ្ណកម្រិត១ ត្រូវមាន​ធនធាន​មនុស្ស, មានគណនេយ្យករជំនាញ ទើបអាចស្នើរសុំអាជ្ញារបណ្ណបាន។ ចំណែក​អាជ្ញា​បណ្ណ​ប្រកបវិជ្ជាជីវៈសវនកម្ម គឺត្រូវមានធនធាន មនុស្សដូចគ្នា ដែលជាសវនករជំនាញ រួមជា​មួ​យ​ប​ទ​ពិសោធន៍ និងលក្ខខណ្ឌតម្រូវផ្សេងទៀតផងដែរ ដែលបញ្ហាទាំងនេះគឺជាក្តីរំពឹង និងការ​ឆ្លើយ​តប​ទៅ​នឹងតម្រូវការទីផ្សារបច្ចុប្បន្ន និងអនាគត៕ អត្ថបទ៖ សុន រ៉ាឌី