សម្ដេចធិបតី៖ ក្រុមប្រឆាំងជ្រុលនិយម បានបំពានមិនទទួលស្គាល់ឧក្រិដ្ឋកម្មប្រល័យពូជសាសន៍ ប៉ុល ពត

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា ក្រុមប្រឆាំងជ្រុលនិយម ព្រោះតែមហិច្ឆិតានយោបាយ បានបរិហារ បំពានលើតថភាពប្រវត្តិសាស្រ្ដ និងគុណតម្លៃមិនអាចកាត់ថ្លៃបាននៃថ្ងៃរំដោះ ៧ មករា ១៩៧៩ ដែលជាថ្ងៃកំណើតទី២ របស់ប្រជាពលរដ្ឋទូទាំងប្រទេស រួមទាំងបងប្អូនខ្មែរអ៊ិស្លាម និងមិនទទួលស្គាល់ឧក្រិដ្ឋកម្មប្រល័យពូជសាសន៍ ប៉ុល ពត ដែលបានកើតឡើងនៅកម្ពុជា។

សម្ដេចធិបតី នាយករដ្ឋមន្រ្ដី មានប្រសាសន៍បែបនេះ ក្នុងឱកាសអញ្ជើញជាធិបតីដ៏ខ្ពស់ខ្ពស់ ពិធីបើកកិច្ចប្រជុំកំពូលអ៊ីស្លាម ក្រោមប្រធានបទ «អ៊ិស្លាម និងពុទ្ធសាសនា» រៀបចំដោយអង្គការសម្ព័ន្ធពិភពឥស្លាម (Muslim World League MWL”) នៅសណ្ឋាគារសុខា រាជធានីភ្នំពេញ ថ្ងៃទី២៧ ខែកុម្ភៈ ឆ្នាំ២០២៥នេះ។

សម្ដេចធិបតី មានប្រសាសន៍បញ្ជាក់ថា ដើម្បីឆ្លើតតបទៅនឹងការព្រួយបារម្ភកាន់តែខ្លាំង ចំពោះក្រុមជ្រុលនិយមមួយចំនួន ដែលបានបន្តបដិសេធព្រឹត្តិការណ៍សម្លាប់រង្គាល ក្នុងរយៈកាលនៃកម្ពុជា ប្រជាធិបតេយ្យ នេះ រាជរដ្ឋាភិបាលកម្ពុជាចាត់វិធានការជាបន្តបន្ទាប់ តាមរយៈការបង្កើតច្បាប់ ស្តីពីការប្រឆាំងការ​មិនទទួលស្គាល់ឧក្រិដ្ឋកម្មដែលប្រព្រឹត្តឡើង​ក្នុងរយៈកាលនៃកម្ពុជា ​ប្រជាធិបតេយ្យ ​ដើម្បីទើបស្កាត់នូវមនោគមវិជ្ជាជ្រុលនិយម, ការកើតឡើង​សារជាថ្មីនៃអំពើប្រល័យពូជសាន៍ទូទាំងពិភពលោក និងការពារតថភាពប្រវត្តិសាស្រ្តដែល​ទទួលស្គាល់​ដោយអន្តរជាតិតាមរយៈអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) ឬសាលាក្ដីខ្មែរក្រហមដែលជាតុលាការកូនកាត់រវាងកម្ពុជា​ និងអង្គការសហប្រជាជាតិ ដែលបាន​កាត់ទោសអតីតមេខ្លោងដឹកនាំរបបកាប់សម្លាប់ខ្មែរក្រហមទាំងឡាយដែលពាក់ព័ន្ធនឹងអំពើសម្លាប់រង្គាល នៅកម្ពុជាពីអតីតកាល។

សូមជម្រាបថា សម័យប្រជុំជាវិសាមញ្ញ ថ្ងៃទី២៦ ខែកុម្ភៈ ឆ្នាំ២០២៥ ឯកភាពទាំងស្រុងលើ​សេចក្ដី​ព្រាងច្បាប់ ស្តីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជា ប្រជាធិបតេយ្យ។ ខណៈសេចក្តីព្រាងច្បាប់នេះ ​មានចំនួន៧មាត្រា ត្រូវបានរៀបចំឡើង ដើម្បីផ្តន្ទាទោស​ចំពោះបុគ្គលទាំងឡាយ ដែលមិនទទួលស្គាល់ ឬសម្រាល ឬបដិសេធ ឬជំទាស់អត្ថិភាពនៃឧក្រិដ្ឋកម្មឬលើកតម្កើងឧក្រិដ្ឋកម្ម ដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យនិងដែលអត្ថិភាពនៃឧក្រិដ្ឋកម្មទាំងនេះ ត្រូវបានទទួលស្គាល់ដោយសេចក្តីសម្រេចស្ថាពរឬនៅក្នុងកិច្ចដំណើរការនីតិវិធីរបស់អង្គជំនុំជម្រះវិសាមញ្ញ ក្នុងតុលាការកម្ពុជា (អ.វ.ត.ក.) ក្នុងគោលបំណងផ្តល់យុត្តិធម៌ដល់ជនរងគ្រោះ និងទប់ស្កាត់កុំឱ្យឧក្រិដ្ឋកម្មទាំងនេះ វិលត្រឡប់មកវិញនៅកម្ពុជា។

គួរបញ្ជាក់ថា សេចក្តីព្រាងច្បាប់នេះ ត្រូវបានរៀបចំឡើងបន្ទាប់ពីទទួលបានអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជានៅថ្ងៃទី២២ ខែឧសភា ឆ្នាំ២០២៤ និងទទួលបានគោលការណ៍ឯកភាពដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានៅថ្ងៃទី២៦ ខែកក្កដា ឆ្នាំ២០២៤ ក្នុងការរៀបចំសេចក្តីព្រាងច្បាប់ថ្មី ជំនួសច្បាប់ចាស់ដែលត្រូវបានប្រកាសឱ្យប្រើដោយព្រះរាជក្រមលេខ នស/រកម/០៦១៣/០១៣ ចុះថ្ងៃទី២៥ ខែមិថុនា ឆ្នាំ២០១៣៕ អត្ថបទ៖ វ៉ន ដារ៉ា