កម្ពុជាបន្តធ្វើបច្ចុប្បន្នភាព និងចងក្រង NDC ៣.០ សម្រាប់ឆ្នាំ២០២៥-២០៣៥

ប្រទេសកម្ពុជាបន្តធ្វើបច្ចុប្បន្នភាព និងចងក្រងផែនការជាតិរួមចំណែកឆ្លើយតបនឹងការប្រែប្រួលអាកាសធាតុដំណាក់កាលទី៣ (NDC 3.០) សម្រាប់ឆ្នាំ២០២៥-២០៣៥ តាមរយៈកិច្ចសន្ទនាស្តីពីសមភាពយេនឌ័រនៅក្នុង NDC 3.0។

កិច្ចសន្ទនាស្តីពីសមាសភាពយេនឌ័រ NDC 3.0 ត្រូវបានធ្វើឡើងនៅថ្ងៃទី២៥ ខែមេសា ឆ្នាំ២០២៥ ស្ថិតនៅសណ្ឋាគារ Hyatt Regency ដោយមានគណៈអធីបតីចូលរួមចំនួន៣រូបរួមមាន៖លោ  កស្រី ចូតសាណា វ៉ាម៉ា ( Jyotsana Varma) នាយិកាធនាគារអភិវឌ្ឍន៍អាស៊ីប្រចាំប្រទេសកម្ពុជា (ADB) ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន និងលោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី។

ថ្លែងក្នុងកិច្ចសន្ទនា លោកស្រី ចូតសាណា វ៉ាម៉ា( Jyotsana Varma) នាយិកាធនាគារអភិវឌ្ឍន៍អាស៊ីប្រចាំប្រទេសកម្ពុជា (ADB) បានស្នើឱ្យមានការផ្ដល់អំណាច និងការសម្រេចចិត្តរបស់ស្ត្រី សម្រាប់ផែនការក្នុងការប្រកបអាជីវកម្ម ការលើកកម្ពស់ជីវភាពរស់នៅ តាមរយៈការលើកកម្ពស់ និងបន្ស៊ាំទៅនឹងការប្រែប្រួលអាកាសធាតុចំពោះវិស័យកសិកម្ម ការទទួលបានហិរញ្ញវត្ថុសម្រាប់គ្រប់គ្រងអាជីវកម្ម និងការប្រកបមុខរបរនានាជាដើម។លោកស្រី បានបន្តថា គោលនយោបាយអាកាសធាតុ ដែលឆ្លើយតបនឹងយេនឌ័រនៅក្នុងផែនការជាតិរួមចំណែកឆ្លើយតបទៅនឹងការប្រែប្រួលអាកាសធាតុ(NDCs) អាចជួយដោះស្រាយវិសមភាពយេនឌ័រជាប្រព័ន្ធ និងនាំទៅរកផលប្រយោជន៍សង្គម និងសេដ្ឋកិច្ចកាន់តែទូលំទូលាយ។

លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានថ្លែងថា ស្ត្រីភាគច្រើនធ្វើការនៅក្នុងសេដ្ឋកិច្ចក្រៅប្រព័ន្ធ ដែលការណ៍នេះទាមទារឲ្យមានការយកចិត្តទុកដាក់ និងដាក់បញ្ចូលបញ្ហារបស់ពួកគាត់ចូលទៅក្នុងផែនការជាតិសម្រាប់រយៈពេល១០ឆ្នាំខាងមុខនេះ។

ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានមានប្រសាសន៍ដែរថា ការដាក់ជូនផែនការជាតិរួមចំណែកឆ្លើយតបទៅនឹងការប្រែប្រួលអាកាសធាតុ ដំណាក់កាលទី៣ (NDC3.0) បានបង្ហាញពីការប្តេជ្ញាចិត្តរបស់កម្ពុជា ក្នុងការកាត់បន្ថយការបញ្ចេញឧស្ម័នផ្ទះកញ្ចក់ និងការបន្ស៊ាំនឹងផលប៉ះពាល់ដែលបណ្តាលមកពីការប្រែប្រួលអាកាសធាតុ។ ឯកឧត្តម បានបញ្ជាក់ថា ក្រសួងបរិស្ថានបានដាក់នូវវិស័យចំនួន៦ សម្រាប់ដាក់ចូលផែនការជាតិរួមចំណែកឆ្លើយតបទៅនឹងការប្រែប្រួលអាកាសធាតុ ដំណាក់កាលទី៣ ២០២៥-២០៣៥ ដែលវិស័យអាទិភាពទាំង៦នោះមានដូចជា៖ វិស័យឧស្សាហកម្មវិស័យថាមពល វិស័យកសិកម្ម វិស័យព្រៃឈើ វិស័យគីមី និងវិស័យសំរាម។

គួរបញ្ជាក់ដែរថា កិច្ចសន្ទនាស្តីពីសមាសភាពយេនឌ័រ NDC 3.0 រៀបចំឡើងក្នុងគោលបំណងសំខាន់ដូចជា៖ចែករំលែកលទ្ធផល ដែលបានមកពីការពិគ្រោះយោបល់ជាមួយក្រសួងទទួលបន្ទុកដឹកនាំតាម វិស័យ ក្នុងការកាត់បន្ថយ ការសម្របខ្លួន និងការងារបង្ករលក្ខណៈ និងការវាយតម្លៃយេនឌ័រ នៃ វិស័យនៃ NDC តាមរយៈការពិនិត្យមើលរបាយការណ៍។ ស្នើ និងផ្តល់អាទិភាពយុទ្ធសាស្ត្រ និងសកម្មភាព ដើម្បីបញ្ជ្រាបយេនឌ័រទៅក្នុងវិស័យនៃ NDC និងបង្ហាញសេចក្តីព្រាងសូចនាករការងារយេនឌ័រការសំខាន់ៗដើម្បីធ្វើការពិភាក្សា និងផ្តល់អាទិភាព។ អត្ថបទ៖ទូច សោភ័ណ