១៥ ឆ្នាំនៃការចុះក្នុងបញ្ជីយូណេស្កូ បណ្ណសារនៅសារមន្ទីរទួលស្លែងកំពុងដើរតួនាទីយ៉ាងសំខាន់​លើឆាកអន្តរជាតិ

បណ្ណសារនៅមន្ទីរស-២១ ត្រូវបានចុះក្នុងបញ្ជីស្មារតីចងចាំរបស់អង្គការ​យូណេស្កូនៅ​ឆ្នាំ២០០៩​។ បើគិតមកទល់នឹងពេលនេះ មានរយៈពេល ១៥ ឆ្នាំហើយ ដែលបណ្ណសារ​នៅ​សារមន្ទីរ​ឧក្រិដ្ឋ​កម្មប្រល័យពូជសាសន៍ទួលស្លែងបានចុះក្នុងបញ្ជីរបស់យូណេស្កូ។ បណ្ណសារនេះកំពុងដើរ​តួនាទី​យ៉ាងសំខាន់​លើឆាកអន្តរជាតិ។

ថ្លែងក្នុងកិច្ចសម្ភាសជាមួយ BTV លោក សុង ភក្ត្រា ប្រធានផ្នែកបណ្ណសារដ្ឋាន នៃ​សារមន្ទីរ​ឧក្រិដ្ឋកម្ម​ប្រល័យ​ពូជសាសន៍ទួលស្លែងបានឱ្យដឹងថា ការដាក់បញ្ចូលបណ្ណសារ​នៅ​សារមន្ទីរ​ឧក្រិដ្ឋកម្ម​ប្រល័យ​ពូជសាសន៍ទួលស្លែងទៅក្នុងបញ្ជីស្មារតីចងចាំរបស់អង្គការយូណេស្កូ ក្រៅពី​ដើម្បី​ឱ្យ​សហគមន៍អន្តរជាតិរួមចំណែកអភិរក្សនោះ, ការដាក់​បញ្ចូល​នេះ​ក៏ដើម្បី​ចង់​បង្ហាញ​ឱ្យ​ពិភពលោក​ដឹងថា បណ្ណសារនៅសារមន្ទីរទួលស្លែងត្រូវបាន​រដ្ឋាភិបាលកម្ពុជាយកចិត្ត​ទុកដាក់​ថែ​រក្សា​ជា​ខ្លាំង និងចង់បង្ហាញឱ្យពិភពលោកបានដឹងថា ព្រឹត្តិការណ៍នៅស-២១ គឺពិតជា​កើត​មាន​នៅកម្ពុជាប្រាកដមែន។

លោកបន្ថែមថា ក្រោយពីបានចុះក្នុងបញ្ជីស្មារតីចងចាំរបស់អង្គការយូណេស្កូរួចមក សហគមន៍​អន្តរជាតិ​មានការយកចិត្តទុកដាក់កាន់តែខ្លាំងចំពោះបណ្ណសារទាំងនោះ ដោយបាន​ផ្ដល់​បន្ថែម​លើ​ការងារបច្ចេកទេសផ្សេងៗ រួមទាំងការបណ្ដុះបណ្ដាលធនធានមនុស្សផងដែរ។

បណ្ណសារ គឺជាសំណល់នៅមន្ទីរស-២១ ដែលគេស្គាល់ជាទូទៅថា គុកទួល​ស្លែង​ក្នុង​នោះ​មាន​ដូចជា រូបថត, ចម្លើយសារភាព និងសំណល់ឯកសារនានាជាដើម។ បណ្ណសារនៅទួលស្លែង ត្រូវ​បាន​ចុះក្នុងបញ្ជីស្មារតីចងចាំរបស់អង្គការយូណេស្កូ នៅថ្ងៃទី៣១ កក្កដា ឆ្នាំ២០០៩៕ ដោយ៖ គង់ ឌិន