ព័ត៌មាន
អន្តរគណៈកម្មការរដ្ឋសភា និងតំណាងរាជរដ្ឋាភិបាល ប្រជុំពិនិត្យពិភាក្សាលើសេចក្តីព្រាងច្បាប់ ស្តីពីការអនុម័តយល់ព្រមឱ្យកម្ពុជាចូលជាភាគី នៃកិច្ចព្រមព្រៀងស្តីពីយានយន្ត បរិក្ខារ និងគ្រឿងបន្លាស់
គណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា (គណៈកម្មការទី៥) ដឹកនាំដោយឯកឧត្តម សួស យ៉ារ៉ា សហការជាមួយគណ:កម្មការទី៩ នៃរដ្ឋសភា រួមជាមួយតំណាងគណៈកម្មការជំនាញផ្សេងទៀតរបស់រដ្ឋសភា បានជួបប្រជុំជាមួយ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងសហការី ដើម្បីពិនិត្យសិក្សាលើសេចក្តីព្រាងច្បាប់ស្តីពី ការអនុម័តយល់ព្រមឱ្យព្រះរាជាណាចក្រកម្ពុជាចូលជាភាគីនៃកិច្ចព្រមព្រៀងស្តីពីការទទួលយកបទប្បញ្ញត្តិបច្ចេកទេសរួម នៃអង្គការសហប្រជាជាតិសម្រាប់យានយន្ត បរិក្ខារ និងគ្រឿងបន្លាស់ ដែលអាចបំពាក់ និង/ឬប្រើប្រាស់ទៅលើយានយន្ត និងលក្ខខណ្ឌសម្រាប់ការទទួលស្គាល់ទៅវិញទៅមកនៃការផ្តល់អនុលោមភាពដោយឈរលើមូលដ្ឋាននៃបទប្បញ្ញត្តិអង្គការសហប្រជាជាតិ។
នៅក្នុងកិច្ចប្រជុំដែលបានធ្វើឡើង នៅវិមានរដ្ឋសភា នារសៀលថ្ងៃទី១៦ ខែកញ្ញា ឆ្នាំ២០២៤ ឯកឧត្តម សួស យ៉ារ៉ា បានមានប្រសាសន៍ថា កិច្ចប្រជុំនាពេល នេះ គឺជាការចែករំលែកធាតុចូលរួមគ្នារវាងគណៈកម្មការរដ្ឋសភា និងតំណាងរាជរដ្ឋាភិបាល នៅក្នុងការពិនិត្យសិក្សាលើសេចក្តីព្រាងច្បាប់ទាំងមូលឱ្យស្របតាមទម្រង់គតិយុត្ត ។ ឯកឧត្តមប្រធានអណៈកម្មការបានបន្តថា សេចក្តីព្រាងច្បាប់នេះគឺមានសារ:សំខាន់ពាក់ព័ន្ធទៅនឹងការប្រើប្រាស់ឯកភាវូបពាណិជ្ជកម្មលើ យថាប្រភេទសម្រាប់ការផលិតយានយន្តថ្មីក្នុងការកាត់បន្ថយចំពោះថ្លៃដើម ការអភិវឌ្ឍ និងដំណើរការសុំលិខិតអនុលោមភាព ព្រមទាំងការនាំចេញទៅកាន់ទីផ្សារអន្តរជាតិដោយមិនមានរនាំងបច្ចេកទេស។
ឯកឧត្តម ប៉េង ពោធិ៍នា បានជម្រាបជូន គណៈកម្មការរដ្ឋសភាថា កិច្ចព្រមព្រៀងស្តីពីការទទួលយកបទប្បញ្ញត្តិបច្ចេកទេសរួមនៃអង្គការសហប្រជាជាតិសម្រាប់យានយន្ត បរិក្ខារ និងគ្រឿងបន្លាស់ ដែលអាចបំពាក់ និង/ឬប្រើប្រាស់ទៅលើយានយន្ត និងលក្ខខណ្ឌសម្រាប់ការទទួលស្គាល់ ទៅវិញទៅមកនៃការផ្តល់អនុលោមភាពដោយឈរលើមូលដ្ឋាននៃបទប្បញ្ញត្តិអង្គការសហប្រជាជាតិ ដែលតទៅនេះ ហៅកាត់ថា កិច្ចព្រមព្រៀងអង្គការសហប្រជាជាតិឆ្នាំ១៩៥៨ ត្រូវបានបង្កើតឡើងក្រោយសង្គ្រាមលោកលើកទី២ នៅពេលដែលវិស័យឧស្សាហកម្មយានយន្តមានការរីកចម្រើនយ៉ាងឆាប់រហ័ស ហើយបទប្បញ្ញត្តិ ស្តង់ដា និង សុវត្ថិភាព ក្នុងចំណោមបណ្តាប្រទេសឧស្សាហកម្មយានយន្ត មានភាពខុសៗគ្នា បណ្តាលឱ្យមានជារបាំង ពាណិជ្ជកម្ម។
ដើម្បីដោះស្រាយបញ្ហាប្រឈមទាំងនេះ នៅថ្ងៃទី២០ ខែមីនា ឆ្នាំ១៩៥៨ កិច្ចព្រមព្រៀងអង្គការ សហប្រជាជាតិឆ្នាំ១៩៥៨ ត្រូវបានចុះហត្ថលេខាដោយប្រទេសជាសមាជិកអឺរ៉ុប ចំនួន៨ រួមមាន បែលហ្ស៊ិក បារាំង អាល្លឺម៉ង់ អ៊ីតាលី លុចសំបួ ហូឡង់ ស៊ុយអែត និងចក្រភពអង់គ្លេស និងបានចូលជាធរមាននៅថ្ងៃទី២០ ខែមិថុនា ឆ្នាំ១៩៥៩។
គិតត្រឹមពាក់កណ្តាលឆ្នាំ២០២៤ រដ្ឋភាគីបានផ្តល់សច្ចាប័នរួចរាល់មានចំនួន ៦៨ប្រទេស។ ប្រទេស ក្នុងតំបន់អាស៊ាន ដែលបានផ្តល់សច្ចាប័នលើកិច្ចព្រមព្រៀងនេះ រួមមាន ម៉ាឡេស៊ី ថៃ ហ្វីលីពីន និងវៀតណាម ហើយប្រទេសសមាជិកមួយចំនួនរួមមាន ឡាវ មីយ៉ាន់ម៉ា សិង្ហបុរី ព្រុយណេ ឥណ្ឌូណេស៊ី ក៏កំពុងតែរៀបចំស្នើសុំ ចូលជារដ្ឋភាគីផងដែរ។ ដោយឡែកព្រះរាជាណាចក្រកម្ពុជា បាននិងកំពុងរៀបចំនីតិវិធីដើម្បីស្នើសុំចូលជារដ្ឋភាគី ឱ្យបានត្រឹមឆ្នាំ២០២៥។
បន្ទាប់ពីតំណាងរាជរដ្ឋាភិបាលធ្វើការបកស្រាយ ឆ្លើយបំភ្លឺលើបញ្ហាមួយចំនួនរួចមក គណៈកម្មការជំនាញនៃរដ្ឋសភា បានសម្រេចឯកភាព បញ្ជូនសេចក្ដីព្រាងច្បាប់នេះ ទៅគណៈកម្មាធិការអចិន្ត្រៃយ៍រដ្ឋសភា ដើម្បីពិនិត្យដាក់បញ្ចូល ក្នុងរបៀបវារៈសម័យប្រជុំរដ្ឋសភា នាពេលខាងមុខនេះ៕

-
កីឡា5 days ago
អ្នកលេងគុនខ្មែរមកពីខេត្តព្រៃវែង លន បញ្ញា ល្អឡើងៗប្រមាណ ១០ប្រកួតចុងក្រោយនេះផ្ដួលដៃគូឲ្យសន្លប់បោះបង់ការប្រកួតមុនបញ្ចប់ទឹករហូត ស្របពេលនេះកំពុងហ្វឹកហាត់យ៉ាងសកម្មបន្តទៀតត្រៀមប៉ះជើងខ្លាំងមកពីប្រទេសអ៊ុយក្រែន។
-
កីឡា1 day ago
ប្រធានសហព័ន្ធប្រដាល់សកល ចាត់ទុកកម្មវិធីអន្ដរក្លិប ជាចលករថ្មី ដើម្បីជំរុញការផ្សព្វផ្សាយ និងអភិវឌ្ឍន៍
-
កីឡា1 day ago
ភ្នំពេញក្រោន ឈរចាំវិសាខា និង Tiffy Army ក្នុងវគ្គ ១/២ ផ្ដាច់ព្រ័ត្រពានសម្ដេចតេជោ-ថ្នាក់ជាតិ
-
ព័ត៌មាន12 hours ago
នាវាកងទ័ពជប៉ុនមានអាទិភាពមុនគេបង្អស់ក្នុងការចូលចតនៅកំពង់ផែរាមបន្ទាប់ពីសាងសង់រួច
-
ព័ត៌មាន12 hours ago
ក្រសួងមុខងារសាធារណៈ និងក្រសួងសេដ្ឋកិច្ចរៀបចំសិក្ខាសាលាពិគ្រោះយោបល់ស្តីពី «ការរៀបចំគុណវុឌ្ឍិ និងការពិពណ៌មុខតំណែងរបស់មន្ត្រីរាជការនៃវិទ្យាស្ថានជាតិស្ថិតិ»
-
ព័ត៌មាន11 hours ago
ឯកឧត្តម ហ៊ុន ម៉ានី៖ ការលាបពណ៌ ការរើសអើង គឺជាប្រភពនៃការបែកបាក់សាមគ្គី ហើយនាំឲ្យជាតិចុះខ្សោយ
-
ព័ត៌មាន11 hours ago
សមាគមអភិវឌ្ឍន៍សង្គមខ្មែរ សហការជាមួយដៃគូក្នុងស្រុកចូលរួមលើកកម្ពស់ផលិតផលខ្មែរ
-
ព័ត៌មាន12 hours ago
មន្រ្តីជំនាញ៖ ច្បាប់ខ្មែរបុរាណយកលំនាំទស្សនវិជ្ជាតាមបែបសាសនាជាពិសេសទស្សនវិជ្ជាពុទ្ធនិយម