ព័ត៌មាន

យុវជន ស.ស.យ.ក នាំយកអំណោយចែកជូនពលរដ្ឋមានជីវភាពខ្វះខាតនៅស្រុកគាល់ក្រឡ

បាត់ដំបង៖ ក្រុមការងារសហភាពសហព័ន្ធយុវជនកម្ពុជា (ស.ស.យ.ក) ខេត្តបាត់ដំបង បាននាំយកអំណោយជាគ្រឿងឧបភោគបរិភោគមួយចំនួន រួមទាំងថវិកា ចែកជូនដល់ប្រជាពលរដ្ឋដែលមានជីវភាពខ្វះខាត រស់នៅក្នុងឃុំព្រះផុស និងឃុំដូនបា ស្រុកគាស់ក្រឡ ។

ក្នុងពេលនាំយកអំណោយចែកជូនពលរដ្ឋ កាលពីថ្ងៃទី២៤ ខែកញ្ញា ឆ្នាំ២០២៤ តាមរយៈឯកឧត្តម ជា ចំណាន អនុប្រធាន ស.ស.យ.ក. ខេត្តបាត់ដំបង តំណាងឯកឧត្តម ស រដ្ឋា ប្រធានសហភាពសហព័ន្ធយុវជនកម្ពុជាខេត្តបាត់ដំបង និងលោកជំទាវ និងមានការចូលរួមពីប្រធាន អនុប្រធាន សមាជិក សមាជិកា យុវជន ស.ស.យ.ក. ស្រុកគាស់ក្រឡជាច្រើនទៀត ។

សម្រាប់អំណោយដែលផ្ដល់ជូនពលរដ្ឋទាំង ២០គ្រួសារ មានអង្ករ ២៥គីឡូក្រាម, មីជាតិ, ទឹកត្រី, ទឹកស៊ីអ៊ីវ, ស្ករស, ប៊ីចេង, អំបិល, ត្រីខ, ទឹកសុទ្ធ និងថវិកាមួយចំនួន ។ បន្ទាប់ពីចែកអំណោយរួចរាល់មក ឯកឧត្តម ជា ចំណាន បានបន្តសំណេះសំណាល និងផ្សព្វផ្សាយឯកសារទស្សនាទានសហភាពសហព័ន្ធយុវជនកម្ពុជា ២.០ ដល់សមាជិក សមាជិកា យុវជន ស.ស.យ.ក. ស្រុក ព្រមទាំងបានចែកជូនឃីត ចំនួន៥០កញ្ចប់ ដល់អ្នកចូលរួមផងដែរ ៕