មនុស្សជាង ២០នាក់បានស្លាប់ ដោយសារព្យុះ John វាយប្រហារលើប្រទេសម៉ិកស៊ិក

អ្នកស្រុកនៅភាគនិរតីនៃប្រទេសម៉ិកស៊ិក កាលពីថ្ងៃសៅរ៍ (២៨ កញ្ញា) បានជម្លៀសចេញពីផ្ទះសម្បែងដែលត្រូវបានជន់លិចដោយសំណល់ព្យុះសង្ឃរា ចន (John) ដែលបានវាយប្រហារតំបន់ឆ្នេរសមុទ្រប៉ាស៊ីហ្វិកអស់រយៈពេលមួយសប្តាហ៍ ដោយនាំមកនូវទឹកជំនន់ និងបំណាក់ដី ដែលបានសម្លាប់មនុស្សយ៉ាងតិច ២២នាក់។

នៅរដ្ឋ ហ្គែរ៉េរ៉ូ (Guerrero) ដែលជាតំបន់រងគ្រោះខ្លាំងជាងគេ និងជារដ្ឋក្រីក្របំផុតមួយរបស់ម៉ិកស៊ិក មនុស្ស ១៨នាក់បានស្លាប់ នេះបើយោងតាមប្រព័ន្ធផ្សព្វផ្សាយក្នុងស្រុក។ នៅភាគខាងត្បូង ប្រព័ន្ធផ្សព្វផ្សាយក្នុងស្រុករាយការណ៍ថា មានមនុស្ស ៣នាក់ស្លាប់នៅរដ្ឋ អ័រហ្សាកា (Oaxaca) ហើយក្មេងប្រុសម្នាក់បានស្លាប់នៅក្នុងទន្លេមួយនៅភាគខាងជើងក្នុងរដ្ឋ មីឆ័រអាកាន់ (Michoacan)។

ព្យុះ John បានពង្រឹងយ៉ាងឆាប់រហ័សទៅជាព្យុះសង្ឃរាដ៏ធំមួយកាលពីថ្ងៃចន្ទសប្ដាហ៍មុន មុនពេលវាយប្រហាររដ្ឋ Guerrero។ ព្យុះនេះបានបាត់បង់កម្លាំង បន្ទាប់មកបង្កើតខ្លួនឡើងវិញនៅតំបន់ឆ្នេរ ហើយបង្កផលប៉ះពាល់ដល់ឆ្នេរភាគខាងជើង ដោយនាំមកនូវភ្លៀងធ្លាក់ខ្លាំង និងទឹកជំនន់។ ព្យុះ John បានចាប់ផ្តើមរលាយបាត់កាលពីថ្ងៃសុក្រ ហើយមិនត្រូវបានចាត់ទុកថាជាព្យុះសកម្មទៀតទេ។

គួររម្លឹកថា កាលពីខែតុលា ឆ្នាំមុន ព្យុះសង្ឃរា អូទីស (Otis) បានវាយប្រហារតំបន់ អាកាពុលកូ (Acapulco) របស់ម៉ិកស៊ិក ជាព្យុះប្រភេទទី៥ ដែលបានបោកបក់យ៉ាងលឿនពីឆ្នេរសមុទ្រ ដោយបានបណ្តាលឱ្យមនុស្សជាង ៥០នាក់ស្លាប់ និងការខូចខាតរាប់ពាន់លានដុល្លារ ប៉ុន្តែកម្រិតទឹកភ្លៀងពីព្យុះ John កើនឡើងជិតបីដង លើសពីកម្រិតទឹកភ្លៀងដែលបានបង្កើតដោយព្យុះ Otis ពីមុននោះ៕