កម្ពុជាប្រារព្ធទិវាជាតិគ្រប់គ្រងគ្រោះមហន្តរាយ ដើម្បីលើកកម្ពស់ការយល់ដឹង នៃការគ្រប់គ្រងគ្រោះមហន្តរាយ

ភ្នំពេញ៖ នៅថ្ងៃទី១៣ ខែតុលា ឆ្នាំ២០២៤ខាងមុខនេះ គណៈកម្មាធិការជាតិគ្រប់គ្រង​គ្រោះ​មហន្តរាយ នឹងរៀបចំប្រារព្ធទិវាជាតិគ្រប់គ្រងគ្រោះមហន្តរាយ រួមជាមួយ​ទិវា​អាស៊ាន​គ្រប់​គ្រ​ង​គ្រោះ​មហន្តរាយ និងទិវាអន្តរជាតិកាត់បន្ថយហានិភ័យគ្រោះមហន្តរាយ ដែលប្រជាជាតិ​នៅ​ទូទាំង​សាកល​លោក រួមគ្នាប្រារព្ធទិវានេះ ដើម្បីលើកកម្ពស់​ការយល់ដឹងអំពីសារៈសំខាន់​នៃ​ការ​គ្រប់គ្រ​ង​គ្រោះ​ម​ហន្តរាយ។

ឯកឧត្តម នាយឧត្តមសេនីយ៍កិត្តិសង្គហបណ្ឌិត គន់ គីម ទេសរដ្ឋមន្រ្តី​ទទួល​បន្ទុក​បេសកកម្ម​ពិសេស និងជាអនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ ក្នុង​ឱកាស​អាន​សារ​លិខិត​របស់​សម្តេចនាយករដ្ឋមន្រ្តី ហ៊ុន ម៉ាណែត នៅព្រឹកថ្ងៃទី១០ ខែតុលានេះ បានឲ្យដឹងថា ប្រធាន​បទសម្រាប់ទិវាអន្តរជាតិកាត់បន្ថយហានិភ័យគ្រោះមហន្តរាយឆ្នាំ២០២៤ គឺ «តួនាទី​នៃ​ការអប់រំក្នុងការការពារ និងផ្តល់អំណាចដល់កុមារសម្រាប់អនាគតដែលគ្មានគ្រោះមហន្តរាយ» ដែ​ល​សំដៅកាត់បន្ថយហានិភ័យ និងការបាត់បង់ជាសាកល។ ឯកឧត្តម បន្តថា រីឯទិវាអាស៊ាន​គ្រប់​គ្រង​គ្រោះមហន្តរាយ នឹងផ្តោតលើមូលបទ «ការកសាងអាស៊ានដែលមានភាពធន់ តាមរយៈ​ការ​ស្តារ​​ឡើងវិញបន្ទាប់ពីគ្រោះមហន្តរាយប្រកបដោយបរិយាបន្ន និងនិរន្តរភាព”។ សម្រាប់កម្ពុជា ការគ្រប់​គ្រងគ្រោះមហន្តរាយ គឺសំដៅការពារការអភិវឌ្ឍន៍ និងសុខុមាលភាពរបស់ប្រជាជន» ត្រូវបានលើកយកជាប្រធានបទសម្រាប់ ទិវាជាតិគ្រប់គ្រងគ្រោះមហន្តរាយក្នុងឆ្នាំ២០២៤នេះ។

ឯកឧត្តម ទេសរដ្ឋមន្រ្តី មានប្រសាសន៍ថា ការប្រែប្រួលអាកាសធាតុ បាននិងកំពុង​ជះឥទ្ធិពល​អវិជ្ជមាន​ដ៏​ធ្ងន់ធ្ងរយ៉ាងជាក់ស្តែងមកលើបរិស្ថានពិភពលោកទាំងមូល និងបានបង្កើន​វត្តមាន​គ្រោះ​មហន្ត​រាយ​ធម្មជាតិកាន់តែញឹកញាប់ និងកាន់តែមានឥទ្ធិពលធំធេងនៅក្នុងប្រទេសជាច្រើន មិន​ថា​​ជា​ប្រទេសមានការអភិវឌ្ឍប្រទេសក្រីក្រទន់ខ្សោយនោះឡើយ ដែល​បាន​ធ្វើ​ឱ្យ​បាត់​បង់​អាយុ​ជីវិត ទ្រព្យសម្បត្តិ ហេដ្ឋារចនាសម្ព័ន្ធសេដ្ឋកិច្ចសង្គមយ៉ាងធ្ងន់ធ្ងរ។ ក្នុងនោះ គ្រាន់តែព្យុះត្រូពិក «យ៉ាជី» មួយ បានបង្កគ្រោះមហន្តរាយធ្ងន់ធ្ងរដល់ប្រទេសចំនួន៥ ក្នុងចំណោមសមាជិកអាស៊ាន ដែល​បានឆក់យកអាយុជីវិតមនុស្សជាច្រើន និងបំផ្លិចបំផ្លាញទ្រព្យសម្បត្តិ ហេដ្ឋារចនាសម្ព័ន្ធ និង​សេដ្ឋកិច្ច​សង្គម គិតជាទឹកប្រាក់អស់រាប់រយពាន់លានដុល្លារ។

ឯកឧត្តម ទេសរដ្ឋមន្រ្តី គន់ គីម បានបញ្ជាក់ឲ្យដឹងទៀតថា ដើម្បីធានាដល់ការ​កាត់​បន្ថយ​ផល​ប៉ះពាល់ នៃគ្រោះមហន្តរាយធម្មជាតិ រាជរដ្ឋាភិបាល ក៏បានរៀបចំផែនការ​សកម្មភាព​ជាតិ​សម្រាប់​ការ​កាត់​បន្ថយហានិភ័យគ្រោះមហន្តរាយឆ្នាំ២០២៤-២០២៨ ដើម្បីបង្កើនប្រសិទ្ធភាព​នៃ​ការ​គ្រប់​គ្រង និងកាត់បន្ថយហានិភ័យគ្រោះមហន្តរាយ ដោយភ្ជាប់ទំនាក់ទំនង រវាងការកាត់​បន្ថយ​ហានិភ័យ​គ្រោះ​មហន្តរាយ និងការបន្សំទៅនឹងការប្រែប្រួលអាកាសធាតុ ដោយបានដាក់​ចេញ​នូវ​គោ​ល​ដៅ​យុទ្ធសាស្ត្រចំនួន៤ និងកម្មវិធីអាទិភាពចំនួន១៨ ដើម្បីអនុវត្ត៕ អត្ថបទ ឈិត បូរ៉ាវី