បើកកិច្ចប្រជុំ ពិនិត្យវឌ្ឍនភាពការងារយុវជនគណបក្សក្រសួងស្ថាប័នទាំង៤២ ប្រចាំត្រីមាសទី៣ ឆ្នាំ២០២៤

នាព្រឹកថ្ងៃទី១២ ខែតុលា ឆ្នាំ២០២៤ គណបក្សប្រជាជនកម្ពុជាថ្នាក់កណ្តាល បានបើកកិច្ចប្រជុំពិនិត្យវឌ្ឍនភាពការងាររបស់ផ្នែកក្រសួង-ស្ថាប័ន នៃយុវជនគណបក្សប្រជាជនកម្ពុជាថ្នាក់កណ្តាល និងក្រុមការងារយុវជនគណបក្សក្រសួង ស្ថាប័នទាំង៤២ប្រចាំត្រីមាសទី៣ ឆ្នាំ២០២៤ ។

កិច្ចប្រជុំពិនិត្យវឌ្ឍនភាពការងារប្រចាំត្រីមាសទី៣នេះធ្វើឡើងក្រោមអធិបតីភាពឯកឧត្តមបណ្ឌិត ជ្រុន ថេរ៉ាវ៉ាត អនុប្រធានយុវជន​គណបក្សថ្នាក់កណ្តាល ​និងជាប្រធានគណៈប្រចាំការ​នៃ​គណៈអចិន្ត្រៃយ៍យុវជន​គណបក្សថ្នាក់កណ្តាល​តំណាងដ៏ខ្ពង់ខ្ពស់សម្តេចមហាបវរធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា និងជាប្រធានយុវជនគណបក្សប្រជាជនកម្ពុជា​ថ្នាក់កណ្តាល ​និងមានការអញ្ជើញចូលរួមពីឯកឧត្តមប្រធាន អនុប្រធាន សមាជិកផ្នែក​ និងឯកឧត្តម លោកជំទាវលោកលោកស្រីប្រធាន អនុប្រធានប្រចាំការ ​ប្រធានលេខាធិការដ្ឋាន ក្រុមការងារ​យុវជនគណបក្សក្រសួង-ស្ថាប័នទាំង៤២ ព្រមទាំងឯកឧត្តម លោកជំទាវ លោក លោកស្រី នាងកញ្ញា ជំនួយការផ្នែកក្រសួង-ស្ថាប័ន សរុបប្រមាណ ២៥០នាក់ទៀតផងដែរ ។

កិច្ចចាប់ផ្តើមនៃអង្គពិធីឯកឧត្តម ឃុត ចាន់ដារ៉ា សមាជិកគណៈកម្មាធិការកណ្តាល និងជា​ប្រធានផ្នែក​ក្រសួង-ស្ថាប័ន នៃ យ.គ.ក. បានលើកឡើងពីកិច្ចខិតខំប្រឹងប្រែងរបស់ថ្នាក់ដឹកនាំផ្នែក ជំនួយការផ្នែក ​និងក្រុមការងារយុវជនគណបក្សក្រសួង -ស្ថាប័នទាំង៤២ ដែលសម្រេចបាន​លទ្ធផល​ការងារជាបន្តបន្ទាប់ ស្របតាមផែនការសកម្មភាពប្រចាំឆ្នាំ ព្រមទាំងគូសបញ្ជាក់ពីតួនាទី​ដ៏សំខាន់​នៃជំនួបប្រចាំត្រីមាសនេះ ដែលបានរួមចំណែក លើកកម្ពស់ និងពង្រឹងកិច្ចសហការល្អ ព្រមទាំងជាវេទិកានៃការចែករំលែកបទពិសោធន៍ ពាក់ព័ន្ធការងារនយាបាយ សតិអារម្មរណ៍ ការចាត់តាំង ដើម្បីថែរក្សា និងពូនជ្រំសមាជិក សមាជិកាទាំងអស់នូវស្មារតី សតិអារម្មណ៍ និងចំណេះដឹង ដោយក្តាប់ឱ្យជាប់នូវគោលនយោបាយ សេចក្តីសម្រេចចិត្តនានា ជឿជាក់ និងហ៊ានការពារមាគ៌ាដឹកនាំដ៏ត្រឹមត្រូវរបស់គណបក្សប្រជាជនកម្ពុជា។

មានមតិវាយតម្លៃអំពីវឌ្ឍនភាពទិសដៅការងារប្រចាំត្រីមាសទី២ ឯកឧត្តម ហេង ណន អនុប្រធានផ្នែកក្រសួង-ស្ថាប័ន នៃ យ.គ.ក. បានរំលឹកឡើងវិញនូវទិសដៅការងារដែលដាក់ចេញ កាលពីថ្ងៃទី១៣ ខែកក្កដា ឆ្នាំ២០២៤ កន្លងទៅ និងបង្ហាញពីលទ្ធផលសម្រេចបាន​គួរជា​ទីមោទនៈរបស់ផ្នែកក្រសួង-ស្ថាប័ន ​និងក្រុមការងារ យុវជនគណបក្សក្រសួង- ស្ថាប័នទាំង៤២ ព្រមទាំងស្នើដល់ក្រុមការងារយុវជនគណបក្សក្រសួង-ស្ថាប័នទាំង៤២ បន្តអនុវត្តន៍​ការងារឱ្យ​បានកាន់តែប្រសើរស្របតាមស្មារតីរបស់អង្គប្រជុំ។

ឯកឧត្តមបណ្ឌិត ជ្រុន ថេរ៉ាវ៉ាត ប្រធានគណៈអធិបតី ​បានពាំនាំ​នូវការសាក សួរ សុខទុក្ខពី​សំណាក់​សម្តេចធិបតីហ៊ុន ម៉ាណែត ដែលជានិច្ចជាកាលសម្តេចតែងតែនឹករលឹក និងគិតគូជាប្រចាំដល់​យុវជនគណបក្សរបស់យើង និងថ្លែងការកោតសរសើរចំពោះ ឯកឧត្តម ឃុត ចាន់ដារ៉ា ប្រធានផ្នែកក្រសួង-ស្ថាប័ន និងឯកឧត្តម ហេង ណន អនុប្រធានផ្នែក ដែលបានរៀបចំកិច្ច​ប្រជុំប្រចាំត្រីមាស ជាជំនួបដ៏មានសារៈសំខាន់ ​និងធ្វើរបាយការណ៍យ៉ាងក្បោះក្បាយ។

ឯកឧត្តមបណ្ឌិត ​មានប្រសាសន៍បន្ថែមទៀតថា កិច្ចប្រជុំនេះ ជាយន្តការពិនិត្យតាមដាន និងវាយ​តម្លៃមួយ ដែលយើងទាំងអស់គ្នាអាចវាយតម្លៃលទ្ធផលសម្រេច​បានលើការអនុវត្ត​ទិសដៅ​ការងារដែលបានដាក់ចេញ ក្នុងកិច្ចប្រជុំប្រចាំត្រីមាសទី២​ កន្លងទៅ និង ដាក់ចេញនូវកិច្ចការ​អាទិភាពបន្តទៀត។

ក្រោមកិច្ចពិភាក្សា ដោយមានការចូលរួមមតិយោបល់ យ៉ាងច្រើនផុសផល ពី ​ឯកឧត្តម លោកជំទាវ លោក លោកស្រី សមាជិក សមាជិកា នៃអង្គប្រជុំ ឯកឧត្តមបណ្ឌិត ជ្រុន ថេរ៉ាវ៉ាត បានធ្វើការ​បូកសរុប និងដាក់ចេញនូវទិសដៅការងារមួយចំនួន ​ដោយផ្តោតសខាន់ទៅលើ-ការពង្រឹងពង្រីក​រចនាសម្ព័ន្ធអង្គការចាត់តាំងយុវជនគណបក្ស -ការបំពាក់បំប៉ន ទស្សនៈ គោលជំហរ​ នយោបាយ សតិអារម្មណ៍ ​និងការចាត់តាំងរបស់យុវជន -លើកទឹកចិត្តយុវជនឱ្យចូលរួមគាំទ្រ និងការពារ​សមិទ្ធផល ស្នាដៃរបស់ គណបក្ស -បន្តពង្រឹងសាមគ្គីភាព និងឯកភាពផ្ទៃក្នុង ដើម្បីលើកកម្ពស់​ប្រសិទ្ធភាពការងារឱ្យកាន់តែល្អប្រសើរបន្ថែមទៀត ៕ អត្ថបទ ៖ លីហេង