ក្នុងឆ្នាំ២០២៥ រដ្ឋបាលខណ្ឌ៧មករាមានគម្រោងជាច្រើនទៀតត្រូវអនុវត្ត ដើម្បីតម្រូវការរបស់ពលរដ្ឋ

រដ្ឋបាលខណ្ឌ៧មករា បានរៀបចំសិក្ខាសាលា សមាហរណកម្ម កម្មវិធីវិនិយោគបីឆ្នាំរំកិល ២០២៥ – ២០២៧ ដើម្បីពិនិត្យការងារសម្រេចបានកន្លងមក និងទិសដៅការងារបន្ត ក្នុងមូលដ្ឋាន ។

កម្មវិធីនេះធ្វើឡើង នៅព្រឹកថ្ងៃទី៣១ ខែតុលា ឆ្នាំ២០២៤នេះ ក្រោមអធិបតីភាព លោក ហ៊ុន សុរិទ្ធី អភិបាលរងរាជធានី តំណាងដ៏ខ្ពង់ខ្ពស់ ឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ លោក ថេង សុថុល អភិបាលខណ្ឌ៧មករា នឹងមានការចូលរួមពីក្រុមប្រឹក្សាខណ្ឌ , មន្ទីរជំនាញជុំវិញរដ្ឋបាលរាជធានី តំណាងដៃគូអភិវឌ្ឍន៍ សប្បុរសជន និងវិស័យឯកជនផងដែរ ។

លោក ថេង សុថុល អភិបាលខណ្ឌ៧មករា បានលើកឡើងថាការរៀបចំសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិល ២០២៥-២០២៧ របស់សង្កាត់ទាំង៨របស់ខណ្ឌ នៅពេលនេះ មានគោលបំណងដើម្បីផ្សព្វផ្សាយគម្រោងវិនិយោគជាអាទិភាពឆ្នាំ២០២៥ របស់រដ្ឋបាលខណ្ឌ សង្កាត់ និងការ ស្នើសុំការគាំទ្រគម្រោង ពីមន្ទីរ អង្គភាពជំនាញ អង្គការ ដៃគូអភិវឌ្ឍន៍នានា វិស័យឯកជន និងសប្បុរសជន ដើម្បីគាំទ្រគម្រោងរបស់សង្កាត់ និងខណ្ឌ។

លោកបន្តថា ជារៀងរាល់ឆ្នាំ នៅតាមសាលាខណ្ឌនីមួយៗ តែងតែបាន រៀបចំសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិលរបស់សង្កាត់ ខណ្ឌ តាមការណែនាំរបស់ថ្នាក់ជាតិ ជារផងរាល់ឆ្នាំ។ សិក្ខាសាលានេះរៀបចំឡើង ស្របតាមផែនការអភិវឌ្ឍន៍ប្រាំឆ្នាំ ទាំងរបស់សង្កាត់ និងខណ្ឌ ដែលនៅក្នុងនោះចាំបាច់ត្រូវមានការចូលរួមគាំទ្រពី មន្ទីរជំនាញ ដៃគូអភិវឌ្ឍន៍ សប្បុរសជន និងវិស័យឯកជន ដើម្បីឱ្យគម្រោងដែលបានរៀបចំ ឆ្លុះបញ្ចាំងពីតម្រូវការជាអាទិភាពនៅថ្នាក់មូលដ្ឋាន ប្រើប្រាស់ធនធានឱ្យចំគោលដៅ និងអនុវត្តទៅប្រកបដោយប្រសិទ្ធភាព។

លោក ហ៊ុន សុរិទ្ធី អភិបាលរងរាជធានីភ្នំពេញ បានលើកឡើងផងដែរថា សូមកោតសរសើរនិងវាយតម្លៃខ្ពស់ ចំពោះ លោក លោកស្រី តំណាងឱ្យមន្ទីរជំនាញ តំណាងឱ្យអង្គការដៃគូរអភិវឌ្ឍនានា វិស័យឯកជន និង សប្បុរសជនទាំងអស់ ដែលបានជួយគាំទ្រដល់ ខណ្ឌ៧មករា និងសង្កាត់ទាំង៨ ក្នុងពេលកន្លងមក ហើយក៏សូមសំណូមពរឱ្យបន្តការគាំទ្រតទៅទៀត ដើម្បីចូលរួមអភិវឌ្ឍរាជធានីភ្នំពេញឱ្យកាន់តែរីកចំរើន ជាបន្តបន្ទាប់ ស្របតាម គោល​នយោបាយ​យុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា ក្រោម​ការដឹកនាំ​ប្រកប​ដោយ​គតិបណ្ឌិតរបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃ ព្រះរាជាណាចក្រ​កម្ពុជា ។

លោកអភិបាលរងបានបញ្ជាក់បន្ថែមថា អង្គភាពជំនាញពាក់ព័ន្ធនឹងបន្តការគាំទ្រដល់ គម្រោង​សកម្មភាព​កម្មវិធីវិនិយោគបីឆ្នាំរំកិល ជាបន្តទៀត ដើម្បីឆ្លើយតបទៅនឹង​តម្រូវការ​របស់​ប្រជា​ពលរដ្ឋ ពិសេសការអភិវឌ្ឍនៅមូលដ្ឋាន។

សម្រាប់គម្រោងជាអាទិភាពរបស់រដ្ឋបាលខណ្ឌឆ្នាំ២០២៥ ដែលត្រូវដាក់​ស្នើ​សុំការ​គាំទ្រ​នៅក្នុង​សិក្ខាសាលាសមាហរណកម្មនាពេលនេះមានចំនួន ១៣៧គម្រោង ដែលមានផ្នែកសេដ្ឋកិច្ច ២៩គម្រោង; ផ្នែកសង្គមកិច្ច៥៤គម្រោង ;ផ្នែកគ្រប់គ្រងដីធ្លីធនធានម្មជាតិ​បិស្ថាន២៨​គម្រោង; ផ្នែក​សេវាកម្មរដ្ឋបាល និងសន្តិសុខ២៦គម្រោង។ ចំណែកគម្រោងជា​អាទិភាព​របស់​សង្កាត់ទាំង៨ មានចំនួន៣៩២គម្រោង រួមមាន វិស័យអាជីវកម្ម ១៥គម្រោង, វិស័យអប់រំ ១៩​គម្រោង, វិស័យសុខភាព៧៧ គម្រោង ,វិស័យងាយរងគ្រោះ ២៣គម្រោង,វិស័យបរិស្ថាន ៣៤គម្រោង និងវិស័យរដ្ឋបាលនិងសន្តិសុខ ២២៤គម្រោង៕ អត្ថបទ៖ កុម្ភះ