ភ្ញៀវទេសចរជាង២៤ម៉ឺននាក់ ទៅលេងកម្សាន្តនៅខេត្តព្រះសីហនុ អំឡុងពេលចូលឆ្នាំចិន រយៈពេលបីថ្ងៃ

ភ្ញៀវទេសចរដែលបានចូលមកខេត្តព្រះសីហនុ អំឡុងពេលថ្ងៃបុណ្យចូលឆ្នាំថ្មី ប្រពៃណីចិន រយៈពេល៣ថ្ងៃ ចាប់ពីថ្ងៃទី២៩ ដល់៣១ ខែមករា ឆ្នាំ២០២៥ មានការថយចុះជាង ១៥ភាគរយ ។

ប្រធានមន្ទីរទេសចរណ៍ខេត្ដព្រះសីហនុ ប្រាប់ឱ្យដឹង នៅថ្ងៃទី២ ខែកុម្ភៈ ឆ្នាំ២០២៥ នេះ ថា ដោយសារថ្ងៃបុណ្យចូលឆ្នាំថ្មី ប្រពៃណីចិន មិនចំថ្ងៃសៅរ៍ អាទិត្យ (ចុងសប្ដាហ៍) ទើបចំនួនភ្ញៀវទេសចរដែលបានចូលមកខេត្តព្រះសីហនុ មានការថយចុះ។

ចំនួនភ្ញៀវទេសចរផ្ទៃក្នុងសរុប២៤៨.៦៩៦នាក់ ថយចុះ ១៥,៤៩% ក្នុងនោះ ភ្ញៀវជាតិ ២៣៥.៥៩០នាក់ ថយចុះ ១៦,៥៧% ភ្ញៀវបរទេសសរុប ១៣.១០៦នាក់ កើនឡើង១០,០៨%។

លោក បន្ដថា រីឯ ចំនួនភ្ញៀវតាមបណ្តាឆ្នេរ និងរមណីយដ្ឋាននានាសរុប ២៤៣.៣៧៤នាក់ ថយចុះ ១៦,១០% ក្នុងនោះ ភ្ញៀវជាតិ ២៣២.៦៣៤នាក់ ថយចុះ ១៧,០៩% ភ្ញៀវបរទេស ១០.៧៤០នាក់ កើនឡើង ១៣,១៥%។ ដោយឡែក ចំនួនភ្ញៀវចូលតាមព្រលានយន្តហោះអន្តរជាតិចំនួន ១០ជើង ធៀបនឹងឆ្នាំមុនកើនឡើង ០៤ជើង មានភ្ញៀវសរុប ៨១២នាក់ កើនឡើង ១៦៨% ក្នុងនោះ ភ្ញៀវជាតិ ០៦នាក់ កើនឡើង ៥០% ភ្ញៀវអន្តរជាតិ ៨០៦នាក់ កើនឡើង ១៦៩,៥៦% ។

ជាមួយគ្នានោះ ចំនួនភ្ញៀវទេសចរទៅកម្សាន្តតាមបណ្តាកោះនានាសរុប ៤.៥១០នាក់ កើនឡើង ១៥,២៨% ក្នុងនោះ ភ្ញៀវជាតិ ២.៩៥០នាក់ កើនឡើង ៦៤,១៦% ភ្ញៀវបរទេស ១.៥៦០នាក់ ថយចុះ២៦,២៤%។