គណបក្សប្រជាជនកម្ពុជាខេត្តព្រះវិហារ បើកសន្និបាតបូកសរុបសភាពការណ៍ទូទៅ និងការងារគណបក្សឆ្នាំ២០២៤ និងទិសដៅភារកិច្ចឆ្នាំ២០២៥

នៅព្រឹកថ្ងៃទី២០ ខែកុម្ភៈ ឆ្នាំ២០២៥ គណបក្សប្រជាជនកម្ពុជាខេត្តព្រះវិហារ បានបើក សន្និបាតផ្សព្វផ្សាយលទ្ធផលសន្និបាតគណៈកម្មាធិការកណ្តាលលើកទី៤៥ អាណត្តិទី៥ បូកសរុបសភាពការណ៍ទូទៅ និងការងារគណបក្សឆ្នាំ២០២៤ និងទិសដៅភារកិច្ចឆ្នាំ២០២៥ ក្រោមអធិបតីភាពឯកឧត្តម ម៉ៅ សុផាន់ សមាជិកគណៈអចិន្ត្រៃយ៍គណៈកម្មាធិការកណ្តាល ប្រធានក្រុមការងារគណបក្សចុះមូលដ្ឋានខេត្តព្រះវិហារ ។

ពិធីនេះក៏មានការអញ្ជើញចូលរួមពីសំណាក់ ឯកឧត្តម ប្រាក់ សុវណ្ណ សមាជិកគណៈកម្មាធិការកណ្ដាល ប្រធានគណៈ កម្មាធិការគណបក្សខេត្ត ឯកឧត្តម គីម រិទ្ធី សមជិការគណៈកម្មាធិការកណ្ដាល អនុប្រធាន គណៈកម្មាធិការបក្សខេត្ត ឯកឧត្តម លោកជំទាវ ក្រុមការងារគណបក្សថ្នាក់កណ្ដាលចុះមូល ដ្ឋានខេត្ត ព្រមទាំង ឯកឧត្តម លោកជំទាវ សមាជិកគណៈអចិន្ត្រៃយ៍នៃគណៈកម្មាធិការ គណបក្សខេត្ត លោក លោកស្រី ជាសមាជិក សមាជិកា គណបក្សខេត្ត ក្រុង/ស្រុក ជាច្រើនរូប ដែលប្រព្រឹត្តទៅនៅសាលប្រជុំធំស្នាក់ការគណបក្សខេត្ត។

នៅក្នុងឱកាសនោះ អង្គសន្និបាតបានស្តាប់នូវ លទ្ធផលរបស់អង្គសន្និបាតគណៈ កម្មាធិការកណ្តាលលើកទី៤៥ អាណត្តិទី៥ និងស្តាប់នូវរបាយការណ៍ ពាក់ព័ន្ធស្ថានភាពទូទៅ ពិសេសការងារសេដ្ឋកិច្ច សង្គមនៅទូទាំងខេត្តព្រះវិហារ ។

មានប្រសាសន៍ទៅកាន់អង្គសន្និបាតឯកឧត្តម ម៉ៅ សុផាន់ បានថ្លែងនូវការកោតសរសើរ និងវាយតម្លៃខ្ពស់ចំពោះក្រុមការងារ និងមន្រ្តីគណបក្សគ្រប់ថ្នាក់នៅមូលដ្ឋាន ដែលបានខិតខំ ប្រឹងប្រែងយកអស់កម្លាំងកាយចិត្ត ស្មារតី និងធនធានផ្ទាល់ខ្លួន បម្រើប្រជាពលរដ្ឋសម្រេចបាន សមិទ្ធផលគួរជាទីមោទនៈ ក្នុងរយៈពេលកន្លងមកនេះ។

ឯកឧត្តមបានបន្តទៀតថា អង្គសន្និបាត គណៈកម្មាធិការកណ្តាលលើកទី៤៥ អាណត្តិទី៥ របស់គណបក្សប្រជាជនកម្ពុជា បានវាយតម្លៃ ចំពោះដំណើរការនៃការកែទម្រង់​និងការ​ពង្រឹងអភិបាលកិច្ច ស្របតាមអភិក្រម ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ជាពិសេសតាមរយៈការអនុវត្តវិធានការគន្លឹះទាំង៥ ​បានធ្វើឱ្យមានវឌ្ឍនភាពគួរឱ្យកត់សម្គាល់ ក្នុងការកសាងរដ្ឋបាលសាធារណៈប្រកបដោយ សមត្ថភាព និងភាពស្អាតស្អំ ការកសាងធនធានមនុស្សប្រកបដោយចំណេះដឹង ចំណេះធ្វើ គុណធម៌ និងកាយសម្បទាការពង្រីកវិសាលភាព និងប្រសិទ្ធភាពនៃប្រព័ន្ធគាំពារសង្គម ការបង្កើតការងារ និងជំរុញផលិតកម្ម ព្រមទាំងការពង្រឹងសន្តិសុខ សុវត្ថិភាព និងយុត្តិធម៌ សង្គម។

បន្ថែមពីនេះ ឯកឧត្តមបានថ្លែងគូសបញ្ជាក់ពីការដាក់ចេញទិសដៅរបស់សន្និបាត ឆ្នាំ២០២៥ ក្នុងការពង្រឹងធ្លុងមហាសាមគ្គីជាតិក្រោមដំបូលរដ្ឋធម្មនុញ ការពាររឹងមាំឯករាជ្យ អធិបតេយ្យ និងបូរណភាពទឹកដីកម្ពុជា ការពារដាច់ខាតសុខសន្តិភាព ស្ថិរភាពនយោបាយ និងសន្តិសុខជាតិ មិនឲ្យកម្លាំងអមិត្ត ឬក្រុមជ្រុលនិយមណាមកបំផ្លាញការអភិវឌ្ឍ និងសេចក្តី សុខរបស់ប្រជាជនបានឡើយ។

ជាមួយគ្នានេះ ឯកឧត្តមក៏បានផ្តាំផ្ញើដល់គណៈកម្មាធិការបក្ស ខេត្ត ស្រុក/ក្រុង ឃុំ/សង្កាត់ ក្នុងខេត្តព្រះវិហារ ត្រូវបង្កើន និងពង្រឹងសមាជិកគណបក្សទាំង បរិមាណ គុណភាព ដោយឈរលើគោលការណ៍សាមគ្គីឯកភាពផ្ទៃក្នុង និងកិច្ចសហប្រតិបត្តិការ ល្អ ជាពិសេសបន្តការកសាងអភិវឌ្ឍន៍មាតុភូមិកម្ពុជា។ ត្រូវចុះពង្រឹងមូលដ្ឋាន និងមន្រ្តី គណបក្សគ្រប់ថ្នាក់ បន្តធ្វើអំពើល្អ ខិតខំយកអស់កំលាំងកាយចិត្តនិងស្មារតីទទួលខុសត្រូវ បម្រើប្រជាជន ការផ្តល់សេវាសាធារណៈប្រកបដោយគុណភាព និងបង្រ្កាបទាន់ពេលវេលារាល់ បទល្មើស ការប្រើប្រាស់គ្រឿងញឿន ការបន្តថែរក្សាសុខសន្តិភាព អនុវត្តភូមិ-ឃុំ មានសុវត្ថិភាព និងលើកកម្ពស់ជីវភាពរស់នៅរបស់ប្រជាពលរដ្ឋ ព្រមទាំងបានផ្តល់នូវសេចក្តីសម្រេចប្រកាស បញ្ចូលជាសមាជិកអចិន្ត្រៃយ៍គណបក្សខេត្ត និងបញ្ចូលសមាជិកគណៈកម្មាធិការគណបក្សខេត្ត ដល់មន្ត្រីគណបក្សក្នុងខេត្តព្រះវិហារមួយចំនួនផងដែរ៕