ព័ត៌មាន

រដ្ឋបាលឃុំថ្មី អនុវត្តគោលនយោបាយភូមិឃុំមានសុវត្ថិភាពបានល្អប្រសើរ

ស្វាយរៀង ÷ លោក ឡឹក សំអុន មេឃុំថ្មី ស្រុកកំពង់រោទិ៍ ខេត្តស្វាយរៀង ក្នុងឱកាសផ្សព្វផ្សាយគោលនយោបាយភូមិឃុំមានសុវត្ថិភាពនៅភូមិព្រៃវល្ល័ ឃុំថ្មី នៅថ្ងៃទី១០ ខែមិថុនា ឆ្នាំ២០២៥នេះ បានប្រាប់ទូរទស្សន៍ btv ឱ្យដឹងថា ក្នុងរយៈពេល ៥ខែ ឆ្នាំ២០២៥នេះ នៅក្នុងភូមិសាស្ត្រឃុំ មានសន្តិសុខល្អប្រសើរ តាមរយៈការចូលរួមអនុវត្តគោលនយោបាយភូមិឃុំមានសុវត្ថិភាពរបស់គណៈបញ្ជាការឯកភាពឃុំ និងការចូលរួមបន្ថែមពីប្រជាការពារនៅតាមភូមិទាំង៦របស់ឃុំ។

លោកបានបញ្ជាក់បន្ថែមថា ក្រៅពីរក្សាបានសុវត្ថិភាពសន្តិសុខសង្គម ឃុំត្រូវបានក្រសួងបរិស្ថានធ្វើការជ្រើសរើស និងចាត់ទុកជាឃុំមានអនាម័យ និងបរិស្ថានល្អផងដែរ។ សូមបញ្ជាក់ថា ឃុំថ្មី ជាឃុំមួយក្នុងចំណោមភូមិទាំង១១របស់ស្រុកកំពង់រោទិ៍ ឃុំនេះមានខ្សែបន្ទាត់ជាប់ព្រំប្រទល់ដែនកម្ពុជា វៀតណាម ទីប្រជុំជនភូមិព្រៃវល្ល័ ត្រង់ចំណុចបង្គោលព្រំដែនលេខ ២១១ ៕