ព័ត៌មាន

TOP STORY រដ្ឋមន្រ្តីក្រសួងរ៉ែ និងថាមពល៖មកទល់ពេលនេះបណ្ដាញអគ្គិសនីជាតិរបស់កម្ពុជាមិនមានការយកអគ្គិសនី ពីប្រទេសថៃនោះទេ

ភ្នំពេញ៖ ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល បានបញ្ជាក់ឱ្យដឹងនៅល្ងាចថ្ងៃទី១១ ខែមិថុនា ឆ្នាំ២០២៥នេះថា មកទល់ពេលនេះ បណ្ដាញអគ្គិសនីរបស់ព្រះរាជាណាចក្រកម្ពុជា ពុំបានយកអគ្គិសនីពីប្រទេសថៃមកផ្គត់ផ្គង់នោះទេ ព្រោះកម្ពុជាមានលទ្ធភាពផ្គត់ផ្គង់អគ្គិសនីគ្រប់គ្រាន់ដោយខ្លួនឯង។

ការបញ្ជាក់របស់ឯកឧត្តម កែវ រតនៈ បែបនេះ ក្រោយពីពេលថ្មីៗនេះ មានព័ត៌មានបំពុលសង្គមមួយចំនួន បានផ្សព្វផ្សាយព័ត៌មានមិនពិតនៅលើបណ្ដាញសង្គមថា ភាគីថៃនឹងផ្ដាច់អគ្គិសនីពីកម្ពុជា។

ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពលថ្លែងថា៖«អគ្គិសនីរបស់ព្រះរាជាណាចក្រកម្ពុជា នាពេលបច្ចុប្បន្ននេះ ពុំបានយកអគ្គិសនីពីប្រទេសថៃមកផ្គត់ផ្គង់នោះទេ ព្រោះយើងមានអគ្គិសនីគ្រប់គ្រាន់ ដើម្បីផ្គត់ផ្គង់។ មកទល់ពេលនេះបណ្ដាញអគ្គិសនីជាតិរបស់យើង មិនមានការយកភ្លើងពីថៃចូលបណ្ដាញអគ្គិសនីជាតិរបស់យើងនោះទេ»៕