រាជរដ្ឋាភិបាល និងអង្គការដៃគូ​រួមគ្នា​បង្កើត​ការងារ​ដល់​សហគមន៍​នេសាទ​តំបន់​បឹង​ទន្លេសាប​តាម​រយៈ​សេដ្ឋកិច្ចវិលជុំ

អស់រយៈពេលជិត៤ឆ្នាំ ការអនុវត្តគម្រោង “បង្កើតការងារ​ជា​សេដ្ឋកិច្ច​វិល​ជុំ​របស់​សហគមន៍​នេសាទ​នៅបឹ​ងទន្លេសាបខាងលិច ក្នុងតំបន់១” ដែលផ្តល់មូលនិធិដោយសហភាពអឺរ៉ុប បាន​ឈាន​ដល់​ទីបញ្ចប់ ដោយមានកិច្ចសហការយ៉ាងល្អ រវាងរាជរដ្ឋាភិបាលកម្បុជា អង្គការអុកស្វាម និង​អាជ្ញាធរមានសមត្ថកិច្ចជាដើម ដោយ​បាន​នាំមក​នូវ​ការ​ផ្លាស់ប្តូរ​វិជ្ជមា​ន​សម្រាប់​សហគមន៍​នេសាទ​នៅ​ជុំវិញតំបន់ឋមនីយជីវមណ្ឌលបឹងទន្លេសាប។

នៅក្នុងសិក្ខាសាលាស្តីពី ការប្រែក្លាយសហគមន៍នេសាទនៅតំបន់បឹងទន្លេសាប នៅព្រឹកនៅ​ថ្ងៃ​ទី​១៣ មិថុនា ឆ្នាំ២០២៥នេះ លោក អូស្កា ហាក់ ប្រធានកម្មវិធី និងតំណាងអង្គការអុកស្វាម បាន​លើក​ឡើងឱ្យដឹងថា តាមរយៈគម្រោងខាងលើនេះ បានមើលឃើញនូវភាពច្នៃប្រឌិត និងភាពធន់​គួរ​ឱ្យកត់សម្គាល់របស់សហគមន៍នេសាទក្នុងតំបន់ឋបនីយជីវមណ្ឌលបឹងទន្លេសាប។

លោក​បានបន្តថា ដោយមានការបញ្ចូលការអនុវត្តប្រកបដោយនិរន្តរភាព គម្រូសេដ្ឋកិច្ចវិលជុំ និង​ការ​អ​ប់រំប្រកប ដោយបរិយាបន្ន មិនត្រឹលោមតែពង្រឹងជីវភាពរស់នៅរបស់សហគមន៍ប៉ុណ្ណោះទេ ប៉ុន្តែ​ថែមទាំងបានលើកកម្ពស់និរន្តរភាពបរិស្ថានទៀតផង។ ខណៈពេល​ដែល​យើង​កំពុង​សាទរ​នូវ​សមិទ្ធផ​លនេះ អង្គការអុកស្វាម ក៏សូមអំពាវនាវដល់អង្គការដៃគូ អ្នក បង្កើតគោល នយោបាយ និង​សហគមន៍ បន្តវិនិយោគលើរាល់ដំណោះស្រាយទាំងឡាយណាដែលគាំទ្រសហគមន៍ និង​ការ​ពារ​ធនធានធម្មជាតិរួមទាំងអស់គ្នា។

ពាក់ព័ន្ធ​គម្រោងនេះ លោក Koen EVERAERT អនុប្រធាន​កិច្ច​សហ​ប្រតិបត្តិការ​នៅសហភាព​អឺរ៉ុបប្រចាំកម្ពុជា មានប្រសាសន៍ថា បានឆ្លុះ​បញ្ចាំ​ង​ពី​ការ​ប្តេជ្ញា​ចិត្ត​របស់​សហភាព​អឺរ៉ុប​ឆ្ពោះ​ទៅ​រក​ការ​អភិវឌ្ឍប្រកបដោយចីរភាព។ តាមរយៈការពង្រឹងនូវសេវាកម្មដែលចាំបាច់ និងការបង្កើត​ឱ្យ​ចរន្ត​សេដ្ឋកិច្ចនៅក្នុងសហគមន៍ គម្រោង CAPFISH/FOSTER ដែលគាំទ្រដោយសហភាពអឺរ៉ុប បាន​ដាក់ចេញជាមូលដ្ឋានគ្រឹះដ៏រឹងមាំសម្រាប់សហគមន៍នេសាទឲ្យមានភាពធន់ និងភាពជា​ម្ចាស់​ការ​។

នៅក្នុងពិធីបើកសិក្ខាសាលានាឱកាសនេះ ឯកឧត្តម ស្រ៊ុន លឹមសុង អនុប្រធានរដ្ឋបាលជលផល និងជានាយករងនៃកម្មវិធី EU-CAPFISH-Capture នៃក្រសួងកសិកម្ម រុក្ខាប្រមាញ់ និងនេសាទ បាន​មានប្រសាន៍ទទួលស្គាល់ថា ក្នុងរយៈពេល ៤ឆ្នាំកន្លងមក អង្គការអុកស្វាម និងអង្គការ​ជាដៃគូរបានសម្រេចបាននូវលទ្ធផលសំខាន់ៗជាច្រើន ដូចជា៖ បណ្តុះបណ្តាលសមាជិកសហគមន៍អំពីការអភិរក្សត្រី និងព្រៃលិចទឹក, ការបង្កើតក្រុមកែច្នៃផលនេសាទ និងក្រុមចិញ្ចឹមឃ្មុំ, ជម្រុញអេកូទេសចរណ៍ និងកសិកម្មឆ្លាត និងបានបំពាក់សូឡាតាមផ្ទះសហគមន៍នេសាទជាដើម។ លទ្ធផលទាំងនេះ មិនអាចសម្រេចបានឡើយ ប្រសិនបើគ្មានការចូលរួមយ៉ាងសកម្មពីសហគមន៍ អាជ្ញាធរមូលដ្ឋាន និងដៃគូអភិវឌ្ឍន៍ទាំងអស់។ ទាំងនេះជាចំណូលបន្ថែមរបស់ប្រជានេសាទដែលមិនអាចខ្វះបាន។

សូមជំរាបជូនថា សិក្ខាសាលាស្តីពី ការប្រែក្លាយសហគមន៍នេសាទនៅតំបន់បឹងទន្លេសាប ក្នុងថ្ងៃនេះ មានអ្នកចូលរួមប្រមាណ ១០០នាក់ រួមមាន តំណាងមកពីរដ្ឋបាលជលផល ក្រសួងកសិកម្ម រុក្ខាប្រមាញ់ និងនេសាទ, ក្រសួងអភិវឌ្ឍន៍ជនបទ, ក្រសួងអប់រំយុវជន និងកីឡា, សហភាពអឺរ៉ុប ដៃគូអនុវត្តគម្រោង អង្គការសង្គមស៊ីវិល អាជ្ញាធរថ្នាក់មូលដ្ឋាន និងសហគមន៍។ កម្មវិធីនេះបានបង្ហាញពីលទ្ធ ផលរបស់គម្រោងដែលសម្រេចបានតាម រយៈការរួមបញ្ចូលគ្នានូវការអភិវឌ្ឍប្រកប ដោយចីរភាព ការការពារបរិស្ថាននិងនវានុវត្តន៍៕ អត្ថបទ៖ ឈិត បូរ៉ាវី