មតេយ្យសិក្សារដ្ឋអនុវត្តការតេស្តសមត្ថភាពសិស្ស ដើម្បីតាមដានទាំងការលូតលាស់រាងកាយ និងបញ្ញាសិស្ស

សាលាមតេយ្យសិក្សារដ្ឋជាង ២០០ សាលាទូទាំងប្រទេស កំពុងអនុវត្ត​ពេញលេញ​នូវ​ការ​ធ្វើ​តេស្ត​សមត្ថ​ភាព​សិស្សជាប្រចាំ។ ការធ្វើតេស្តនេះ គឺភ្ជាប់ជាមួយវត្តមានអាណាព្យាបាល ចូលរួមជា​ចាំ​បាច់ ដើម្បីឱ្យអាណាព្យាបាលមើលឃើញច្បាស់ពីសមត្ថភាព ការលូតលាស់រូបរាងកាយ ក៏​ដូច​ជា​បញ្ញា​របស់កូនៗ និងភ្ជាប់ជាមួយការសាកសួរព័ត៌មានមួយចំនួនទៅកាន់អាណាព្យាបាល ពីការ​ចិញ្ចឹម​ថែ​រក្សាកូន។

សាលាមតេយ្យសិក្សាធនធានជាង ២០០សាលា ជាសាលាគោលដៅ ដែលកំ​ពុង​អនុវ​ត្ត​ពេញ​លេញ​​ការ​ធ្វើតេស្តសមត្ថភាពសិស្ស។ តេស្តសមត្ថភាព រៀបចំឡើងជា ៣លើក។ លើកទី ១ ជាការ​ធ្វើ​តេស្ត​មុនពេលចូលរៀន លើកទី ២ជាការធ្វើតេស្តកំឡុងពេលសិក្សា និងតេស្តសមត្ថភាពលើកទី ៣​ធ្វើ​ឡើងនៅចុងឆ្នាំសិក្សា ដើម្បីឱ្យដឹងច្បាស់ពីភាពប្រែប្រួល ការរីកចំរើន ឬចំណុច​ខ្សោយ​របស់​សិស្ស​ក្រោយ​បញ្ចប់ឆ្នាំសិក្សា។ ការធ្វើតេស្តសមត្ថភាព កុមារថ្នាក់មតេយ្យនេះ ក៏តម្រូវឱ្យការ​ចូល​រួម​ពី​អាណាព្យាបាលផងដែរ។ សម្រាប់សាលាមតេយ្យសិក្សាធនធានក្រុងតាខ្មៅ ក៏​កំពុង​អនុវត្ត​ការ​ធ្វើ​តេស្ត​សមត្ថភាពសិស្សបញ្ចប់ឆ្នាំសិក្សាផងដែរ។ ការធ្វើតេស្តចាប់ផ្ដើម តាំងពីថ្ងៃទី ៨ កក្កដា រហូត​ដល់​ថ្ងៃទី១២ កក្កដាខាងមុខ។

លោកស្រី ខាន់ សុគន្ធា នាយិការ មតេយ្យសិក្សាធនធានក្រុងតាខ្មៅ បញ្ជាក់ថា ការធ្វើតេស្ត​សម្រាប់​កុមារ គឺផ្តោតសំខាន់ទាំងការលូតលាស់ផ្នែករាងកាយ ក៏ដូចជាការលូត​លាស់​បញ្ញា​ស្មារតី​របស់​កុមារ​។ ទន្ទឹមគ្នានេះ សាលាក៏ធ្វើតេស្តលើអាណាព្យាបាលផងដែរ។ ការធ្វើតេស្ត​លើ​អាណា​ព្យាបាល គឺដើម្បីដឹងពីការចិញ្ចឹមថែរក្សា កូន ជាដើម។ លោកស្រីនាយិការបន្តថា លទ្ធផល​នៃ​ការ​ធ្វើ​តេស្ត​សមត្ថភាពសិស្ស គឺជារបាយការណ៍សំខាន់ ដែលសាលាដោយ​មាន​កិច្ច​សហការ​ពី​អាណា​ព្យាបាល​ អាចរិះរកវិធីសាស្ត្រជួយកុមារខ្សោយ ឱ្យរីកចំរើនប្រសើរឡើង។

ភ្ជាប់ជាមួយការធ្វើតេស្តសមត្ថភាពនេះ សម្រាប់​អាណា​ព្យាបាល​ដែល​បាន​ចូលរួម​ជាមួយ​កូន​ដោយ​ផ្ទាល់ លើកឡើងជាការគាំទ្រ។ ពួកគេគាំទ្រទាំ​ង​ការ​បង្រៀន​ដោយ​ចិត្ត​ទុក​ដាក់​របស់​គ្រូ​បង្រៀន ក៏ដូចជាគាំទ្រទៅលើការធ្វើតេស្តសមត្ថភាពសិស្សជាប្រចាំដូចនេះ។ ជាអាណាព្យាបាល គឺ​ពួក​គាត់ចូលរួមផ្ដល់កិច្ចសហការ ជាមួយសាលា ដើម្បីការរីកចំរើនរបស់កូនកាន់តែប្រសើរ។

សម្រាប់សាលាមតេយ្យសិក្សាធនធានក្រុងតាខ្មៅ ធ្វើតេស្តសមត្ថភាពសិស្សទាំង ៣កម្រិត។ សាលា​ធ្វើ​តេស្តទាំងកុមារ អាយុ ៣ឆ្នាំ កុមារអាយុ ៤ឆ្នាំ និងកុមារអាយុ ៥ឆ្នាំផងដែរ។ ការធ្វើ​តេស្ត​នេះ តម្រូវឱ្យកុមារ អនុវត្តនូវសកម្មភាព រាងកាយមួយចំនួន និងតម្រូវ​ឱ្យ​កុមារ​ឆ្លើយ​សំណួរ​ទៅ​តាម​តារាង​សំណួរដើម្បីដឹងច្បាស់ទាំងការលូតលាស់ផ្នែករូបរាងកាយ ក៏ដូចជាការ​លូត​លាស់​បញ្ញា​ស្មារតី​របស់​កុមារ៕

អត្ថបទ៖ គឹម ហុក