កម្ពុជានឹងប្រែក្លាយខេត្តព្រះសីហនុ ជាប៉ូលអភិវឌ្ឍន៍ជាតិ និងជាទីក្រុងធំមួយក្នុងតំបន់អាស៊ាន

កម្ពុជាមានចក្ខុវិស័យអភិវឌ្ឍខេត្តព្រះសីហនុ ទៅជាច្រកទ្វារអន្តរជាតិរបស់ប្រទេសកម្ពុជា ជា​ប៉ូល​អ​ភិវឌ្ឍន៍ជាតិ ជាពិសេសការប្រែ ក្លាយទៅជាទីក្រុងធំមួយនៅក្នុងតំបន់អាស៊ាន ជាមួយ​នឹង​កិត្តិនាម​ជាទីក្រុងគំរូបៃតង ប្រកបដោយចីរភាព, ចម្រុះវប្បធម៌, និងឆ្លាតវៃ ។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង​ហិរញ្ញ​វត្ថុ និងជាប្រធានគណៈ កម្មាធិការសម្របសម្រួលអន្តរក្រសួងរៀបចំផែនការមេ ដើម្បី​អភិវឌ្ឍន៍​​ខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង នៅថ្ងៃ ទី ៩ ខែ កក្កដា ឆ្នាំ ២០២៤នេះ បានដឹកនាំកិច្ចប្រជុំគណៈកម្មាធិការសម្របសម្រួលអន្តរក្រសួងលើកទី៣ ដើម្បី​ពិនិត្យ និងផ្ដល់យោបល់លើសេចក្តីព្រាង «ផែនការមេដើម្បី​អភិវឌ្ឍន៍​ខេត្តព្រះសីហនុ​ទៅ​ជា​តំបន់​សេដ្ឋកិច្ច​ពិសេស​គំរូព​ហុបំណង» និង «ផែនការសកម្ម ភាព» មុននឹងដាក់ជូនរាជរដ្ឋាភិបាល អនុម័ត​ដាក់​ឱ្យអនុវត្តនាពេលខាងមុខ ។ នេះគឺជាវឌ្ឍនភាពថ្មីមួយដ៏សំខាន់របស់រាជរដ្ឋាភិបាល នីតិកាល​ទី៧ នៃរដ្ឋសភា ស្របតាម «យុទ្ធសាស្រ្តបញ្ចកោណដំណាក់កាលទី១» ក្រោម​ការ​ដឹកនាំ​ដ៏​ស្វាហាប់ និង​ឈ្លាសវៃរបស់ សម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រី។ «ផែនការ​មេ​ដើម្បីអភិវឌ្ឍន៍​ខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណង» គឺជាត្រីវិស័យ​ក្នុង​ការ​អភិវឌ្ឍ​ខេត្តព្រះសីហនុ ឱ្យទៅជាប៉ូលសេដ្ឋកិច្ចដ៏សំខាន់មួយ សំដៅជំរុញកំណើនសេដ្ឋកិច្ច, ការ​អភិវឌ្ឍសង្គម និង ការការពារបរិស្ថាន ប្រកបដោយចីរភាព និងនិរន្តរភាព។

ជុំវិញបញ្ហានេះ រាជរដ្ឋាភិបាលមានចក្ខុវិស័យរយៈពេលវែងឆ្ងាយ ដើម្បី​អភិវឌ្ឍន៍​ខេត្ត​ព្រះសីហនុ​រួមមាន​៖ ជាច្រកទ្វារអន្តរជាតិ របស់ប្រទេសកម្ពុជា, ដោយប្រែក្លាយ​ជា​មជ្ឈ​មណ្ឌល​ដឹក​ជញ្ជូន​ពហុម​ធ្យោបាយ និង​ឡូជីស្ទិក មជ្ឈមណ្ឌលពាណិជ្ជកម្ម និងមជ្ឈមណ្ឌល ហិរញ្ញវត្ថុអន្តរជាតិ។ ជាប៉ូលអភិវឌ្ឍន៍ជាតិ, ដោយប្រែក្លាយជាគោលដៅទេសចរណ៍ឆ្នេរសមុទ្រ និងប្រជុំកោះ​លំដាប់​សកល​លោក, មជ្ឈមណ្ឌលជាតិនៃការអភិវឌ្ឍឧស្សាហកម្ម និងមជ្ឈមណ្ឌល​ជាតិ​សម្រាប់​នវានុវត្តន៍​បច្ចេក​វិទ្យា, និងជាទីក្រុងធំមួយនៅក្នុងតំបន់អាស៊ាន ជាមួយនឹង​កិត្តិនាម​ជា​ទីក្រុង​គំរូ​បៃតង​ប្រកបដោយចីរភាព ចម្រុះវប្បធម៌ និងឆ្លាតវៃ ។

ដើម្បីសម្រេចបានចក្ខុវិស័យនេះ, «ផែនការ​មេ​ដើម្បី​អភិវឌ្ឍន៍​ខេត្ត​ព្រះសីហនុ​ទៅ​ជា​តំបន់​សេដ្ឋកិច្ច​ពិសេស​គំរូ​ពហុបំណង» នឹង អនុវត្តជាពីរដំណាក់កាលគឺ៖ ដំណាក់កាលទី១ “២០២៥-២០២៨​”​៖ ផ្តោតលើការធ្វើសមាហរណកម្មខេត្តព្រះសីហនុ ទៅក្នុងប្រព័ន្ធ ពាណិជ្ជកម្មក្នុងតំបន់, ការ​ពង្រីក​មុខងារ​ភស្តុភារកម្ម និងវិស័យទេសចរណ៍ ព្រមទាំងការធ្វើឱ្យប្រសើរឡើង នូវទីក្រុងចាស់ និង​អភិវឌ្ឍតំបន់ថ្មី រួមទាំងការទាក់ទាញការវិនិយោគដែលមានតម្លៃបន្ថែមខ្ពស់ ។ ដំណាក់កាលទី២ “២០២៩-២០៣៨”៖ ខេត្តព្រះសីហនុនឹង ពង្រឹងតួនាទីរបស់ខ្លួនជាច្រកទ្វារជាតិ និងជាទី​ក្រុង​មជ្ឈ​មណ្ឌលក្នុងតំបន់ លើវិស័យហិរញ្ញវត្ថុ ពាណិជ្ជកម្ម ការអភិវឌ្ឍឧស្សាហកម្ម ការដឹក​ជញ្ជូន និង​បច្ចេក​វិទ្យា ព្រមទាំងអភិវឌ្ឍខ្លួនទៅជាទីក្រុងពហុមុខងារ សមស្របសម្រាប់សហគ្រិនភាព ទីក្រុង​បៃតង និងទីក្រុង ឆ្លាតវៃ ព្រមទាំងជាខេត្តដែលមានចំណូលខ្ពស់ប្រកបដោយវិបុលភាព៕

អត្ថបទ៖ សុន រ៉ាឌី