ពលរដ្ឋខ្មែររងគ្រោះដោយយោធាថៃហ៊ុំព័ទ្ធយកផ្ទះសម្បែង ស្ថិតនៅក្នុងភូមិសាស្រ្តខេត្តបន្ទាយមានជ័យហើយមិនអាចវិលត្រឡប់ទៅវិញបានមានចំនួន៦ភូមិ

បងប្អូនប្រជាពលរដ្ឋខ្មែរ ដែលរងគ្រោះដោយពួកទាហានឈ្លានពានថៃហ៊ុំព័ទ្ធដីធ្លី និងយកផ្ទះសម្បែងពួករបស់គាត់ ហើយមិនទាន់អាចវិលត្រឡប់ទៅវិញបានគឺមានចំនួន៦ភូមិ ហើយរាជរដ្ឋាភិបាលក៏បានការរៀបចំដី និងផ្ទះជូនបងប្អូនផងដែរ ប៉ុន្តែមិនមែនជាថ្នូរនៃការដោះដូរជាមួយដីរបស់ពួកគាត់ ដែលបានបាត់បង់ដោយសារទាហានឈ្លានពានថៃហ៊ុព័ទ្ធយកនោះទេ គឺជាការរៀបចំឱ្យរស់នៅជាបណ្តោះអាសន្នតែប៉ុណ្ណោះ។ នេះបើតាមសេចក្តីព័ត៌មានរបស់រដ្ឋបាលខេត្តបន្ទាយមានជ័យ។

យោងតាមសេចក្តីប្រកាសរបស់រដ្ឋបាលខេត្តបន្ទាយមានជ័យកាលពីថ្ងៃទី២៣ ខែមីនា ឆ្នាំ២០២៦នេះ បានបញ្ជាក់ថា ក្នុងភូមិសាស្ត្រខេត្តបន្ទាយមានជ័យមានបងប្អូនប្រជាពលរដ្ឋ ដែលរងគ្រោះដោយសារ យោធាថៃហ៊ុំព័ទ្ធបន្លាលួស ដាក់ទូកុងតឺន័រយកដីធ្លី ផ្ទះសម្បែងដែលមិនអាចចូលទៅរស់នៅលើទីតាំងដីរបស់ខ្លួនបាន មានដូចជាភូមិជោគជ័យ ភូមិព្រៃចាន់ ស្ថិតនៅឃុំអូរបីជាន់ ស្រុកអូរជ្រៅ និងភូមិសាមគ្គី ភូមិត្រពាំងសំរោង ភូមិផ្លូវបំបែក និងភូមិបន្ទាយមានឬទ្ធិ ស្ថិតនៅឃុំគោករមៀត ស្រុកថ្មពួក ខេត្តបន្ទាយមានជ័យជាដើម។

រដ្ឋបាលខេត្តបន្ទាយមានជ័យបានបញ្ជាក់ថា ចំពោះបងប្អូនដែលរងផលប៉ះពាល់ទាំង៦ភូមិខាងលើនេះ រាជរដ្ឋាភិបាលដែលមានសម្តេចធិបតី នាយករដ្ឋមន្ត្រី តែងតែគិតគូរ និងយកចិត្តទុកដាក់ខ្ពស់ទាំងការរស់នៅនិងជីវភាពរបស់ពួកគាត់ជានិច្ច ហើយមិនតែប៉ុណ្ណោះបាននិងកំពុងរៀបចំដីធ្លីជាគម្រោងរបស់សមាគមអតីតយុទ្ធជន ដើម្បីសាងសង់ផ្ទះសម្រាប់ផ្តល់ជូនបងប្អូនដែលមានលំនៅដ្ឋានអចិន្ត្រៃយ៍ក្នុងតំបន់ហ៊ុព័ទ្ធបានរស់នៅជាបណ្តោះអាសន្ន ដែលមានទីតាំងនៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ លើផ្ទៃដីទំហំ៤០០ហិកតា និងមានហេដ្ឋារចនាសម្ព័ន្ធនានាគ្រប់គ្រាន់ ហើយបច្ចុប្បន្នក្រុមការងារបាននឹងកំពុងដំណើរការសាងសង់ផ្ទះបានមួយចំនួនផងដែរ។

យ៉ាងណាក៏ដោយរដ្ឋបាលខេត្តបន្ទាយមានជ័យបានបញ្ជាក់ថា ការរៀបចំដី និងផ្ទះជូនបងប្អូនខាងលើនេះ មិនមែនជាថ្នូរនៃការដោះដូរជាមួយដីរបស់បងប្អូន ដែលបានបាត់បង់ដោយសារទាហានថៃហ៊ុំព័ទ្ធយកនោះទេ គឺជាការរៀបចំឱ្យរស់នៅជាបណ្តោះអាសន្នតែប៉ុណ្ណោះ ដោយរង់ចាំរាជរដ្ឋាភិបាលដោះស្រាយជាមួយភាគីថៃចប់បងប្អូននឹងត្រូវវិលត្រឡប់ទៅរស់នៅលើទីតាំងលំនៅឋានរបស់ខ្លួនវិញ៕