ព័ត៌មាន

រដ្ឋបាលខេត្តបាត់ដំបង ណែនាំពីការអបអរសាទរការបើកការដា្ឋនសាងសង់ព្រែកជីកហ្វូណនតេជោ

ដើម្បីចូលរួមអបអរសាទរក្នុងព្រឹត្តិការណ៍ជាប្រវត្តិសាស្ត្រនៃការបើកការដ្ឋានសាងសង់ព្រែកជីកហ្វូណនតេជោដែលនឹងប្រព្រឹត្តទៅនាថ្ងៃទី៥ ខែសីហា ឆ្នាំ២០២៤ ខាងមុខនេះរដ្ឋបាលខេត្តបាត់ដំបងបានធ្វើការណែនាំមួយចំនួនដល់មន្ទីរ អង្គភាព រដ្ឋបាលមូលដ្ឋាន និងស្ថាប័ននានា។

តាមរយៈសេចក្ដីណែនាំចុះថ្ងៃទី១០ ខែកក្កដា ឆ្នាំ២០២៤ រដ្ឋបាលខេត្តបាត់ដំបង បានណែនាំដល់សាលាខេត្ត មន្ទីរ-អង្គភាពជុំវិញខេត្ត រដ្ឋបាលក្រុង-ស្រុក រដ្ឋបាលឃុំ-សង្កាត់ គ្រប់ទីកន្លែងនិងវិហារសាសនារួមមានគ្រប់ទីវត្តអារាម មណ្ឌលវិបស្សនា អាស្រម សាលាបុណ្យ ស៊ូរ៉ាវ វិហារសាសនា ស្នាក់ការ ថ្វាយបង្គំ…ជាដើម សាលារៀន មន្ទីរពេទ្យ គ្រឹះស្ថានសាធារណៈ និងឯកជន ត្រូវរៀបចំដោតទង់ជាតិ ទង់ជ្វាលា បដាពាក្យស្លោក គ្រប់រដ្ឋបាលក្រុង-ស្រុក និងរដ្ឋបាលឃុំ-សង្កាត់ ត្រូវបន្តណែនាំដល់បងប្អូនប្រជាពលរដ្ឋ រៀបចំដោតទង់ជាតិនៅតាមមុខគេហដ្ឋានរៀងៗខ្លួន។

រដ្ឋបាលខេត្ត បានណែនាំដល់គ្រប់អង្គភាពស្ថាប័នខាងលើព្រមទាំងបងប្អូនប្រជាពលរដ្ឋក្នុងខេត្តបាត់ដំបងធ្វើការវាយគង ជួង រគាំង ទូងស្គរ ទះប៉ោត និងគោះត្រដោក តាមគ្រប់មធ្យោបាយដែលខ្លួនមាន នាវេលាម៉ោង ៩:០៩នាទីព្រឹក។

រដ្ឋបាលខេត្ត ណែនាំដល់រដ្ឋបាលស្រុក ត្រូវពិនិត្យលទ្ធភាពរៀបចំទីកន្លែងឱ្យបានសមរម្យសម្រាប់រៀបចំពិធីអបអរសាទរ ដោយរៀបចំឱ្យមានការប្រគុំតន្ត្រី ឬសម្ដែងសិល្បៈ និងការអុជកាំជ្រួចតាមលទ្ធភាព នាវេលាម៉ោង១៩:០០ នាទីយប់។ ដោយឡែករដ្ឋបាលក្រុងបាត់ដំបងត្រូវសហការរៀបចំជាមួយនឹងរដ្ឋបាលខេត្តក្នុងការប្រគំតន្ត្រី ឬ សម្ដែងសិល្បៈ អុចកាំជ្រួច ដើម្បីបង្កការសប្បាយរីករាយដល់បងប្អូនប្រជាពលរដ្ឋក្នុងការអបអរសាទរការបើក ការដ្ឋានសាងសង់ព្រែកជីកហ្វូណនតេជោ នៅថ្ងៃទី៥ ខែសីហា ឆ្នាំ២០២៤។ មន្ទីរព័ត៌មានខេត្ត ត្រូវណែនាំឱ្យប្រព័ន្ធឃោសនារបស់រដ្ឋ និងឯកជនក្នុងខេត្តចូលរួមផ្សព្វផ្សាយឱ្យបានទូលំទូលាយអំពីអត្ថប្រយោជន៍នៃគម្រោងព្រែកជីកហ្វូណនតេជោ និងទស្សនីយភាពនៃការអបអរសាទរ ការបើកការដ្ឋានសាងសង់ព្រែកជីកហ្វូណនតេជោ។

សូមបញ្ជាក់ថា គម្រោងព្រែកជីកហ្វូណនតេជោ គឺជាគំនិតផ្តួចផ្តើមប្រកបដោយចក្ខុវិស័យវែងឆ្ងាយរបស់សម្ដេច អគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានឧត្តមក្រុមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជាហើយបាននិងកំពុងអនុវត្តដោយរាជរដ្ឋាភិបាល នីតិកាលទី៧ នៃរដ្ឋសភា ដើម្បីបន្សល់ទុកជាកេរមរតកប្រវត្តិសាស្ត្រសម្រាប់កូនចៅជំនាន់ក្រោយរាប់ពាន់ឆ្នាំតទៅមុខ។ គម្រោងព្រែកជីកហ្វូណនតេជោនឹងផ្ដល់ផលប្រយោជន៍ដ៏មហាសាលដល់សង្គម-សេដ្ឋកិច្ចកម្ពុជា តាមរយៈការតភ្ជាប់ប្រព័ន្ធ ដឹកជញ្ជូនត្រង់ទៅសមុទ្រប្រើពេលវេលាខ្លី និងថ្លៃដឹកជញ្ជូនទាប។ ទន្ទឹមនេះគម្រោងព្រែកជីកហ្វូណនតេជោនឹងជួយឱ្យព្រះរាជាណាចក្រកម្ពុជាពង្រឹងនូវឯករាជ្យភាពខាងនយោបាយលើការដឹកជញ្ជូនតាមផ្លូវទឹក ហើយ នឹងមិនបង្កផលប៉ះពាល់ដល់បរិស្ថានប្រព័ន្ធអេកូឡូស៊ី និងរំហូរទឹកទន្លេមេគង្គឡើយ៕