អនុប្រធានទី១អាជ្ញាធរមីនប្រាប់ឯកអគ្គរដ្ឋទូតស្វីសចប់អាណត្តិប្រចាំនៅកម្ពុជាអំពីផលប៉ះពាល់អវិជ្ជមានដោយសារយុទ្ធភណ្ឌគ្រឿងផ្ទុះដែលបន្សល់ទុកដោយកងកម្លាំងយោធាថៃមកលើទឹកដីកម្ពុជា

ភ្នំពេញ៖ ឯកឧត្តមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន បានប្រាប់ទៅកាន់ ឯកឧត្តម Pedro Swahlen ឯកអគ្គរដ្ឋទូតស្វីសប្រចាំនៅប្រទេសថៃ កម្ពុជា និងឡាវ អំពីផលប៉ះពាល់អវិជ្ជមានដោយសារយុទ្ធភណ្ឌគ្រឿងផ្ទុះដែលបន្សល់ទុកដោយកងកម្លាំងយោធាថៃមកលើទឹកដីកម្ពុជា។

ឯកឧត្តមទេសរដ្ឋមន្រ្តី លី ធុជ បានប្រាប់បែបនេះ ក្នុងឱកាសបានអនុញ្ញាតជូន ឯកឧត្តម Pedro Swahlen ឯកអគ្គរដ្ឋទូតស្វីសប្រចាំនៅកម្ពុជា ចូលជួបសម្តែងការគួរសម និងជម្រាបលាក្នុងឱកាសដែលឯកឧត្តមបញ្ចប់បេសកកម្មការទូតនៅព្រះរាជាណាចក្រកម្ពុជា។

ក្នុងជំនួបនោះ តាងនាមឱ្យរាជរដ្ឋាភិបាល ឯកឧត្តមទេសរដ្ឋមន្រ្តី លី ធុជ បានវាយតម្លៃខ្ពស់ និងទទួលស្គាល់ចំពោះកិច្ចខិតខំប្រឹងប្រែង ភាពជាអ្នកដឹកនាំ ការលះបង់ និងការប្តេជ្ញាចិត្តរបស់ ឯកឧត្តម Pedro Swahlen ក្នុងការពង្រឹងទំនាក់ទំនងរវាងកម្ពុជា និងស្វីស។

ឯកឧត្តមទេសរដ្ឋមន្រ្តី លី ធុជ បានកោតសរសើរ និងវាយតម្លៃខ្ពស់ចំពោះទំនាក់ទំនងការទូត និងកិច្ចសហប្រតិបត្តិការរវាងប្រទេសទាំងពីរ និងជាពិសេសបានថ្លែងអំណរគុណចំពោះការគាំទ្រ និងការរួមចំណែកដល់កិច្ចការអភិវឌ្ឍនៅប្រទេសកម្ពុជា ក៏ជាការគាំទ្រផ្នែកមនុស្សធម៌ក្នុងកិច្ចការបោសសម្អាតមីន និងសំណល់ជាតិផ្ទុះពីសង្រ្គាម ផងដែរ។

ក្នុងឱកាសនោះ ឯកឧត្តមទេសរដ្ឋមន្រ្តី លី ធុជ បានជម្រាបប្រាប់ដល់ឯកឧត្តមឯកអគ្គរដ្ឋទូតស្វីស អំពីផលប៉ះពាល់អវិជ្ជមានដោយសារយុទ្ធភណ្ឌគ្រឿងផ្ទុះ ដែលបានបន្សល់ទុកដោយកងកម្លាំងយោធាថៃមកលើទឹកដីកម្ពុជា កាលពីឆ្នាំ២០២៥ កន្លងទៅនេះ ដែលទាមទារឱ្យមានការសិក្សាវាយតម្លៃច្បាស់លាស់ និងការដោះស្រាយរយៈពេលវែង។ ឯកឧត្តម ក៏បានលើកឡើងអំពីវិធានការដោះស្រាយផលប៉ះពាល់ដោយសារយុទ្ធភណ្ឌគ្រឿងផ្ទុះរបស់ សម្តេចធិបតី ហ៊ុន ម៉ាណែត នាយករដ្ឋមន្រ្តី និងការស្ដារឡើងវិញដើម្បីឱ្យប្រជាពលរដ្ឋអាចបង្កើតសកម្មភាពសេដ្ឋកិច្ចប្រកបដោយសុវត្ថិភាព។

ជាមួយគ្នានោះ ឯកឧត្តម Pedro Swahlen បានលើកឡើងអំពីសារៈសំខាន់នៃចំណងមិត្តភាព ទំនាក់ទំនងការទូត និងកិច្ចសហប្រតិបត្តិការរវាងប្រទេសកម្ពុជា និងស្វីស ហើយប្រទេសស្វីសបានធ្វើការយ៉ាងជិតស្និទ្ធជាមួយកម្ពុជា ក្នុងការរួមចំណែកអភិវឌ្ឍសេដ្ឋកិច្ចសង្គម រួមមាន ការគាំទ្រដល់សកម្មភាពមីនមនុស្សធម៌ សន្តិសុខស្បៀង និងការប្រែប្រួលអាកាសធាតុ ជាដើម។

ពាក់ព័ន្ធនឹងសកម្មភាពមីន ឯកឧត្តម Pedro Swahlen បានលើកឡើងថា ប្រទេសស្វីស គឺជាដៃគូមួយរបស់កម្ពុជា ក្នុងការដោះស្រាយបញ្ហាមីន និងសំណល់ជាតិផ្ទុះពីសង្រ្គាម ចាប់តាំងពីឆ្នាំ២០០០ និងបន្តគាំទ្រដល់កម្ពុជា ផងដែរ៕