ឯកឧត្តម ហ៊ុន ម៉ានី៖ កម្ពុជាផ្តល់តម្លៃយ៉ាងជ្រាលជ្រៅចំពោះសន្តិភាពដែលសម្រេចបាន និងបន្តការពារ ថែរក្សា

ឯកឧត្តម ហ៊ុន ម៉ានី ឧបនាយករដ្ឋមន្ត្រី និងជាប្រធានសហភាពសហព័ន្ធយុវជនកម្ពុជា (ស.ស.យ.ក) បានថ្លែង​បញ្ជាក់ថា កម្ពុជា បានផ្តល់តម្លៃយ៉ាងជ្រាលជ្រៅចំពោះសន្តិភាពដែលសម្រេចបាន ហើយនឹងខិតខំបន្តការពារ ថែរក្សា សន្ដិភាពដែលសម្រេច​បាននេះឱ្យបានទោះបីឋិតនៅក្នុងតម្លៃណាក៏ដោយ។

ឯកឧត្តមឧបនាយករដ្ឋមន្ត្រី ហ៊ុន ម៉ានី មានប្រសាសន៍បញ្ជាក់បែបនេះ​ក្នុងឱកាសអញ្ជើញជាអធិបតី ក្នុងពិធី «ដាស់ស្មារតីជាតិ» (Day of Reckoning) នៅពហុកីឡដ្ឋានជាតិអូឡាំពិកកាលពីថ្ងៃទី២៨ ខែឧសភា ឆ្នាំ២០២៦នេះ។

ឯកឧត្តមបានថ្លែងថា គោលបំណងតែមួយគត់នៃកម្មវិធីដាស់ស្មារតីជាតិ (Day of Reckoning)គឺនាំមកនូវការជួបជុំក្រោមដំបូលតែមួយ ដើម្បីរំឭកនិងចងចាំអំពីអតីតកាលដ៏ជូរចត់ ប៉ុន្តែ ពោរពេញដោយមនោសញ្ចេតនា ដែលបានឆ្លុះបញ្ចាំងពីភាពអស្ចារ្យដែលប្រជាជនកម្ពុជាទាំងមូលបានឆ្លងកាត់រួមគ្នា ក្នុងនាមជាប្រជាជាតិមួយ។ កម្ពុជាផ្តល់តម្លៃយ៉ាងជ្រាលជ្រៅចំពោះសន្តិភាពដែលយើងសម្រេចបានដោយលំបាកនេះ។

ឯកឧត្តមបញ្ជាក់ថា សន្តិភាពគឺជាអ្វីដែលយើងទាំងអស់គ្នាតែងបន្តការពារ ថែរក្សា និងប្រកាន់ខ្ជាប់ជានិច្ច ព្រមជាមួយនឹងស្មារតីនៃការរួមរស់ជាមួយគ្នាប្រកបដោយសន្តិសហវិជ្ជមាននិងកិច្ចសហប្រតិបត្តិការល្អ ដើម្បីសម្រេចឱ្យបាននូវចក្ខុវិស័យរបស់រាជរដ្ឋាភិបាល ក្នុងការប្រែក្លាយព្រះរាជាណាចក្រកម្ពុជា ទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍន៍នៅឆ្នាំ២០៥០ ដើម្បីឧត្តមប្រយោជន៍របស់ប្រជាពលរដ្ឋខ្មែរគ្រប់រូប»។

សូមបញ្ជាក់ថា កម្មវិធីដាស់ស្មារតីជាតិ (Day of Reckoning) កាលពីម្សិលមិញនេះ បានរំឭកដល់​ការ​ឈឺ​ចាប់​ ដែល​ជាតិ​ប្រជាជាតិកម្ពុជាទាំងមូល​បាន​ឆ្លង​កាត់​, ក្នុងពេលចូលរួមកម្មវិធីនេះ ទឹកភ្នែកប្រជាពលរដ្ឋ និងមហាជនទាំងអស់ បាន​ស្រក់​រាប់​លាន​ដំណក់ ដែលធ្វើឱ្យ​​​នឹក​ដល់ការ​លះ​បង់​ ពលិកម្ម​គ្រប់​បែប​យ៉ាង​របស់​បុព្វបុរស វីរ​បុរស​គ្រប់​ៗ​ជំនាន់​ ក្នុង​បុព្វ​ហេតុជាតិ​មាតុភូមិ​។ ទឹកភ្នែក​នេះគឺជា​ការ​ដាស់​តឿន​ស្មារតី​កូន​ខ្មែរ​គ្រប់​រូប​ឱ្យ​ក្រោក​ឈរ​ឡើង​ បន្ត​ស្មារតី​ជាតិឱ្យ​កាន់​តែ​ខ្លាំង​ក្លា ដើម្បី​រុញ​ច្រាន​នាវា​កម្ពុជា​ឆ្ពោះ​ទៅត្រើយ​សន្តិភាពជា​និច្ច​និរន្តរ៍។​​ ប្រជាជាតិកម្ពុជា ​មិន​បំភ្លេច​ការ​ឈឺចាប់​ យើង​រឹត​តែត្រូវ​រំឭក​​ការ​ឈឺចាប់​នេះដើម្បី​ប្រែក្លាយ​ទៅ​ជា​កម្លាំង​ ដើម្បីពង្រឹង​ជាតិ​យើង​៕