គ្រូបង្រៀន និងសិស្សនិស្សិត ចូលរួមយុទ្ធនាការ “១ម៉ឺនរៀល ១ម៉ឺននាក់” ដើម្បីជួយកុមារកម្ពុជា

ខណៈយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៦ បានប្រកាសបើកជាផ្លូវការ បាន​ក​ត់​សម្គាល់​ឃើញ​ថា ថ្នាក់ដឹកនាំក្រសួង ស្ថាប័ន វិស័យឯកជន ក៏ដូចប្រជាពលរដ្ឋ​ទូទៅ​បាន​ចូល​រួម​គាំទ្រ។ ទន្ទឹមនេះ លោកគ្រូ អ្នកគ្រូ និងសិស្សនិស្សិតជាច្រើន បានបង្ហាញ​សកម្មភាព​ចូល​រួម​បរិច្ចាគ​ជា​ថវិកាបន្តបន្ទាប់ ដើម្បីរួមគ្នាផ្តល់ក្តីស្រលាញ់ដល់កុមារនៅកម្ពុជា និងដើម្បីអបអរសាទរ ទិវា​កុមារអន្តរជាតិ ១មិថុនាផងដែរ។

លោក ឈុន វណ្ណឡេង នាយករង នៃវិទ្យាស្ថានជាតិពាណិជ្ជសាស្រ្ត (NIB) នៃក្រសួងការងារ និង​បណ្តុះបណ្តាលវិជ្ជាជីវៈ បានមានប្រសាសន៍ប្រាប់ ព័ត៌មាន ប៊ីធីវី ឱ្យដឹងនៅព្រឹកថ្ងៃទី២៩ ខែ​ឧសភា​នេះ​ថា ពាក់ព័ន្ធយុទ្ធនាការ “១ម៉ឺនរៀល ១ម៉ឺននាក់” នេះ ជាពិសេសតាមរយៈ​មូល​និធិ​គន្ធ​បុប្ជា​កម្ពុជា​ ទាំងថ្នាក់ដឹកនាំ ក៏ដូចជាលោកគ្រូ អ្នកគ្រូ និងសិស្សនិស្សិត តែងតែមាន​សកម្ម​ភាព​ក្នុង​ការ​ចូលរួម ដោយសារយុទ្ធនាការនេះ ពិតជាមានតម្លៃ និងគុណប្រយោជន៍​ណាស់​សម្រាប់​ពលរដ្ឋ​ខ្មែរ​គ្រប់រូបដែលត្រូវតែចូលរួមឲ្យបានគ្រប់ៗគ្នា ដើម្បីជួយដល់មន្ទីរពេទ្យគន្ធបុប្ផា និង​អាច​បន្ត​ផ្តល់​សេវាព្យាបាលដោយឥតគិតថ្លៃដល់កុមារបានកាន់តែប្រសើរឡើងថែមទៀត។

ស្របគ្នានេះ លោក ភេន សុផាត ដែលជាគ្រូបង្រៀន និងយុវជន ប៉ែន មករា តំណាង​និស្សិត​នៃ​វិទ្យា​ស្ថាន​ខាងលើនេះ បានបង្ហាញទស្សនៈថា រាល់ថ្ងៃនេះ បើគ្មានមន្ទីរពេទ្យកុមារគន្ធបុប្ជាទេ នោះ​កុមារ ​ពិសេសក្មេងៗមកគ្រួសារក្រីក្រ ក៏គ្មានសង្ឃឹមក្នុងការរស់នៅដែរ ដោយសារ​មិន​មាន​លទ្ធ​ភាព​​គ្រប់​​គ្រាន់ក្នុងការពិនិត្យ និងព្យាបាលសុខភាព ខណៈជីវភាពមានខ្វះខាត។ ពួកគាត់ ក៏​បាន​​អំពាវ​នាវដល់សាធារណជនទូទៅទាំងអស់ ទាំងសប្បុរជននៅក្នុង និងក្រៅប្រទេស សូម​ចូល​រួម​បរិច្ចាគ​ជា​ថវិកា​ឱ្យបានគ្រប់ៗគ្នា ដើម្បីរួមគ្នារក្សានិរន្តរភាព​នៃកិច្ច​ដំណើរ​ការ​របស់​មន្ទីរ​ពេទ្យ​គន្ធ​បុប្ផា ដែលកំពុងមានបេសកកម្មសង្រ្គោះជីវិតមាតា ទារក និងកុមារនៅកម្ពុជា ប្រកប​ដោយ​គុណ​ភាព មិនរើសអើង និងដោយមិនគិតថ្លៃ។

នៅក្នុងពិធីបើកយុទ្ធនាការ “១ម៉ឺនរៀល ១ម៉ឺននាក់” កាលពីថ្ងៃទី២៩ ខែឧសភា ឆ្នាំ​២០២៦​កន្ល​ងទៅ​ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រធានកិត្តិយសនៃមូលនិធិគន្ធបុប្ជាកម្ពុជា បានថ្លែងថា ការរៀបចំយុទ្ធនាការនេះ គឺដើម្បីចូលរួមអបអរសាទរទិវាកុមារអន្តរជាតិ ១ មិថុនា ការ​បំផុសសកម្មភាពកៀរគរមូលនិធិសប្បុរសធម៌ ជាសំខាន់គឺការបំផុសស្មារតី ខ្មែរជួយ​ខ្មែរ​ដល់​ប្រជា​ពលរដ្ឋ​ខ្មែរគ្រប់ស្រទាប់វណ្ណៈមាន សិស្ស និស្សិត មន្ត្រីរាជការគ្រប់ក្រសួង-ស្ថាប័ន គ្រឹះ​ស្ថាន​ឯក​ជន និងសាធារណៈទាំងក្នុង និងក្រៅប្រទេស ក្រោមមូលបទ “ទោះក្នុង​កាលៈ​ទេសៈ​​ណា​ក៏​ដោយ ខ្មែរនៅតែជួយខ្មែរ” ។ សូមរំលឹកទៀតថា បន្ទាប់ពីដំណើរការឡើងវិញនៅឆ្នាំ១៩៩២ ដោយ​លោក​វេជ្ជបណ្ឌិត បេអាត រិចឈ្នឺរ (Beat Richner) មន្ទីរពេទ្យ​គន្ធ​បុប្ផា​ទាំង​នៅ​រាជ​ធានី​ភ្នំពេញ ​និងនៅខេត្តសៀមរាប បានផ្តល់នូវសេវាព្យាបាលប្រកបដោយគុណភាព និងជួយ​សង្គ្រោះ​អាយុ​ជីវិត​កុមារកម្ពុជា រួមទាំងស្ត្រីមានផ្ទៃពោះរាប់លាននាក់ ដោយឥតគិតថ្លៃ ក្នុងរយៈពេលជាង ៣​ទសវត្សរ៍កន្លងមកនេះ។ ដើម្បីលើកកម្ពស់ ជ្រោមជ្រែង និងបន្ត​បេសក​កម្ម​មនុស្ស​ធម៌​ដ៏​ថ្លៃ​ថ្លា​នេះ ​នៅឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្តួចផ្តើមបង្កើត “មូលនិធិគន្ធបុប្ផា” ដែលជាមូលនិធិផ្លូវការតែមួយគត់ បើក​ទទួល​មូល​និធិសប្បុរសធម៌ពីគ្រប់ប្រភពស្របច្បាប់នានាទាំងក្នុង និងក្រៅប្រទេស៕ អត្ថបទ៖ ឈិត បូរ៉ាវី