កម្ពុជានាំយកអង្ករមានគុណភាពល្អបំផុតធ្លាប់បានឈ្នះពានអង្ករល្អបំផុតពិភពលោក ទៅចូលរួមតាំងពិពិរណ៌ម្ហូបអាហារអន្តរជាតិ នៅទីក្រុងប៉ារីស

សហព័ន្ធស្រូវអង្ករកម្ពុជា(CRF)បានប្រកាសថា ខ្លួននឹងដឹកនាំក្រុមហ៊ុនជាសមាជិកចំនួន ១២ ក្រុមហ៊ុនទៅចូលរួមពិព័រណ៍ម្ហូបអាហារអន្តរជាតិ ហៅកាត់ថា អេសអាយអេអ៊ិល-SIAL នៅទីក្រុង Paris នៅប្រទេសបារាំង នៅសប្តាហ៍នេះ សោយសហព័ន្ធស្រូវអង្ករនឹងនាំយកអង្ករមានគុណភាពល្អបំផុតដែលធ្លាប់បានឈ្នះពានអង្ករល្អបំផុតពិភពលោកទៅចូលរួមតាំងពិពិរណ៌ម្ហូប អាហារអន្តរជាតិនេះ។

សេចក្តីប្រកាសព័ត៌មានរបស់សហព័ន្ធស្រូវអង្ករកម្ពុជា បានឱ្យដឹងថា ក្រោមកិច្ចយកទុកដាក់របស់រាជរដ្ឋាភិបាលក្នុងការជំរុញការនាំចេញអង្ករតាមរយៈការសហការគាំទ្រដោយ សហគ្រិនខ្មែរ (Khmer Enterprise) នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង គម្រោងរបស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) តាមរយៈគម្រោងាវែស III សហព័ន្ធស្រូវអង្ករកម្ពុជា នឹងដឹកនាំក្រុមហ៊ុននាំចេញចំនួន ១២ ដើម្បីចូលរួមតាំងបង្ហាញនូវផលិតផលអង្ករដែលមានគុណភាពល្អបំផុតរបស់កម្ពុជានិងធ្លាប់បានឈ្នះពានអង្ករល្អបំផុតពិភពលោក នៅក្នុងព្រឹត្តិការណ៍ម្ហូបអាហារអន្តរជាតិ Salon International de l’Alimentation (SIAL) Paris នៅទីក្រុងប៉ារីស ប្រទេសបារាំង។ កម្មវិធីនេះនឹងប្រព្រឹត្តទៅចាប់ពី ថ្ងៃទី១៩ ដល់ថ្ងៃទី២៣ ខែតុលា ឆ្នាំ២០២៤ ។

ការចូលរួមព្រឹត្តិការណ៍ម្ហូបអាហារអន្តរជាតិ SIAL Paris នេះ គឺជាការចូលរួម លើកទី២របស់សហព័ន្ធស្រូវអង្ករកម្ពុជានិងបានរៀបចំនូវពន្លាជាតិមួយយ៉ាងស្រស់ស្អាតទំហំ៨០ម៉ែត្រការ៉េ បន្ទាប់ពីការចូលរួមលើកទី១ នៅក្នុងឆ្នាំ២០១៤។

សហព័ន្ធស្រូវអង្ករកម្ពុជា បញ្ជាក់ថា គោលបំណងនៃការចូលរួមព្រឹត្តិការណ៍តាំងពិរព័រណ៍នេះ គឺដើម្បីធ្វើពិពិធកម្មទីផ្សារដែលស្របទៅតាមគោលនយោបាលរបស់រាជរដ្ឋាភិបាលដែលមានក្រសួងពាណិជ្ជកម្ម ក្រសួងឧស្សាហកម្មវិទ្យាសាស្រ្តបច្ចេកវិទ្យានិងនវានុវត្តន៍លើបទដ្ឋានស្តង់ដារនិង លក្ខខណ្ឌសុវត្ថិភាពចំណីអាហារ និងក្រសួងកសិកម្មរុក្ខាប្រមាញ់ និងនេសាទ ជាសេនាធិការក្នុងការជំរុញផលិតផលចូលទីផ្សារ និងការដាំដុះតម្រូវតាមទីផ្សារ។

លោក ចាន់ ពេជ្រ អ្នកគ្រប់គ្រងទូទៅ ក្រុមហ៊ុន ស៊ីកនេតឈរ អហ្វ អេស៊ា ប្រាប់វិទ្យុបាយ័នថា៖ «ព្រឹត្តិការណ៍ម្ហូបអាហារអន្តរជាតិ SIAL Paris គឺជាកម្មវិធីតាំងពិពិព័រណ៌លើពិភពលោកដែលជាព្រឹត្តិការណ៍ធំមួយក្នុងចំណោមកម្មវិធីធំៗផ្សេងទៀត។ សម្រាប់ពួកខ្ញុំពិតជា មោទនភាពដែលសហព័ន្ធស្រូវអង្ករគាត់អាចមានពន្លាជាតិមួយតំណាងឱ្យប្រទេសកម្ពុជា ក្នុងការចូលរួម ដូចជាស្តង់ពិពិពរណ៌ប្រទេសផ្សេងៗទៀត ហើយការដែលយើងមានស្តង់មួយនៅទីនោះ គឺជាកន្លែងណាត់ជួបជាមួយអតិថិជន។សហគមអឺរ៉ុបបានបញ្ជាទិញអង្ករកម្ពុជាប្រហែលជា ៣០ ទៅ ៤០ ភាគរយដែរ អីចឹង ជាបណ្តុំនៃការណាត់ជួបជាមួយភ្ញៀវដែលយើងមានស្រាប់នៅលើទីផ្សារ ក៏ដូចជា ភ្ញៀវផ្សេងៗទៀតពីប្រទេសផ្សេងៗទៀតមកជួបយើង ដើម្បីយើងស្វែងរកនូវទីផ្សារថ្មីបន្ថែមទៀត»។

សហព័ន្ធស្រូវអង្ករកម្ពុជា បន្តថា អស់រយៈពេល ៦០ ឆ្នាំ ព្រឹត្តិការណ៍ម្ហូបអាហារអន្តរជាតិ SIAL Paris បានក្លាយជាវេទិកាមួយ សម្រាប់ឧស្សាហកម្មម្ហូបអាហារទាំងមូលនិងជាមជ្ឈមណ្ឌលសំខាន់មួយសម្រាប់ការផ្គត់ផ្គង់ក៏ដូចជាតម្រូវការអាហារពិភពលោក ដោយផ្តោតលើការច្នៃប្រឌិត។

ក្រុមហ៊ុននាំចេញទាំង១២ដែលបានចូលរួមតាំងបង្ហាញផលិតផលនៅក្នុងព្រឹត្តិការណ៍ម្ហូបអាហារអន្តរជាតិSIALParis ស្ថិតក្រោម ពន្លាសហព័ន្ធស្រូវអង្ករកម្ពុជា រួមមាន៖ ក្រុមហ៊ុន កំពង់ធំ រ៉ាយស៍ មើល លីមីធីត, ក្រុមហ៊ុន ដេលី ហ្វ្រេសេ ហ៊ូជ (ខេមបូឌា) ឯ.ក, ក្រុមហ៊ុន អៀង ហ៊ាង អ៊ីមផត អិចផត ខូ អិលធីឌី, ក្រុមហ៊ុន ស៊ីកនេតឈរ អហ្វ អេស៊ា។

ក្រុម​ហ៊ុន ស៊ីធី រ៉ាយស៍ អ៊ីមផត អិចផត ខូអិលធីឌី,ក្រុមហ៊ុន ហ្វេតរ៉ាយស៍ បាត់ដំបង អិលធីឌី, ក្រុមហ៊ុន ឡ អៀកហេង សេកមាស រ៉ាយស៍ ព្រមទាំង ក្រុមហ៊ុន ឥណ្ឌូឆាយណា រ៉ាយស៍ មើល លីមីធីត, ក្រុមហ៊ុន អេមរុ រ៉ាយស៍ (ខេមបូឌា),ក្រុមហ៊ុន ខ្មែរ ហ៊្វូត គ្រុប,ក្រុមហ៊ុន ព្រឹម្លិះ ខបភើរេសិន,ក្រុមហ៊ុន ហ្គោលដេន រ៉ាយស៍ (ខេមបូឌា)៕