សម្តេចធិបតី៖ ខ្ញុំមិនខ្វល់ពីការជេរប្រមាថនោះទេ សំខាន់ខិតខំរកមធ្យោយបាយជួយជាតិ និងប្រជាជនឲ្យទទួលបានផលល្អបន្ថែមទៀត

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានអះអាងថា សព្វថ្ងៃនេះ សម្តេចមិនបានឈឺក្បាល និងខ្វល់ខ្វាយចំពោះអ្នកណាជេរ ឬរិះគន់ដល់សម្តេចនោះឡើយ សំខាន់ក្នុងនាមនាយករដ្ឋមន្រ្តី គឺសម្តេចខិតខំរិះរកមធ្យោបាយធ្វើយ៉ាងណាជួយជាតិមាតុភូមិ ឲ្យទទួលបានផលល្អប្រសើរបន្ថែមទៀតប៉ុណ្ណោះ។

ការលើកឡើងរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាបែបនេះ គឺបានធ្វើឡើង ក្នុងឱកាសអញ្ជើញចូលរួមពិធីសំណេះសំណាល និងបំពាក់កន្សែងយុវជនកាកបាទក្រហម​កម្ពុជា​ជាង៤០០០នាក់ មកពីគ្រឹះស្ថានឧត្តមសិក្សា២៥ ​ក្នុងរាជធានីភ្នំពេញ ​នាព្រឹកថ្ងៃទី១៩ ខែតុលា ឆ្នាំ២០២៤នេះ។

សម្តេចធិបតី នាយករដ្ឋមន្រ្តី បានថ្លែងថា កុំខ្វល់ខ្វាយ និងការលើកឡើងរបស់អ្នកណាយក ទៅ​ប្រៀបធៀប និងអ្នកណាឲ្យសោះ ដោយយើងម្នាក់ៗ​ត្រូវតែខិតខំរៀងៗខ្លួនរួមគ្នាយ៉ាងណា​ដើម្បី​ផ្តល់ផលប្រយោជន៍សម្រាប់ជាតិ ដូច្នេះហើយយើងម្នាក់ៗ​ត្រូវតែមានទស្សនវិជ្ជមាន ហើយប្រសិនបើគ្មាន​ទស្សនវិជ្ជមានទ មើលអ្វីគ្រប់យ៉ាងគឺ នឹងខ្មៅងងិតទំាងអស់។

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ​បានបន្ថែមថា ក្នុងនាមជាប្រមុខរាជរដ្ឋាភិបាល យើងត្រូវគិតគួរដល់អ្នកដែលយើងត្រូវគិតគួរ ដើម្បីជាតិ និងប្រជាពលរដ្ឋរបស់យើងគ្រប់ៗគ្នា ជាក់ ស្តែងដូចអ្វីដែលសម្តេច បានឆ្លៀតឱកាសចុះសួរសុខទុក្ខ និងជួបបងប្អូន​ប្រជាពលរដ្ឋ​នៅ​តាម​សាធារណៈនាពេលកន្លងមកដោយគ្មានការព្រៀងទុកនោះ​ គឺដើម្បីចង់ដឹងព័ត៌មានពិត​ជាក់ស្តែង​ចេញពីពួកគាត់ និងខិតខំរិះរកមធ្យោបាយ ដើម្បីដោះស្រាយបញ្ហាជូនពួកគាត់។

សម្តេច បានបញ្ជាក់បន្ថែមទៀតថា «មួយថ្ងៃៗខ្ញុំគិតតែរឿងហ្នឹងទេ (រកដំណោះស្រាយជួយពលរដ្ឋ) បើសិនជាមួយថ្ងៃៗ ងើបឡើងខ្ញុំអង្គុយបើកតែគេជេរខ្ញុំ មើលតែរឿងអវិជ្ជមាននោះ មិនបាច់​ធ្វើអ្វីនោះទេ»។

សម្តេច បានបញ្ជាក់បន្ថែមទៀតថា ​កាតព្វកិច្ច ​របស់យើង(រាជរដ្ឋាភិបាល) នាពេលនេះ​ គឺត្រូវគិត និង​ត្រូវដាក់ទិសដៅយ៉ាងម៉េច​ជួយប្រជាពលរដ្ឋណា​ ដែលជួប​ទុក្ខលំបាក និង​ជួយប្រជាពលរដ្ឋណា​ដែលរាជរដ្ឋាភិបាលត្រូវជួយ និងដោះស្រាយមុនគេ៕ អត្ថបទបាន ចក់