រដ្ឋបាលខេត្តកំពង់ឆ្នាំង ធ្វើតេស្តទឹកនោមរកសារធាតុញៀនលើមន្ត្រីរាជការ កងកម្លាំងទាំងអស់ចំណុះឲ្យសាលាខេត្តជិត ២០០នាក់

កំពង់ឆ្នាំង៖ រដ្ឋបាលខេត្តកំពង់ឆ្នាំង នៅថ្ងៃទី២២ ខែតុលា ឆ្នាំ២០២៤នេះ បានរៀប​ចំ​ធ្វើ​តេស្ត​ទឹក​នោម រកសារធាតុញៀនទៅលើក្រុមប្រឹក្សាខេត្ត គណៈអភិបាលខេត្ត នាយក នាយក​រង​រដ្ឋបាល​សាលា​ខេត្ត និងទីចាត់ការ អង្គភាព ចំណុះឲ្យសាលាខេត្តកំពង់ឆ្នាំង និងមន្ត្រីរាជការ មន្ត្រី​កិច្ច​សន្យា មន្ត្រីស្ម័គ្រចិត្ត ព្រមទាំងអ្នកអនាម័យ ដែលបម្រើការងារ​នៅ​ក្នុង​រដ្ឋបាល​ខេត្ត​កំពង់ឆ្នាំង​ប្រមាណជិត ២០០នាក់ ក្រោមវត្តមានរបស់ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ។ ការ​ធ្វើតេស្តទឹកនោមរកសារធាតុញៀននេះមិនត្រឹមតែធ្វើទៅលើមន្ត្រីរាជការ កងកម្លាំ​ង​ក្នុង​ខេត្ត​ទាំង​អស់​ទេ ត្រូវធ្វើដល់ក្មេងទំនើងតាមភូមិទៀតផង។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានថ្លែងថា៖ ដោយ​អនុវត្ត​តាម​បទ​បញ្ជារ​បស់​រា​ជដ្ឋាភិបាលកម្ពុជា ស្តីពីការដាក់ចេញវិធានការម៉ឺងម៉ាត់ ក្នុងការ្រយុទ្ធប្រឆាំងគ្រឿងញៀន ខុស​ច្បាប់ នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ។ ថ្ងៃនេះ រដ្ឋបាលខេត្តកំពង់ឆ្នាំង បាន​សហការ​ជាមួយការិយាល័យនគរបាលប្រយុទ្ធប្រឆាំងគ្រឿងញៀន នៃស្នងការនគរបាលខេត្ត រៀប​ចំ​ធ្វើតេស្តដល់មន្ត្រីរាជការ និងមន្ត្រីជាប់កិច្ចសន្យា ដើម្បីចូលរួម​ចំណែក​ធានា​ប្រសិទ្ធ​ភាព​នៃ​ការ​អនុវត្តយុទ្ធនាការប្រឆាំងគ្រឿងញៀនខុសច្បាប់ ដែលជាអាទិភាពនយោបាយ របស់​រាជ​រដ្ឋាភិបាល ក៏ដូចជាការលើកកម្ពស់ជំនឿទុកចិត្ត ប្រសិទ្ធភាពការងារ និងអភិបាលកិច្ចល្អ នៅ​ក្នុង​ស្ថាប័ន មន្ទីរ អង្គភាពជុំវិញខេត្ត។ រាជរដ្ឋាភិបាលបានការដាក់ចេញនូវវិធានការដ៏ម៉ឺងម៉ាត់ ក្នុង​ការ​រ​ក​សារ​ធាតុញៀនទៅលើមន្ត្រីរាជការនៅក្នុងរដ្ឋបាលខេត្ត ក៏ដូចជារដ្ឋបាលក្រុង ស្រុក ឃុំ ភូមិ និង​មន្ទីរ​អង្គភាពជុំវិញខេត្តផងដែរ។ ដូច្នេះយើងនឹងបន្ត បើកយុទ្ធនាការ​ធ្វើតេ​ស្ត​រក​សារ​ធាតុ​ញៀន​ទៅលើ​​មន្ត្រីរាជការ មន្ទីរអង្គភាពជុំវិញខេត្ត រដ្ឋបាលក្រុង ស្រុក ឃុំ សង្កាត់ សមាជិកភូមិ គ្រូ​បង្រៀន ក្រុមគ្រូពេទ្យ និងឈានទៅដល់ការធ្វើតេស្តក្មេងទំនើងទៀតផង។

យុទ្ធនាការធ្វើតេស្តរកសារធាតុញៀនលើមន្ត្រីរាជការថ្នាក់ជាតិ និងថ្នាក់ក្រោមជាតិនេះ ធ្វើ​ឡើង​តាម​បទ​បញ្ជារបស់នាយករដ្ឋមន្ត្រីកម្ពុជា សម្តេចធិបតី ហ៊ុន ម៉ាណែត ដោយ​មន្ត្រី​រាជ​ការ​ត្រូវ​ធ្វើ​ជា​គំរូ​សម្រាប់​ប្រជាពលរដ្ឋ។ តែក្នុងករណីរកឃើញមន្ត្រីជាប់ពាក់ព័ន្ធ និងប្រើប្រាស់គ្រឿងញៀន នោះ​នឹង​ត្រូវបណ្តេញចេញពីក្របខណ្ឌដោយគ្មានការលើកលែងឡើយ។ ការធ្វើ​តេស្ត​រក​ធាតុ​ញៀន​លើ​មន្ត្រីរាជការនៃអង្គភាពសាលាខេត្តនេះ ដើម្បីចូលរួម​ចំណែក​ធានា​ប្រសិទ្ធ​ភាព​នៃ​ការ​អនុវត្ត​យុទ្ធ​នាការប្រឆាំងគ្រឿងញៀនខុសច្បាប់ ដែលជាអាទិភាព​នយោបាយ​ដ៏​សំខាន់​របស់​រាជ​រដ្ឋាភិបាល ក៏ដូចជាការលើកកម្ពស់ជំនឿទុកចិត្ត ប្រសិទ្ធភាពការងារ និងអភិបាលកិច្ចល្អ នៅ​ក្នុង​ស្ថាប័ន​រដ្ឋ​ទាំងថ្នាក់ជាតិ ទាំងថ្នាក់ក្រោមជាតិ ទាំងក្នុងជួរកងកម្លាំងប្រដាប់អាវុធ និង​មន្ត្រី​រាជ​ការ​ស៊ីវិល​៕ កាំង ហុងវាស្នា