ក្រសួងកសិកម្មគ្រោងកែសម្រួលនូវហេដ្ឋារចនាសម្ព័ន្ធថ្មី ដើម្បីជំរុញឲ្យការបំពេញ​ការងារមានប្រសិទ្ធិភាព

ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី៣១ តុលា ឆ្នាំ២០២៤នេះ បានអញ្ជើញជាអធិបតីក្នុងពិធីជួបសំណេះសំណាលជាមួយថ្នាក់ដឹកនាំ និងមន្រ្តីរាជការនៃក្រសួងកសិកម្ម រុក្ខាប្រមាញ់ និងនេសាទ ដែលមានអ្នកចូលរួមចំនួន ៤៥០នាក់ នៅទីស្តីការក្រសួង។

យោងតាមក្រសួងកសិកម្ម រុក្ខាប្រមាញ់ និងនេសាទ បានឲ្យដឹងក្រោយចប់ពិធីថា ក្នុងពិធីសំណេះសំណាលនេះ ឯកឧត្តមរដ្ឋមន្ដ្រី បានគូសបញ្ជាក់ថា ក្រសួងនឹងមានការកែសម្រួលនូវហេដ្ឋារចនាសម្ព័ន្ធថ្មីដើម្បីឱ្យថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់មានផាសុកភាព ងាយស្រួលក្នុងការបំពេញការងារ ទទួលបានបរិយាកាសល្អ និងបង្ហាញនូវកិត្យានុភាពនៃក្រសួងកសិកម្ម រុក្ខាប្រមាញ់ និងនេសាទ ដែលដើរតួយ៉ាងសំខាន់នៅក្នុងការធានាសន្តិសុខស្បៀង នៅក្នុងចំណោមការងារសំខាន់ផ្សេងៗទៀតជាច្រើន សម្រាប់ប្រជាជន និងប្រជាជាតិកម្ពុជា។

បើតាមឯកឧត្តមរដ្ឋមន្ដ្រី ការកែប្រែមុខមាត់ថ្មីនេះមានការគិតគូរយកចិត្តទុកដាក់យ៉ាងល្អិតល្អន់ និងពិភាក្សាការងារជាមួយថ្នាក់ដឹកនាំអចិន្ត្រៃយ៍ក្នុងគោលបំណងទទួលបានផលប្រយោជន៍រួម និងបង្កើតនូវបរិស្ថានល្អមួយអំណោយផលសម្រាប់ការបំពេញការងាររបស់មន្ត្រីរាជការនៃក្រសួងកសិកម្ម រុក្ខាប្រមាញ់ និងនេសាទ៕