កម្ពុជា ប្រារព្ធទិវាគិលានុបដ្ឋាកអន្តរជាតិ ឆ្នាំ២០២៥ ក្រោមប្រធានបទ”ការយកចិត្តទុកដាក់ថ្ងៃ នេះ និងជួយលើកស្ទួយដល់ការរីកចម្រើនសេដ្ឋកិច្ចនៅថ្ងៃអនាគត”

ភ្នំពេញ ៖ នាព្រឹកថ្ងៃទី២ ខែមិថុនា ឆ្នាំ២០២៥នេះ ក្រសួងសុខាភិបាល នៃព្រះរាជាណាចក្រកម្ពុជា ប្រារព្ធ ទិវាគិលានុបដ្ឋាកអន្តរជាតិ ឆ្នាំ២០២៥ ក្រោមប្រធានបទ”ការយកចិត្តទុកដាក់ថ្ងៃ នេះ និងជួយលើកស្ទួយដល់ការរីកចម្រើនសេដ្ឋកិច្ចនៅថ្ងៃអនាគត”។

​ទិវាគិលានុបដ្ឋាកអន្តរជាតិ ឆ្នាំ២០២៥ ក្រោមវត្តមានលោកជំទាវសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងលោកស្រីវេជ្ជបណ្ឌិត ភូម៉ាកូ អូណូដា តំណាងអង្គការសុខភាពពិភពលោក ប្រចាំព្រះរាជាណាចក្រកម្ពុជា ព្រមទាំងថ្នាក់ដឹកនាំក្រសួងសុខាភិបាល និងថ្នាក់ក្រោមជាតិនាយកដ្ឋានមន្ទីរពេទ្យ ការិយាល័យគិលានុដ្ឋាក និងឆ្មប ក្រសួងសុខាភិបាល គណៈគិលានុបដ្ឋាក និងសមាគមគិលានុបដ្ឋាកកម្ពុជា ប្រធានថែទាំមកពីមន្ទីរពេទ្យជាតិ១១ និងមន្ទីរពេទ្យបង្អែក២៥ខេត្ត ក្រុង និងអ្នកបញ្ចប់ការសិក្សាភាពជាអ្នកដឹកនាំតាមរយៈក្រុមប្រឹក្សាតិលានុបដ្ឋាកអន្តរជាតិ។ តួនាទីរបស់គិលានុបដ្ឋាយិកាក្នុងការសម្រេចបាននូវគុណភាព និងសុវត្ថិភាពនៃ សេវាថែទាំកំណត់ន័យគុណភាព និងសុវត្ថិភាពនៃសេវាថែទាំ បង្កើនបណ្តាញទំនាក់ទំនងជាមួយគិលានុបដ្ឋាកផ្សេងទៀតនៅទូទាំងប្រទេស និងផ្លាស់ប្តូរបទពិសោធន៍ក្នុងការអនុវត្តការងារនៃសេវាថែទាំ។

ក្នុងឱកាសនោះលោកជំទាវសាស្រ្តាចារ្យ អ៊ឹម សិទិ្ធការ្យ បានថ្លែងថា កម្ពុជា បានប្រារព្ធធ្វើឡើងជារៀងរាល់ឆ្នាំ ចាប់តាំងពីឆ្នាំ២០១៧ ក្រោមប្រធានបទខុសៗគ្នាតាមឆ្នាំនីមួយៗដែលកំណត់ឡើងដោយក្រុមប្រឹក្សាគិលានុបដ្ឋាកអន្តរជាតិ (International Council of Nurses) ដែលមានជាង ១៣០ប្រទេស ជាសមាជិក។ ការជួបជុំរបស់យើងថ្ងៃនេះ គឺដើម្បីអបអរសាទរទិវាគិលានុដ្ឋាកអន្តរជាតិ ព្រមទាំងគិលានុបដ្ឋាក កម្ពុជាទូទាំងប្រទេសនូវសមិទ្ធផលដ៏អស្ចារ្យរបស់ខ្លួន។ ប្រធានបទឆ្នាំនេះ បានរំលេចឡើងនូវភាពសំខាន់ ចាំបាច់របស់គិលានុបដ្ឋាកដែលមិនត្រឹមតែជាអ្នកថែទាំទេ ប៉ុន្តែជាអ្នកជំរុញការរីកចម្រើនវិស័យសុខាភិបាល ផងដែរ។

លោកជំទាវ បានបន្តថា គិលានុបដ្ឋាក គឺជាបេះដូងនៃប្រព័ន្ធសុខាភិបាល៖ គិលានុបដ្ឋាកមានវត្តមាននៅក្នុងគ្រាដ៏លំបាកបំផុតក្នុងជីវិត ការថែទាំទារក ការសម្រាលទុក្ខលំបាក អ្នកជំងឺ និងគ្រួសារ និងការឆ្លើយតបទៅនឹងគ្រោះអាសន្ននានា រាប់តាំងពីទីជនបទ ដល់ទីប្រជុំជននៅ គ្រប់រាជធានី ខេត្ត គិលានុបដ្ឋាកតែងតែថែរក្សាសហគមន៍របស់យើងឱ្យមានសុខភាពល្អគួរជាទីទុកចិត្ត ដែលបញ្ជាក់ថា ឥទ្ធិពលរបស់គិលានុបដ្ឋាក ហួសពីការងារថែទាំនៅក្នុងមន្ទីរពេទ្យ។

ជាចុងក្រោយលោកជំទាវសាស្រ្តាចារ្យ អ៊ឹម សិទិ្ធការ្យ បានបញ្ជាក់ថា កិច្ចការយ៉ាងសកម្មរបស់គិលានុបដ្ឋាក ជាកម្លាំងចលករដ៏មានសារៈសំខាន់នៅក្នុងប្រព័ន្ធសុខាភិបាលទាំងមូល បានចូលរួមចំណែកលើកកម្ពស់សិទ្ធិមនុស្សនៅកម្ពុជា ក្រោមការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែល បានយកចិត្តទុកដាក់ និងបន្តធ្វើឲ្យប្រជាពលរដ្ឋទទួលបាននូវសេវាថែទាំ និងព្យាបាលសុខភាពប្រកបដោយសមធម៌ មានគុណភាព និងសុវត្ថិភាព៕

អត្ថបទ រដ្ឋា