ពាណិជ្ជកម្មអន្តរជាតិកម្ពុជា​ សម្រេចបានទឹកប្រាក់ជាង ១៦ ពាន់លានដុល្លារ

នៅក្នុងរយៈពេល ៤ ខែដើមឆ្នាំ ២០២៤ ​ទំហំ​ពាណិជ្ជកម្ម​អន្តរជាតិ​របស់​កម្ពុជា សម្រេចបានជាង ១៦ ពាន់លានដុល្លារ កើនជាង ១២ ភាគរយ បើប្រៀបធៀបរយៈពេលដូចគ្នាកាលពីឆ្នាំមុន ខណៈដែរអ្នកជំនាញលើកឡើងថា ទោះបីជាបញ្ហាភូមិសាស្រ្តនយោបាយហាក់នៅបន្ត ការកើនឡើងនៃតម្រូវការសកលបានចាប់ផ្តើមងើបឡើងតាំងពីចុងឆ្នាំមុនមកម្ល៉េះ។ នេះ​បើយោងតាម​ទិន្ន​​ន័យ​របស់អគ្គនាយកដ្ឋាន​គយ និង​រដ្ឋាករ​កម្ពុជា ​(GDCE) ចេញផ្សាយនៅថ្ងៃទី ១០ ខែឧសភា ឆ្នាំ ២០២៤។

ទិន្នន័យដដែលបង្ហាញថា ​ទំហំនៃការនាំចេញ-នាំចូលរបស់​កម្ពុជា​ជាមួយប្រទេស​ដៃគូអន្តរជាតិ​មានទឹកប្រាក់សរុប ១៦,៦៧ ពាន់លានដុល្លារ ក្នុងនោះទំនិញ​កម្ពុជា​នាំចេញបានថវិកាជាង ៨ ​ពាន់​លាន​ដុល្លារកើនឡើង ១៥,២ ​ភាគរយ ចំណែកទំនិញនាំចូលពីក្រៅប្រទេស​ ៨,៦៦ ពាន់ដុល្លារ​កើនឡើង ៩,៣ ភាគរយ។ ​លោកបណ្ឌិត ហុង វណ្ណៈ អ្នក​ជំនាញ​ផ្នែក​សេដ្ឋកិច្ច​នៅ​រាជ្យ​បណ្ឌិត្យសភា​កម្ពុជា យល់ឃើញថា ​ការនាំចេញរបស់កម្ពុជាទៅកាន់បណ្ដាប្រទេសអឺរ៉ុប និងអាមេរិក មានការកើនឡើង រួមផ្សំ​នឹង​ក្របខណ្ឌ RCEP ក៏មានកំណើនដូចគ្នា។​

លោក ហុង វណ្ណៈ បញ្ជាក់ថា តម្រូវការចាប់ផ្ដើមកើនឡើងវិញនៅដំណាច់ឆ្នាំ ​២០២៣ បន្ទាប់ពី​ការបញ្ជាទិញសម្លៀកបំពាក់ សម្ភារៈធ្វើដំណើរ មាន​ការធ្លាក់ចុះ​នៅឆ្នាំ ២០២២ ​ដោយសារ​វិបត្តិសង្គ្រាមរុស្ស៊ី-អ៊ុយក្រែន។​

​លោកបណ្ឌិត ហុង វណ្ណៈ បន្ថែមថា ​មានការដាក់ទណ្ឌកម្ម ទៅលើប្រទេសរុស្ស៊ី ឬបណ្ដាញ​ប្រទេស​រុស្ស៊ី ដែលធ្វើឱ្យមានបញ្ហាជ្រួលច្របល់ ធ្វើឱ្យទំនិញឡើងថ្លៃជាច្រើន​នៅលើទីផ្សារ​ជាពិ​សេស​ថាមពល​ប្រេងសាំង និងទំនិញផ្សេងៗ អញ្ចឹងធ្វើឱ្យពួកគាត់ត្រូវគិត អំពីការចំណាយ ដូច្នេះ​មកដល់​ពេលនេះ គាត់អាចគ្រប់គ្រងបាន​នាំឱ្យគាត់មានតម្រូវការ​ទៅលើរបស់រ​បរប្រើប្រាស់វិញ ទើបពាណិជ្ជ​កម្មកម្ពុជា-អន្តរជាតិកើនឡើង។

លោកបណ្ឌិតបានបញ្ជាក់បន្ថែមថា នៅក្នុងក្របខណ្ឌ RCEP មានការនាំចេញផលិតផលកសិផលមួយចំនួន រួមទាំងការនាំចេញគ្រឿងអគ្គិសនី ដែលផលិតដោយក្រុមហ៊ុនជប៉ុន កូរ៉េ ចិន។

ទំនិញកសិផលទាំងនោះ ដូចជាចេកអំបូងលឿង ស្វាយ​កែវរមៀត កៅស៊ូ ស្រូវ-អង្ករ ជាដើម ដែលមានការបញ្ជាទិញពីឥណ្ឌូនេស៊ី និងហ្វីលីពីនជាដើម។

លោក ហុង វណ្ណៈ បញ្ជាក់ថា ការបោះឆ្នោតនៅអាមេរិកនៅដំណាច់ឆ្នាំនេះ មិនធ្វើឱ្យប៉ះពាល់ដល់ការនាំចេញទំនិញរបស់កម្ពុជានោះទេ ខណៈសភាពការនៅលើពិភពលោក។

ទំនិញដែលកម្ពុជា នាំចេញទៅទីផ្សារអន្តរជាតិ រួមមាន សម្លៀកបំពាក់ ម៉ាស៊ីន និងឧបករណ៍អគ្គិសនី វត្ថុធាតុធ្វើ​អំពីស្បែក បរិក្ខារធ្វើពីរោមសត្វ ស្បែកជើង ស្រោមជើង ធញ្ញជាតិ កៅស៊ូ និងផលិតផលធ្វើអំពីកៅស៊ូ និងគ្រឿងសង្ហារឹម ជាដើម។

យោងតាម​អគ្គនាយកដ្ឋាន​គយ និង​រដ្ឋាករ​កម្ពុជា ក្នុងឆ្នាំ ២០២៣ ទំហំពាណិជ្ជកម្មកម្ពុជា-អន្តរជាតិ​សម្រេចបានទឹកប្រាក់សរុប ៤៦,៨៣ ​ពាន់​លាន​ដុល្លារ ធ្លាក់ចុះ ១,៩​ ភាគរយ​បើ​ធៀប​ឆ្នាំ​ ២០២២​។

​ក្នុងនោះ​ទំនិញ​កម្ពុជា​នាំចេញ​ ២២,៦៥​ ពាន់​លាន​ដុល្លារ កើន ១,៨ ​ភាគរយ និង​ការ​នាំចូល​មាន​ចំនួន ២៤,១៨ ​ពាន់​លាន​ដុល្លារ ធ្លាក់ចុះ ៥ ​ភាគរយ​៕

អត្ថបទពី៖ KPT
សម្រួលដោយ៖ HaTi