អនុប្រធានទី១ អាជ្ញាធរមីន៖ កម្ពុជា មានកាតព្វកិច្ចមិនត្រឹមតែបោសសម្អាតមីន និង​សំណល់​ជាតិ​ផ្ទុះ​ពី​សង្រ្គាម​ប៉ុណ្ណោះ​ទេ ប៉ុន្តែត្រូវគាំទ្រដល់ជនរងគ្រោះឱ្យរស់នៅប្រកបដោយសេចក្តីថ្លែថ្នូរ

ភ្នំពេញ៖ នៅថ្ងៃទី៤ ខែមីនា ឆ្នាំ២០២៦ នៅទីស្នាក់ការអាជ្ញាធរមីន ឯកឧត្តមបណ្ឌិត លី ធុជ ទេស​រដ្ឋមន្រ្តី និងជាអនុប្រធានទី១ អាជ្ញាធរមីន បានអនុញ្ញាតឱ្យលោកស្រី ប៊ុត រតនា នាយិកា​ប្រតិបត្តិ​នៃ​មជ្ឈ​មណ្ឌលតំបន់អាស៊ានសម្រាប់សកម្មភាពមីន (ARMAC) និងលោក Rejib DAKUA នាយកប្រចាំប្រទេសនៃអង្គការ Humanity & Inclusion (H&I) ដើម្បី​ពង្រឹង​កិច្ច​សហ​ប្រតិបត្តិ​ការ​លើជំនួយជនរងគ្រោះ និងផ្លាស់ប្តូរយោបល់​ស្តីពី​ការ​បង្កើត​គោល​ការណ៍​ណែនាំ​ជាតិ​សម្រាប់​ជំនួយ​ជន​រង​គ្រោះ។

តាងនាមឱ្យរាជរដ្ឋាភិបាលកម្ពុជា ឯកឧត្តមទេសរដ្ឋមន្រ្តី លី ធុជ បានថ្លែងអំណរគុណ និងកោត​សរសើរ​ដល់​មជ្ឈមណ្ឌល ARMAC ចំពោះភាពជាដៃគូ​យ៉ាង​ជិត​ស្និទ្ធក្នុង​កិច្ច​ការ​សម្រប​សម្រួល​វិស័យ​សកម្មភាពមីនទាំងនៅកម្ពុជា និងថ្នាក់តំបន់។ ឯកឧត្តមទេសរដ្ឋមន្រ្តី ក៏បានថ្លែង​អំណរ​គុណ​ដល់​អង្គការ H&I សម្រាប់ភាពជាដៃគូយូរអង្វែងជាមួយកម្ពុជា និងបន្តគាំទ្រ​ដល់​វិស័យ​សកម្ម​ភាព​មីន និងកម្មវិធីសង្រ្គោះជនមានពិការភាពនៅកម្ពុជា ក្នុងនោះរួមទាំង​ការ​ស្តារ​កាយ​សម្បទា​ ថែទាំសុខភាពផ្លូវចិត្ត ការធ្វើចលនា និងការបណ្តុះបណ្តាលជំនាញបច្ចេកទេស ជាដើម។

ឯកឧត្តមទេសរដ្ឋមន្រ្តី បានថ្លែងបញ្ជាក់ថា ជនមានពិការភាពនៅកម្ពុជា ត្រូវ​បាន​រាជ​រដ្ឋាភិបាល​កម្ពុជា ​ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី កំណត់​យ៉ាង​ច្បាស់​ក្នុង​ច្បាប់​ និងយុទ្ធសាស្រ្តជាតិ ដើម្បីធានាសិទ្ធិ សមភាព និងការចូលរួមពេញលេញក្នុងសង្គម។ ដោយ​ឡែកពាក់ព័ន្ធនឹងជនមានពិការភាពដោយសារមីន និងសំណល់ជាតិផ្ទុះពីសង្រ្គាម រាជ​រដ្ឋាភិបាល​កម្ពុជា ក៏បានចាត់ទុកជា​ផ្នែក​មួយ​សំខាន់​នៃ​គោល​នយោបាយជា​តិ​វិស័យ​សកម្ម​ភាព​មីន​ និងគោលនយោបាយសង្គមរបស់រាជរដ្ឋាភិបាល ដែលផ្តោតលើ “ការថែទាំ ស្តារសម្បទា និង​ការ​រួម​បញ្ចូលពេញលេញក្នុងសង្គម ដែលក្នុងនោះ កម្ពុជា មានកាតព្វ​កិច្ច​មិន​ត្រឹម​តែ​បោស​សម្អាត​មីន​ និងសំណល់ជាតិផ្ទុះពីសង្រ្គាម ប៉ុណ្ណោះទេ ប៉ុន្តែការថែទាំ និងគាំទ្រដល់ជនរងគ្រោះ គ្រួសារ និង​សហគមន៍ ឱ្យរស់នៅប្រកបដោយសេចក្តីថ្លែថ្នូរ។

ក្នុង​ឱកាសនោះ ឯកឧត្តមទេសរដ្ឋមន្រ្តី បានស្នើសុំឱ្យដៃគូបន្តគាំទ្រ និង​ពង្រឹង​កិច្ច​សហ​ប្រតិបត្តិ​ការ​បន្ថែម​ជាមួយកម្ពុជា ក្នុងការគាំទ្រដល់កិច្ចការបោសសម្អាតមីន និងកិច្ចស​ង្រ្គោះជ​ន​រង​គ្រោះ​ដោយ​សារ​មីន និងសំណល់ជាតិផ្ទុះពីសង្រ្គាម ក្នុងគោលដៅ​​រួម​ចំណែក​សម្រាល​បន្ទុក​ដល់​រាជ​រដ្ឋាភិបាល​កម្ពុជា​៕