អភិបាលខេត្តកំពង់ស្ពឺ ប្រាប់មន្ត្រី និងអាជ្ញាធរឱ្យបង្កើនការយកចិត្តដាក់ចំពោះពលរដ្ឋទាំងការរក្សាសន្តិសុខ និងការផ្ដល់សេវា

កំពង់ស្ពឺ៖ ឯកឧត្តម​បណ្ឌិត ជាម ចន្ទ័ សោភ័ណ អភិបាលខេត្តកំពង់ស្ពឺ បានធ្វើការក្រើនរំឭកទៅដល់មន្ទីរជំនាញពាក់ព័ន្ធ និងអាជ្ញាធរក្រុងស្រុកទាំង៩ ឱ្យបង្កើនការយកចិត្តទុកដាក់ឱ្យបានខ្ពស់ ដើម្បីឆ្លើយតបប្រកបដោយប្រសិទ្ធិភាព និងតម្លាភាពរាល់សំណើរ សំណូមពរ និងតម្រូវការចាំបាច់របស់ប្រជាពលរដ្ឋក្នុងមូលដ្ឋាន ។

ក្នុង​កិច្ច​ប្រជុំ​គណបញ្ជាការឯកភាពខេត្តកំពង់ស្ពឺ កាលពី​ថ្ងៃ​ទី​៦ ខែមេសា ឆ្នាំ​២០២៦ អភិបាល​ខេត្ត​កំពង់ស្ពឺ បានថ្លែងថា​ អាជ្ញាធរ​ត្រូវពិនិត្យ និងដោះស្រាយបន្ទាន់នូវរាល់ចំណុចអសកម្ម ដែលបាននិងកំពុងកើតមានក្នុងស្ថាប័ន មន្ទីរ ជំនាញមួយចំនួន ធ្វើយ៉ាងណាបញ្ជៀសរាល់បញ្ហា ដែលកើតមានឡើងរហូតទទួលទោសទណ្ឌតាមផ្លូវច្បាប់។

ឯកឧត្តម​បណ្ឌិត ជាម ចន្ទ័សោភ័ណ បានបន្តថា អាជ្ញាធរដែលបម្រើពលរដ្ឋបានល្អ មូលដ្ឋានមិនមានបញ្ហាប្រឈមនោះទេ ហើយបើសេវាល្អ នោះពលរដ្ឋក៏គ្មានកង្វល់ដែរ ដូច្នេះជាមន្ត្រី ជាអាជ្ញាធរត្រូវតែចុះជាប់និងតាមដានរាល់សំណើរ សំណូមពរ និងតម្រូវការចាំបាច់នានារបស់ពលរដ្ឋ ហើយក្នុងករណីទទួលបាននូវសំណើរ សំណូមពរ និងតម្រូវការក្នុងនាមជាមន្ត្រី ជាអាជ្ញាធរគឺត្រូវឆ្លើយតបឱ្យបានទាន់ពេលវេលា ហើយក្នុងករណីមិនអាចដោះស្រាយបានត្រូវដាក់រាល់សំណើរនិងសំណូមពរទាំងនោះមករដ្ឋបាលខេត្តដើម្បីពិនិត្យ និងដោះស្រាយបន្ត ។ រាល់ការផ្តល់ជូនដល់ប្រជាពលរដ្ឋ ក្នុងការចូលរួមដំណើរការអភិបាលកិច្ចល្អ និងជាឧបករណ៍មួយសម្រាប់លើកកម្ពស់ គណនេយ្យភាព តម្លាភាព ក្នុងដំណើរការពិនិត្យមើលលើការផ្តល់សេវាសាធារណៈរបស់រដ្ឋបាលខេត្ត រដ្ឋបាលស្រុក និង រដ្ឋបាលឃុំ-សង្កាត់ ក្នុងគោលបំណងដើម្បីធានាថា រាល់បញ្ហាអាទិភាពរបស់ប្រជាពលរដ្ឋក្នុងមូលដ្ឋានត្រូវបានពិនិត្យដោះស្រាយ និងឆ្លើយតប។ក្នុងនោះគ្រប់អ្នកពាក់ព័ន្ធទាំងអស់ក្នុងមូលដ្ឋាន ត្រូវបានរួមបញ្ចូលបរិយាប័នទៅក្នុងដំណើរការនៃការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិ។

ជាមួយគ្នានេះ ឯកឧត្តម​ ប្រធានគណបញ្ជាការឯកភាព ក៏បានក្រើនរំឭកបន្ថែមទៅដល់មន្ទីរអង្គភាពពាក់ព័ន្ធ អាជ្ញាធរក្រុងស្រុក ឃុំសង្កាត់ លើការគ្រប់គ្រងដីចំណីផ្លូវសាធារណៈរបស់រដ្ឋ ល្បែងស៊ីសងគ្រប់ប្រភេទ ពិសេសគឺល្បែងឆបោកតាមអនឡាញ (Scams online)។ ទប់ស្កាត់ឱ្យបានការចរាចរគ្រឿងញៀន ក្មេងទំនើង ហើយបន្តផ្សព្វផ្សាយឱ្យបានទូលំទូលាយនូវច្បាប់ចរាចរណ៍ ពិសេសអ្នកបើកបរដឹកម្មករ កម្មការិនីនោតាមបណ្តារោងចក្រ សហគ្រាស ដើម្បីកាតបន្ថយឱ្យមកនៅកម្រិតអប្បបរមា។

មួយវិញទៀត អាជ្ញាធរមូលដ្ឋាន ក៏ដូច សមត្ថកិច្ចទាំងបីប្រភេទត្រូវបង្កើនយកចិត្តទុកដាក់ផងដែរក្នុងការការពារសុខសុវត្ថិភាពជូនប្រជាពលរដ្ឋ ភ្ញៀវជាតិ ភ្ញៀវអន្តរជាតិក្នុងឱកាសប្រារព្ធពិធីអបអរសាទរបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២៦ដែលនិងចូលមកដល់នាពេលខាងមុខ ៕