ឯកអគ្គរដ្ឋទូតបារាំងប្តេជ្ញាជួយសម្របសម្រួល និងរៀបចំវេទិកាធុរកិច្ចផ្សារភ្ជាប់វិនិយោគិនបារាំង-កម្ពុជា

ឯកអគ្គរដ្ឋទូតបារាំង បានប្តេជ្ញាចិត្តខ្ពស់ ក្នុងការចូលរួមសម្របសម្រួល និងរៀបចំវេទិកាធុរកិច្ចនានា ដើម្បីផ្សារភ្ជាប់ទំនាក់ទំនង រវាងវិនិយោគិនបារាំង និងដៃគូក្នុងស្រុកឱ្យកាន់តែជិតស្និទ្ធ ដើម្បីជាឧត្តមប្រយោជន៍នៃប្រទេសទាំងពីរ។

ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅថ្ងៃទី៧ ខែមេសា ឆ្នាំ២០២៦ បានអនុញ្ញាតឱ្យ ឯកឧត្តម Oliver Richard ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំង ប្រចាំព្រះរាជាណាចក្រ កម្ពុជា ចូលជួបសម្តែងការគួរសម និងពិភាក្សាការងារ ដើម្បីលើកកម្ពស់ទំនាក់ទំនងទ្វេភាគី និងពង្រីកកិច្ចសហប្រតិបត្តិការ លើវិស័យ វិនិយោគឱ្យកាន់តែមានសន្ទុះខ្លាំងក្លា។

ក្នុងជំនួបនេះ ឯកឧត្តមឧបនាយករដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅ និងបានគូសបញ្ជាក់អំពីទំនាក់ទំនងជា ប្រវត្តិសាស្ត្រដ៏យូរលង់ និងកិច្ចសហប្រតិបត្តិការរវាងប្រទេសទាំងពីរ ដែលត្រូវបានពង្រឹង និងពង្រីកជាបន្តបន្ទាប់កន្លងមក។

ក្នុងឱកាសនោះ ឯកឧត្តមឯកអគ្គរដ្ឋទូត បានលើកឡើងអំពីព្រឹត្តិការណ៍កិច្ចប្រជុំកំពូលលើកទី២០ នៃប្រទេសនិយាយភាសា បារាំង (20th Francophonie Summit) ដែលកម្ពុជានឹងធ្វើជាម្ចាស់ផ្ទះរៀបចំនៅចុងឆ្នាំ២០២៦ ខាងមុខនេះ និងផែនការនៃការ រៀបចំព្រឹត្តិការណ៍អមសម្រាប់វិស័យពាណិជ្ជកម្ម និងធុរកិច្ច។ បន្ថែមពីនេះ ថ្នាក់ដឹកនាំទាំងពីរបានផ្លាស់ប្តូរមតិយោបល់យ៉ាងស៊ីជម្រៅ លើចំណុចគន្លឹះមួយចំនួនរួមមាន ការជំរុញការវិនិយោគផ្ទាល់ពីបារាំង (FDI) ។ ឯកឧត្តមអគ្គរដ្ឋទូត ក៏បានសម្តែងនូវការប្តេជ្ញាចិត្ត ក្នុង ការចូលរួមសម្របសម្រួល និងរៀបចំវេទិកាធុរកិច្ចនានា ដើម្បីផ្សារភ្ជាប់ទំនាក់ទំនងរវាងវិនិយោគិនបារាំង និងដៃគូក្នុងស្រុកឱ្យកាន់ តែជិតស្និទ្ធ។

ឯកឧត្តមឧបនាយករដ្ឋមន្ត្រី ក៏បានជម្រាបបន្ថែអំពីសក្តានុពលវិនិយោគនៅកម្ពុជា ភាពអនុគ្រោះនៃច្បាប់ស្តីពីវិនិយោគ និងការ ចុះហត្ថលេខាលើកិច្ចព្រមព្រៀងពាណិជ្ជកម្មបដិការកម្ពុជា-សហរដ្ឋអាមេរិក ដែលសុទ្ធតែជាកត្តាដែលផ្តល់នូវភាពទាក់ទាញ ដល់ក្រុម ហ៊ុនធំៗពីប្រទេសបារាំង។

សូមបញ្ជាក់ថា ការធ្វើពាណិជ្ជកម្មទ្វេភាគីកម្ពុជា-បារាំង បើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា នៅក្នុង រយៈពេល ២ ខែ ដើមឆ្នាំ២០២៦ នេះ, ការធ្វើពាណិជ្ជកម្មប្រទេសទាំងពីរមានទំហំទឹកប្រាក់សរុបជិត ២៥០ លានដុល្លារអាមេរិក ថយចុះ ៤ ភាគរយ ធៀបរយៈពេលដូចគ្នានិងឆ្នាំមុន ដោយក្នុងនោះកម្ពុជាបាននាំចេញជិត ១៩៥ លានដុល្លារ និងការនាំចូលមានទឹក ប្រាក់ជិត ៥៥ លានដុល្លារ៕

អត្ថបទ៖ សុន រ៉ាឌី