សាធារណរដ្ឋកូរ៉េ ចង់ជួយកម្ពុជាផលិតកសិផលសរីរាង្គលំដាប់អន្តរជាតិ និងជួយ​លើក​កម្ពស់​វិស័យ​កសិកម្មនៅកម្ពុជា

ភ្នំពេញ៖ ប្រទេសកូរ៉េ ចង់ជួយដល់កសិករកម្ពុជា ដើម្បីផលិតកសិផលសរីរាង្គលំដាប់អន្តរជាតិ ដែល​ជំរុញដល់ការលើកកម្ពស់វិស័យកសិកម្មនៅកម្ពុជា ខណៈឯ​កអគ្គ​រាជ​ទូតក​ម្ពុជា​ប្រចាំ​នៅ​ប្រទេ​ស​កូរ៉េ បានជំរុញដល់វិស័យធ្វើការ លើការផលិតជីសរីរាង្គកូរ៉េ មកទស្សនកិច្ចនៅកម្ពុជា ដើម្បី​ស្វែងយកបន្ថែមពីសក្ដានុពលកម្ពុជា ក៏ដូចជាបង្កើតរោងចក្រផលិតជីសរីរាង្គ ។

ក្នុង​ជំនួបពិភាក្សាការងារជាមួយឯកឧត្តម ឃួន ផុនរតនៈ ឯក​អគ្គ​រាជ​ទូត​កម្ពុជា​ប្រចាំ​សាធារណ​រដ្ឋ​កូរ៉េ ​នៅថ្ងៃទី៧ ខែមេសា ឆ្នាំ២០២៦ លោក Park Hee Soo ប្រធាន​ក្រុម​ប្រឹក្សា​ភិបាល​នៃ​ក្រុម​ហ៊ុន​ Saemyeong Energy Tech បានឲ្យដឹងថា ក្រុមហ៊ុនលោក មានគម្រោង​នាំ​យក​បច្ចេក​វិទ្យា​ផលិត​ជី​សរីរាង្គ ឈានមុខគេរបស់កូរ៉េ ទៅចែករំលែក ជូនដល់ប្រជាកសិករកម្ពុជា ដែល​កំពុង​ប្រកប​របរ​ដាំដុះដំណាំស្រូវ ពោត សណ្តែក និងដំណាំបន្លែ ផ្លែឈើផ្សេងៗ ។

លោក​បាន​បន្ថែមថា ចង់ឃើញផលិតផលកសិកម្មរបស់កម្ពុជា ក្លាយជា​កសិផល​សរីរាង្គ​លំដាប់​ថ្នាក់​អន្តរជាតិ ដើម្បីជួយបង្កើនជីវភាពរស់នៅរបស់ប្រជាជន ជាពិសេស ប្រជាកសិករកម្ពុជា ។

ក្នុង​ឱកាសនោះ ឯកឧត្តមឯកអគ្គរាជទូត បានសម្តែងនូវការស្វាគមន៍ ចំពោះគំនិតផ្តួចផ្តើមនេះ និង​បាន​ថ្លែងអំណរគុណ ចំពោះទឹកចិត្តរបស់លោក Park ក្នុងបំណងលើកស្ទួយជីវភាព របស់​ប្រជា​កសិករកម្ពុជា ព្រោះវិស័យកសិកម្មជាវិស័យសំខាន់ និងបាន​ចូល​រួម​ចំណែក​ក្នុង​ការ​អភិវ​ឌ្ឍ​សេដ្ឋកិច្ច​កម្ពុជា។

ឯកឧត្តម ឃួន ផុនរតនៈ ក៏បានលើកទឹកចិត្តដល់ក្រុមហ៊ុន ចាប់ផ្តើមរៀបចំរោងចក្រ ឬ​កន្លែង​ស្រាវ​ជ្រាវ​ធ្វើជីសិរីរាង្គនៅកម្ពុជា និងអញ្ជើញប្រធានក្រុមហ៊ុន និងប្រតិភូ ទៅ​ទស្សន​កិច្ច​នៅ​ប្រទេស​កម្ពុជា ដើម្បីភ្ជាប់ទំនាក់ទំនង ជាមួយវិស័យឯកជនផ្នែកកសិកម្ម និងក្រសួង-ស្ថាប័ន​ពាក់ព័ន្ធ។

បន្ថែមពីនេះ ឯកឧត្តមឯកអគ្គរាជទូត ក៏បានសំណូមពរក្រុមហ៊ុនជ្រើសរើសនិស្សិត ឬ​ពលករ​ខ្មែរ​ដែល​កំពុង​សិក្សា និងបំរើការងារនៅកូរ៉េ ដើម្បីផ្តល់ឱកាសឲ្យពួកគេទទួលបាននូវបទពិសោធន៍ និង​ជំនាញបច្ចេកទេស ក្នុងការផលិតជីសិរីរាង្គនេះ ដូច្នេះក្រោយពេលពួកគេ ត្រលប់មកកម្ពុជាវិញ នឹង​មាន​ជំនាញក្នុងការផលិតជីសិរីរាង្គ និងអាចជួយដល់ការអភិវឌ្ឍវិស័យកសិកម្មនៅកម្ពុជា ៕ អត្ថបទ បាន សុខរិទ្ធិ