ដំណោះស្រាយឌីជីថលក្នុង SME កំពុងមានសម្ទុះរីកចម្រើន តែវិស័យនេះនៅជួបបញ្ហា​ប្រកួតប្រជែង

ការចាប់យកប្រព័ន្ធបច្ចេកវិទ្យាឌីជីថលសម្រាប់ការធ្វើពាណិជ្ជកម្ម និងអាជីវកម្ម នៅក្នុង​សហ​គ្រាស​​ធុនតូច និងមធ្យម បានកំពុងមាន សម្ទុះនៃការប្រើប្រាស់ ប៉ុន្តែនៅជួប​បញ្ហា​ប្រឈម​ខ្លះ​ៗ ក្នុងការស្វែងរកដើមទុនសម្រាប់ពង្រីកអាជីកម្ម និងការប្រកួតប្រជែងលើទីផ្សារ។

លោកជំទាវ ចាន់ ភារី ប្រធានសមាគមសហគ្រិនស្រ្តីកម្ពុជាលើកឡើងក្នុងកិច្ចសម្ភាសន៍ជាមួយ BTV ស្តីពីការចាប់យកបច្ចេក វិទ្យាឌីជីថលសម្រាប់ដំណោះស្រាយអាជីវកម្ម និងបញ្ហា​ប្រឈម​នានា​នៅ​ក្នុង​សហគ្រាសធុនតូច និងមធ្យមនេះថា ទាក់ទិនការប្រើ ប្រាស់បច្ចេកវិទ្យានេះឃើញថា រាជ​រដ្ឋាភិបាលក៏ដូចជាក្រសួងស្ថាប័នពាក់ព័ន្ធដែលជាសេនាធិការ ជាពិសេស​ក្រសួង​កិច្ច​ការ​នារី​ជា​ដើម បាននិងកំពុងខិតខំប្រឹងប្រែងយ៉ាងខ្លាំង បច្ចុប្បន្នមានការរីកចម្រើនគួរគត់សម្គាល់ ដោយការ​ប្រើប្រាស់​បច្ចេកវិទ្យានេះ បានកាតបន្ថយ ពេលវេលា និងចំណាយផ្សេងៗ ដែលជាផ្នែក​មួយ​ជួយ​គាំទ្រ​ដល់​ការអភិវឌ្ឍសេដ្ឋកិច្ច-សង្គម។

លោកជំទាវបន្តថា ស្របពេលដែលរាជរដ្ឋាភិបាលកំពុងក្តោបយកបច្ចេកវិទ្យាឌីជីថល សម្រាប់​ការ​តភ្ជាប់​គ្រប់​បណ្តាញទាំង ផ្នែកសង្គម និងសេដ្ឋកិច្ចនេះក្នុងនោះសម្រាប់សហគ្រាសធុនតូច និង​មធ្យម​ដែល​ជាស្រ្តី បានកំពុងចាប់យកបច្ចេកវិទ្យានេះផងដែរ ដើម្បីតភ្ជាប់ទំនាក់ទំនងទាំងក្នុង និង​ក្រៅ​ប្រទេស​ជាពិសេសតភ្ជាប់ការធ្វើពាណិជ្ជកម្ម និងអាជីវកម្មជាដើម មានការវិវត្តន៍​រីក​ចម្រើន​គួរ​សម ប៉ុន្តែអ្វីដែលចោទជាបញ្ហាសម្រាប់សមាជិកសមាគម គឺពួកគាត់ជួបប្រទះបញ្ហាខ្លះៗដូចជា ផ្នែក​ហិរញ្ញវត្ថុ សម្រាប់ពង្រីកអាជីវកម្មក៏ដូចជាជួបបញ្ហានៃការលក់លើទីផ្សារផងដែរ។

ជុំវិញការទទួលបានហិរញ្ញប្បទាននេះដែរ,លោក លឹម អូន អគ្គនាយក SME Bank លើកឡើងថា ទាក់​ទិនការងារនេះ បច្ចុប្បន្ន​មាន​ការ​ជជែក​វែក​ញែក​គ្នា​ជា​ច្រើន​ព្រម​ទាំង​មាន​ការ​រអ៊ូរទាំ​ក្នុង​ការ​ពិបាក​ទទួលបានហិរញ្ញប្បទានជាដើម ក្នុងនោះចំពោះការមិនទទួលបានហិរញ្ញប្បទាននេះ គឺ​បណ្តាល​មកពីចំណុចមួយចំនួនដូចជា ការកង្វះទ្រព្យធានាជាពិសេសធុរកិច្ចបង្កើតថ្មី ពួកគេ​មាន​ចំណេះ​ជំនាញ តែក៏ពិបាកទទួល​បាន​ហិរញ្ញប្បទាន​ដើម្បី​ពង្រីក​អាជីវកម្ម​ព្រោះ​ភាគ​ច្រើន​ពួក​គាត់​គ្មាន​ទ្រព្យ​ធានា។ ចំណែកម្ចាស់អាជីវកម្មដែលដំណើររួចវិញ, ពួកគេមួយចំនួន​ក៏​ពិបាក​ទទួល​បាន​ហិរញ្ញប្ប​ទាន​ដូចគ្នាព្រោះអ្វីដែលជារឿងសំខាន់គឺសុវត្ថិភាពហិរញ្ញវត្ថុរបស់ពួកគាត់ គឺជាកត្តារាំង​ផ្ទប់​ក្នុង​ការទទួលបានហិរញ្ញប្បទាននេះដែរ។

ទាក់ទិនបញ្ហានេះដែរ, ថ្មីៗនេះ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា បាន​ស្នើដល់គ្រឹះស្ថានធនាគារ និង ហិរញ្ញវត្ថុនានា ពិនិត្យលទ្ធភាពលើការផ្តល់ឥណទានផងដែរ ជា​ពិសេសស្រ្តីដែលមានប័ណ្ណកម្មសិទ្ធិ (គ្មានប្តីចូលរួម) ដើម្បីឲ្យពួកគាត់ ទទួលបាន​និង​ការ​ប្រើ​ប្រាស់​សេវា​ហិរញ្ញវត្ថុផ្លូវការ ក្នុងគោលដៅចូលរួមក្នុងអាជីវកម្ម ការកាត់បន្ថយវិសមភាព និងភាព​ក្រី​ក្រនៅកម្ពុជា៕

អត្ថបទ៖ សុន រ៉ាឌី