ហ្វីលីពីន នឹងបន្តដាក់ពង្រាយនាវានៅដែនទឹកជម្លោះក្នុងសមុទ្រចិនខាងត្បូង

ឆ្មាំល្បាតឆ្នេរហ្វីលីពីន បាននិយាយនៅថ្ងៃចន្ទ (១៦ កញ្ញា) នេះថា ហ្វីលីពីននឹងបន្តដាក់ពង្រាយនាវានៅក្នុងដែនទឹក សាប៊ីណា ស្ហូល (Sabina Shoal) ដ៏ប្រកួតប្រជែងនៅក្នុងសមុទ្រចិនខាងត្បូង បន្ទាប់ពីនាវាហ្វីលីពីន បានវិលត្រឡប់ទៅកំពង់ផែវិញក្រោយការដាក់ពង្រាយរយៈពេលប្រាំខែនៅទីនោះ។

អ្នកនាំពាក្យឆ្មាំល្បាតឆ្នេរហ្វីលីពីន (PCG) លោក ជេយ តារៀលឡា (Jay Tarriela) បានប្រាប់សន្និសីទសារព័ត៌មានថា «យើងនឹងរក្សាវត្តមាននៅលើដែនទឹកទាំងនេះ»។ នាវារបស់ឆ្មាំល្បាតឆ្នេរហ្វីលីពីន ឈ្មោះ តេរ៉េសា ម៉ាកបាន័រ (Teresa Magbanua) ត្រូវបានដាក់ពង្រាយទៅកាន់ថ្មប៉ប្រះទឹក Sabina Shoal ក្នុងខែមេសា ដើម្បីត្រួតពិនិត្យអ្វីដែលទីក្រុងម៉ានីល សង្ស័យថាជាសកម្មភាពអះអាងសិទ្ធិលើទឹកដីឡើងវិញទ្រង់ទ្រាយតូចរបស់ចិន នៅក្នុងតំបន់នោះ។ នាវានេះបានត្រលប់ទៅកំពង់ផែវិញកាលពីថ្ងៃអាទិត្យ។

លោក Tarriela បាននិយាយថា ការត្រឡប់មកវិញរបស់នាវាមិនទាក់ទងនឹងការទាមទាររបស់ចិន ឱ្យទីក្រុងម៉ានីលដកនាវារបស់ខ្លួនទេ តែផ្ទុយទៅវិញគឺដើម្បីជួសជុល និងចូលរួមជាមួយតម្រូវការផ្នែកវេជ្ជសាស្រ្តរបស់នាវិក។ ដែនទឹក Sabina Shoal ដែលចិនហៅថាជាថ្មប៉ប្រះទឹក សៀនពិន (Xianbin) និងហ្វីលីពីនហៅថា អេស្កូដា ស្ហូល (Escoda Shoal) ស្ថិតនៅភាគខាងលិចនៃខេត្ត ប៉ាឡាវ៉ាន់ (Palawan) របស់ហ្វីលីពីន និងក្នុងតំបន់សេដ្ឋកិច្ចផ្តាច់មុខរបស់ប្រទេសនេះ។

ឆ្មាំល្បាតឆ្នេរចិនបាននិយាយកាលពីថ្ងៃអាទិត្យថា ខ្លួននឹងបន្តអនុវត្តសកម្មភាពអនុវត្តច្បាប់នៅក្នុងដែនទឹកដែលស្ថិតនៅក្រោមយុត្តាធិការរបស់ទីក្រុងប៉េកាំង ស្របតាមច្បាប់ និងការពារអធិបតេយ្យភាពទឹកដី និងសិទ្ធិ និងផលប្រយោជន៍ដែនសមុទ្រ៕