អាជ្ញាធរជាតិអប្សរា បញ្ចប់ការជួសជុលខ្លោងទ្វារខាងកើតនៃប្រាសាទប្រែរូប ផ្នែកខាងជើង

ក្រុមការងារអាជ្ញាធរជាតិអប្សរា ​បន្តជួសជុលខ្លោងទ្វារជើង ផ្នែកខាងកើត របស់ប្រាសាទប្រែរូប ដំណាក់កាលទី២ សម្រេចបានប្រមាណ៩០ភាគរយ។ ការងារជួសជុលនេះ ដំណើរការតាំងពីពាក់កណ្តាលខែឧសភា ឆ្នាំ២០២៤ នឹងបញ្ចប់នៅ​ខែ វិច្ឆិកា ឆ្នាំ២០២៤ នេះ។

លោក សូរ ប៉ោត បុរាណវិទូ និងគ្រប់គ្រងការដ្ឋានជួសជុលប្រាសាទប្រែរូប​ ឱ្យដឹងថា ស្ថានភាពនៃខ្លោងទ្វារខាងជើងផ្នែកខាងកើតរបស់ប្រាសាទ​ប្រែរូប ​បានខូចខាត និង​មានហានិភ័យ​ដល់សំណង់ ព្រមទាំងភ្ញៀវទេសចរមិនអាចដើរឆ្លងកាត់។ ដើម្បី​សង្គ្រោះ​ខ្លោងទ្វារនេះ​ឱ្យរឹងមាំ​ឡើងវិញ ក្រុមការងារជួសជុលពង្រឹងផ្នែកខាងក្នុងនៃស្លាបខាងជើង ​ផ្នែកខាងក្រៅផ្នែកខាងលិច និងផ្នែកខាងកើត​ ព្រមទាំងជួសជុល​ពង្រឹងរចនាសម្ពន្ធឥដ្ឋដែលខូចខាតធ្ងន់ធ្ងរ គ្មានស្ថិរភាព​នៅផ្នែកខាងលើនៃតួខ្លោងទ្វារ។ បិទបំពេញស្នាមប្រេះហែកការពារជម្រាបទឹក និងបន្ថែមរចនា​សម្ពន្ធមួយចំនួនសម្រាប់ភាពរឹងមាំយូអង្វែងដល់រចនាសម្ពន្ធខ្លោងទ្វារទាំងមូ។

លោក សូរ ប៉ោត បញ្ជាក់ថា ​ការងារជួសជុលខ្លោងទ្វារខាងកើតប្រាសាទប្រែរូប ​ផ្នែកខាងជើង រួចរាល់ ​គឺរចនាសម្ពន្ធនៃសំណង់ខ្លោងទ្វារទាំងមូល នឹង​មានភាពរឹងមាំឡើងវិញ មានសុវត្ថិភាព​ទាំងខ្លោងទ្វារ ​ហើយភ្ញៀវទេសចរក៏អាចដើរចេញចូលទស្សនាតាម​ខ្លោងទ្វារទិសខាងកើត​ដ៏​សំខាន់នេះដោយសុវត្ថិភាព។

អ្នកជំនាញរូបនេះរម្លឹកថា ​ការខូចខាតនៃរចនាសម្ពន្ធប្រាសាទប្រែរូប បណ្តាលមកពីការកង្វះការ​ថែទាំយូរអង្វែង ​មានដើមឈើនិងស្មៅដុះចាក់ឬស កំណកដី ​និងបណ្ដាលពីអាយុកាល​នៃ​សម្ភារសំណង់ អាកាសធាតុ ​ពិសេសទឹកភ្លៀងហូរជ្រាបចូលក្នុងប្រាសាទ ដែលធ្វើឱ្យរចនាសម្ពន្ធ​ចុះខ្សោយ ថ្មប្រាសាទងាយនឹងពុកផុយ។

សូមបញ្ជាក់ថា កន្លងមកនៅប្រាសាទប្រែរូបក៏ធ្លាប់មានការជួសជុលនៅសម័យបារាំង និងក្រោយមកទៀត មានប្រទេសអ៊ីតាលីផង៕