ឯកឧត្ដម ហ៊ុន ម៉ានី អញ្ជើញជួបសំណេះសំណាលជាមួយពលរដ្ឋក្នុងស្រុកបសេដ្ឋ និង​សម្ពោធ​បណ្ណាល័យមរតកក្រមង៉ុយចំនួន២

កំពង់ស្ពឺ៖ នៅព្រឹកថ្ងៃទី២៣ ខែមិថុនា ឆ្នាំ២០២៦នេះ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋ​មន្ត្រី​ក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ បាន​​អញ្ជើញ ជួបសំណេះសំណាលជាមួយពលរដ្ឋក្នុងស្រុកបសេដ្ឋ និងសម្ពោធ​បណ្ណាល័យ​មរតក​ក្រម​​ង៉ុយ​ទាំងពីរទីតាំង ស្ថិតក្នុងស្រុកបសេដ្ឋ ខេត្តកំពង់ស្ពឺ។

ពិធីនេះមានការនិមន្ត និងអញ្ជើញចូលរួមពីសំណាក់ព្រះថេរានុត្ថេរៈ ឯកឧត្ដម លោកជំទាវ សមាជិក​សមាជិការដ្ឋសភា និងសមាជិករាជរដ្ឋាភិបាល ឯកឧត្ដមប្រធានក្រុមប្រឹក្សាខេត្ត ឯកឧត្ដម​អភិបាលនៃគណៈអភិបាលខេត្ត ឯកឧត្ដម លោកជំទាវ លោក លោកស្រី មន្ត្រីរាជការ អាជ្ញាធរមូលដ្ឋាន លោកគ្រូ អ្នកគ្រូ សប្បុរសជន បងប្អូនប្រជាពលរដ្ឋក្នុងមូលដ្ឋាន ព្រម​ទាំង​ក្មួយៗ​សិស្សានុសិស្ស សរុបអ្នកចូលរួមចំនួន ៩២២នាក់។

ឯកឧត្តម ហ៊ុន ម៉ានី បានថ្លែងថា ឯកឧត្តមមានសេចក្តីសោមនស្សរីករាយក្រៃលែង ដែល​បាន​ជួប​សំណេះសំ​ណាលជាមួយបងប្អូន ប្រជាពលរដ្ឋក្នុងស្រុកបសេដ្ឋ ខេត្តកំពង់ស្ពឺជាថ្មីម្តងទៀត អម​ជា​មួ​យសមិទ្ធផលថ្មីជាបណ្ណាល័យចំនួន២នៅថ្ងៃនេះ។

ឯកឧត្តមបានថ្លែងថា តាមរយៈរបាយការណ៍របស់ ឯកឧត្តមបណ្ឌិត ជាម ច័ន្ទសោភ័ណ អភិបាល​នៃ​គណៈអភិបាលខេត្ត បានបង្ហាញឱ្យឃើញពីការរីកចម្រើនគួរឱ្យកត់សម្គាល់លើគ្រប់វិស័យ។ ជាក់​ស្តែង កំណើននៃតំបន់ទេសចរណ៍ (២៩កន្លែង) និងរោងចក្រ-សហគ្រាស (១.៦៤២​មូល​ដ្ឋាន​) បាននិងកំពុងជួយលើកស្ទួយមុខមាត់ខេត្តយ៉ាងខ្លាំង។

ឯកឧត្តម ហ៊ុន ម៉ានី បានបញ្ជាក់ថា ទន្ទឹមនឹងនេះ ការអភិវឌ្ឍមូលធនមនុស្សតាមរយៈវិស័យអប់រំ ក៏​ត្រូវបានយកចិត្តទុកដាក់ខ្ពស់ ទាំងការដាក់ចេញបទដ្ឋានគតិយុត្តនានា ជាអាទិ៍មាន​ដូចជា​ព្រះរា​ជ​ក្រឹត្យ​ស្តីពីលក្ខន្តិកៈនៃអង្គគ្រូបង្រៀនដែលផ្តល់ជាគុណប្រយោជន៍យ៉ាងច្រើនដល់គ្រូបង្រៀន និង​អង្គភាពអប់រំ ការជ្រើស​រើស​គ្រូប​ង្រៀន​ផ្អែក​លើកិ​ច្ច​ព្រម​ព្រៀង​ការ​ងារ​ដែល​ពោរ​ពេញ​ដោយ​សមត្ថភា​ព​ជាបន្តបន្ទាប់ និងសមិទ្ធផលថ្មីៗ​ដូច​អ្វី​ដែល​យើង​កំពុង​រួម​គ្នា​ដាក់​សម្ពោធ​ឱ្យ​ប្រើប្រា​ស់​ជា​ផ្លូ​វ​ការនូវបណ្ណាល័យថ្មីចំនួន២ នាថ្ងៃនេះ។

ឯកឧត្តមថ្លែងថា «ខ្ញុំសូមចូលរួមអបអរសាទរយ៉ាងស្មោះស្ម័គ្រជូនចំពោះលោកគ្រូ អ្នកគ្រូ ក្មួយ​ៗ​សិស្សា​នុសិស្ស និងប្រជាពលរដ្ឋទូទាំងខេត្តកំពង់ស្ពឺ។ ខ្ញុំក៏សូមថ្លែង​អំណរ​គុណ​យ៉ាង​ជ្រាល​ជ្រៅ​ចំពោះ​លោក​គ្រូ អ្នកគ្រូ ដែលមិនត្រឹមតែលះបង់កម្លាំងកាយចិត្ត ផ្ទេរចំណេះដឹង​ដល់​សិស្សា​នុសិស្ស​ប៉ុណ្ណោះទេ​ តែថែមទាំងបានបង្ហាញនូវ វប្បធម៌នៃការចែករំលែក ដ៏ប្រពៃ។ ការ​ចូល​រួម​រៃ​អង្គាស​ថវិកា​ផ្ទាល់ខ្លួន រួមជាមួយការគាំទ្រពីសប្បុរសជននានា ដើម្បីកសាងសមិទ្ធផលទាំងនេះ គឺ​ជា​ការ​ចូលរួមចំណែកយ៉ាងសំខាន់ជាមួយរាជរដ្ឋាភិបាល ក្នុងការលើក​កម្ពស់​វិស័យ​អប់រំ​នៅ​កម្ពុជា​ឱ្យ​កាន់​តែ​ល្អប្រសើរ»៕