ប្រជាពលរដ្ឋប្រមាណជាង២០០នាក់បន្ថែមទៀត បានធ្វើជាសាក្សី និងបានយល់ច្បាស់ពីកិច្ចការពារបូរណភាពទឹកដីរបស់រាជរដ្ឋាភិបាល

ដំណើរទស្សនកិច្ចទិសឦសានជើងទី៨ ខេត្តស្ទឹងត្រែង រតនគិរី នៅថ្ងៃទី៩-១០ ខែវិច្ឆិកា ឆ្នាំ២០២៤ នេះ មានបងប្អូនប្រជាពលរដ្ឋសរុបជាង ២០០នាក់ចូលរួម ដើម្បីស្វែងយល់ពីការពិត​នៃ​កិច្ចការពារបូរណភាពទឹកដី ​និងបានធ្វើជាសាក្សី ពីកិច្ចការពារបូរណភាពទឹកដីរបស់រាជរដ្ឋាភិបាល។

ដំណើរទស្សនកិច្ចទិសឦសានជើងទី៨ ពោពេញដោយក្តីរីករាយ ស្នាមញញឹម និងមោទនភាព ចំពោះរាជរដ្ឋាភិបាល ដែលបានស្ថាបនាផ្លូវក្រវាត់ព្រំដែន និងបោះបង្គោលព្រំដែនកម្ពុជា​ជាមួយ​ប្រទេសជិតខាង បានយ៉ាងត្រឹមត្រូវ និងរឹងមាំ ដើម្បីក្លាយជាព្រំដែនសន្តិភាព និងកិច្ច​សហប្រតិបត្តិការរហូតតរៀងទៅ។ ​ពិសេសដំណើរទស្សនកិច្ចទិសឦសាន​​ជើងទី៨នេះ ប្រជាពលរដ្ឋ​បានឃើញផ្ទាល់ភ្នែកនូវបង្គោលព្រំដែនកម្ពុជា-ឡាវ​ អាយុជាង ១០០ ឆ្នាំ​ដែលបន្សល់ទុកតាំងពីក្នុងសម័យអាណានិគមនិយមបារាំងថែមទៀតផង។

ដំណើរទស្សនកិច្ចទិសឦសាន ​ដែលផ្តល់ជូនដោយសម្តេចមហាបវរធិបតី ​ហ៊ុន ម៉ាណែត នាយករដ្ឋមន្ត្រី​ នៃព្រះរាជាណាចក្រកម្ពុជា​ និងលោកជំាវបណ្ឌិត​ ដោយឥតគិតថ្លៃនេះ នឹង​បន្តធ្វើរហូតដល់ខែធ្នូដាច់ឆ្នាំ២០២៤៕