ក្រុមហាម៉ាសអះអាងថាការធ្វើអត្ថាធិប្បាយរបស់លោក Trump ជាការប្រកាសពីចេតនានៃការឈ្លានពានហ្កាហ្សា

អ្នកនាំពាក្យក្រុមហាម៉ាស លោក Hazem Qassem កាលពីថ្ងៃព្រហស្បតិ៍ ទី៦ ខែកុម្ភៈ បានព្រមានថា ផែនការរបស់ប្រធានាធិបតីអាមេរិក លោក Donald Trump ក្នុងការកាន់កាប់តំបន់ហ្កាហ្សា និងជម្លៀសប្រជាជនដែនដីនេះ គឺជាការប្រកាសពីចេតនាឈ្លានពានហ្កាហ្សាទឹកដីប៉ាឡេស្ទីន។

លោក Qassem បាននិយាយនៅក្នុងសេចក្តីថ្លែងការណ៍មួយថា ក្រុមសកម្មប្រយុទ្ធប៉ាឡេស្ទីនក៏បានអំពាវនាវឱ្យមានកិច្ចប្រជុំកំពូលអារ៉ាប់ជាបន្ទាន់ ដើម្បីតតាំងចំពោះការបណ្ដេញជនជាតិប៉ាឡេស្ទីនពីដែនដីហ្កាហ្សា ផងដែរ។

ទន្ទឹមនឹងនេះដែរ លោក Trump បាននិយាយសម្រាលលើផែនការដ៏គួរឱ្យភ្ញាក់ផ្អើលដែលរូបលោកបានប្រកាសជាលើកដំបូងកាលពីថ្ងៃអង្គារសប្ដាហ៍នេះ និងលើសំណើរបស់លោកក្នុងការតាំងទីលំនៅថ្មីដល់ប្រជាជនប៉ាឡេស្ទីនជាងពីរលាននាក់នៅប្រទេសផ្សេងទៀតក្នុងទឹកដីមជ្ឈិមបូព៌ា។

អ្នកនាំពាក្យក្រុមហាម៉ាស បានថ្កោលទោសសេចក្តីថ្លែងការណ៍របស់លោក Trump ថា មិនអាចទទួលយកបានជាដាច់ខាត ស្របពេលមានការការថ្កោលទោស និងប្រឆាំងពីមេដឹកនាំពិភពលោកជាច្រើនរួមទាំងសម្ព័ន្ធមិត្តអាមេរិកខ្លះដែរ បន្តស្រោចលើលោកTrump ។

លោក Qassem បាននិយាយថាហ្កាហ្សាគឺសម្រាប់ប្រជាជនរបស់ខ្លួនហើយពួកគេនឹងមិនចេញទេ ។

លោកថាការលើកឡើងរបស់លោក Trump ថាទីក្រុងវ៉ាស៊ីនតោន នឹងកាន់កាប់តំបន់ហ្កាហ្សា ស្មើនឹងការប្រកាសបើកចំហនៃចេតនាឈ្លានពានទឹកដីនេះ។

យើងមិនត្រូវការប្រទេសណាមួយពើងទ្រូងគ្រប់គ្រងតំបន់ហ្កាហ្សាស្ទ្រីបឡើយ ហើយយើងមិនទទួលយកការកាន់កាប់ជំនួសណាមួយជាមួយប្រទេសណាផ្សេងទៀតនោះទេ៕